2 Crónicas
17 Asajpa cuentanmantaqa wawan Jehosafatñataj+ rey karqa. Payqa gobiernonta Israelpi sinchʼita sayacherqa. 2 Jehosafatqa Judá nacionpa sumaj jarkʼachasqa llajtasninman tropa soldadosta churarqa. Chantá tropa soldadosta churallarqataj Judá jallpʼaspi, jinallataj Efraín llajtaspipis, mayqentachus tatan Asá japʼikaporqa chay llajtaspi.+ 3 Jehosafatqa allinta purerqa, imaynatachus ñaupa tiempospi ñaupa tatan David purerqa ajinata,+ nitaj Baal santosta sirverqachu. Chayrayku Jehová Diosqa Jehosafatwanpuni karqa. 4 Jehosafatqa tatanpa Diosninta sirverqa,+ payqa Israelpa costumbresninta qhatinanmantaqa, Diospa kamachisqasninta kasukorqa.+ 5 Jehová Diosqa Jehosafatpa makinpi gobiernonta sinchʼita sayacherqa.+ Judá nacionnintinmanta runastaj Jehosafatman regalosta apamoj kanku. Chayrayku Jehosafatqa manchay qhapaj karqa, may respetasqataj.+ 6 Payqa sonqonpi mayta kallpachakuspa Jehová Diospa ñankunasninpi purerqa. Judamantapis chinkacherqa chay pata lugaresta,+ yupaychana kʼullu postestapis.*+
7 Jehosafat kinsa watastaña kamachishaspa kuraj kamachisninta wajyachimorqa: Ben-Hailta, Abdiasta, Zacariasta, Netanelta, Micayatawan, Judaj llajtasninpi yachachimunankupaj. 8 Paykunawan khuskataj kay levitas kasharqanku: Semaya, Netanías, Zebadías, Asahel, Semiramot, Jehonatán, Adonías, Tobiya, Tob-Adonías ima. Levitaswan khuskataj kasharqanku sacerdote Elisamawan sacerdote Jehoramwan.+ 9 Paykunaqa Jehová Diospa Leyninmanta librota apakuspa Judapi yachachiyta qallarerqanku.+ Chantá runasman yachachispa Judajpa tukuynin llajtasninman rerqanku.
10 Judaj muyuyninpi karqanku chay nacionesqa Jehová Diosta manchachikorqanku, chayrayku Jehosafatwan mana maqanakorqankuchu. 11 Filisteosqa Jehosafatman pagota jina apamoj kanku qolqetawan regalostawan. Arabespis apamoj kanku 7.700 carnerosta,* 7.700 chivostawan.
12 Jehosafatqa aswan atiyniyojman tukorqa.+ Judapitaj ruwachillarqapuni sumaj jarkʼachasqa lugaresta,+ mikhuykunata jallchʼanapaj llajtastapis.+ 13 Jehosafatqa Judá llajtaspi jatuchaj imasta ruwacherqa. Jerusalenpipis soldadosnin tiyaporqa, sumaj wapu soldadosnin. 14 Chay soldadosqa grupospi tʼaqasqa kasharqanku familiasninkumanta listasman jina. Judá ayllumantaqa* kasharqanku waranqa runasta kamachejkuna. Ñaupaj kajqa kamachej Adná karqa, paywantaj kasharqanku 300.000 wapu soldados.+ 15 Adnajpa mandonpitaj kasharqa kamachej Jehohanán, paywantaj kasharqanku 280.000 soldados. 16 Adnajpa mandonpi kashallarqataj Zicrij wawan Amasíah, payqa tukuy sonqo Jehová Diosta sirvej churakorqa, paywantaj kasharqanku 200.000 wapu soldados. 17 Benjamín+ ayllumantataj kasharqa Eliadá, payqa wapu soldado karqa, paywantaj kasharqanku 200.000 soldados flechana arcosniyoj,* escudosniyojtaj.+ 18 Eliadaj mandonpitaj kasharqa Jehozabad, paywantaj kasharqanku 180.000 soldados guerraman rinankupaj wakichisqas. 19 Paykunaqa reyta sirvej kanku Judapi chay sumaj jarkʼachasqa llajtaspi, rey churarqa chay soldadospis reyta sirvillajtaj kanku.+