1 Crónicas
23 Davidqa machituña kasharqa, wañupunanpajpis pisillaña faltasharqa. Chaypacha payqa wawan Salomonta churarqa Israel nacionpi rey kananpaj.+ 2 Chantá Davidqa tantachimorqa Israelmanta tukuy kuraj kamachejkunata, sacerdotesta,+ levitastawan.+ 3 Tukuynin levitasta ujmanta uj yuparqanku treintayojmanta pataman,+ tukuyninkutaj 38.000 qharis karqanku. 4 Chaykunamanta 24.000 levitasqa encargados karqanku Jehová Diospa wasin ruwakunanmanta, 6.000 levitastaj autoridades karqanku, jinallataj jueces.+ 5 Chantá 4.000 levitasqa punkusta qhawaj kanku,+ 4.000 levitastaj tocanasta tocaspa Jehová Diosta alabaj kanku.+ Davidqa chay tocanasmanta nerqa: “Noqaqa kay tocanasta ruwani Diosta alabanapaj”, nispa.
6 Chaymanta Davidqa levitasta grupo grupota tʼaqararqa,+ Levijpa wawasninpa mirayninman jina. Levijpa wawasnenqa karqanku: Guersón, Cohat, Merarí ima.+ 7 Guersonpa wawasnenqa karqanku Ladanwan Simeiwan. 8 Ladanpa wawasnenqa kinsa karqanku: Jehiel, payqa kamachej karqa, chantá Zetam, Joel+ ima. 9 Simeijpa wawasnenqa kinsa karqanku: Selomot, Haziel, Harán ima. Chaykuna Ladanpa familiasninmanta umas kajkuna karqanku. 10 Simeijpa wawasnenqa karqanku: Jáhat, Ziná, Jeús, Berías ima. Tawantinku Simeijpa wawasnin karqanku. 11 Jahatqa kamachej karqa, Zizataj iskay kaj kamachej karqa. Jeuswan Beriaswantaj mana ashkha wawasniyojchu kasqankurayku, uj familia jinalla yupasqa karqanku, uj ruwanayojllataj karqanku.
12 Cohatpa wawasnenqa tawa karqanku: Amram, Izhar,+ Hebrón, Uziel+ ima. 13 Amrampa qhari wawasnenqa karqanku Aaronwan+ Moiseswan.+ Aaronta, wawasnintawan churarqanku Aswan Santo Lugarllapipuni sirvinankupaj.+ Jehová Diospa ñaupaqenpi jaywanasta qʼolachinankupaj,* payta sirvinankupaj, sutinpitaj runasta bendecinankupaj wiñaypaj.+ 14 Cheqa Diospa* kamachin Moisespa wawasnintaj, levitaspa ayllunkupi* yupasqa karqanku. 15 Moisespa wawasnenqa karqanku Guersomwan+ Eliezerwan.+ 16 Guersompa wawasninmantaqa Sebuel+ kamachej karqa. 17 Eliezerpa mirayninmantaqa* Rehabías+ kamachej karqa. Eliezerpataqa mana waj wawasnin karqachu, Rehabiaspa wawasnintaj may chhika karqanku. 18 Izharpa+ wawasninmantaqa Selomit+ kamachej karqa. 19 Hebronpa wawasnenqa kaykuna karqanku: Jerías, payqa kamachej karqa, iskay kajtaj Amarías, kinsa kajtaj Jahaziel, tawa kajtaj Jecameam.+ 20 Uzielpa wawasnenqa+ karqanku: Miqueas, payqa kamachej karqa, iskay kaj kamachejtaj Isías karqa.
21 Merarijpa wawasnenqa karqanku Mahliwan Musiwan.+ Mahlijpa wawasnintaj karqanku Eleazarwan Quiswan. 22 Eleazarpataqa wañupunankama mana qhari wawasnin karqachu, warmi wawasnillan karqa. Chayrayku tionku Quispa qhari wawasnenqa paykunawan casarakorqanku. 23 Musijpa wawasnenqa kinsa karqanku: Mahlí, Éder, Jeremot ima.
24 Chaykuna karqanku Levijpa wawasnin, paykunaqa anotasqa kasharqanku ñaupa tatasninkoj familiasninkuman jina, familiasninkumanta umasninkuman jina. Paykunaqa yupasqa kasharqanku, sutisninkupis qhelqasqa kasharqa, Jehová Diospa wasinpitaj sirvej kanku veintenkumantapacha. 25 Davidqa nisqa: “Israelpa Diosnin Jehovaqa nacionninta samarichin,+ payqa Jerusalenpi wiñaypaj tiyakonqa.+ 26 Chantapis levitasqa Diosta yupaychanankupaj niña apaykachanqankuchu yupaychana toldota, nitaj waj imasnintapis”,+ nispa. 27 David kamachisqanman jinataj levitasta yuparqanku veinteyojmanta pataman. 28 Paykunaqa Aaronpa wawasninta yanapaj kanku+ Jehová Diospa wasinpi ruwanaswan. Paykunaqa cargoyoj karqanku patiosmanta,+ comedoresmanta, Diospaj tʼaqasqa imasta llimphuchanamanta, cheqa Diospa wasinpi ima ruwanaschus ruwana karqa chaykunamantawan. 29 Paykunaqa cargoyoj karqanku sukʼasqa tʼantamanta,*+ chʼaki mikhuy ofrendapaj ñutʼu jakʼumanta, mana levadurayoj tortillasmanta,+ paylapi chayasqa tʼantasmanta, aceitewan puñasqa* masamanta,+ tukuy imasta pesanamanta, tukuy imasta midinamantapis. 30 Sapa día tutamanta,+ tardesninpiwan jamunanku karqa Jehová Diosman graciasta qonankupaj, alabanankupajpis.+ 31 Paykunaqa yanapakoj kanku Jehová Diospaj jaywanasta qʼolachina kajtin, samarikuna pʼunchaypi,+ killa rikhuriypi,*+ fiestaspipis,+ leypi qhelqasqa kasqanman jina. Chaytataj Jehová Diospa ñaupaqenpi ruwajpuni kanku. 32 Chantapis Dioswan tinkukuna toldopaj, santo lugarpaj, Aaronpa wawasninpajpis, nisunman hermanosninkupajpis, imastachus ruwananku karqa chaytapis ruwallajtaj kanku Jehová Diospa wasinpi.