2 Crónicas

25 Amasiasqa 25 watasniyoj karqa kamachiyta qallarishajtin. Jerusalenpitaj 29 watasta rey jina kamacherqa. Mamanqa Jehoadán sutikorqa, Jerusalén llajtamantataj karqa.+ 2 Amasiasqa Jehová Diospa qhawayninpi allin imasta ruwarqa, jinapis mana tukuy sonqochu chayta ruwarqa. 3 Amasiasqa tukuynin nación makinpiña kashajtin, pikunachus tatanta wañucherqanku chay kamachisninta wañucherqa.+ 4 Jinapis chay runaspa wawasninkutaqa mana wañucherqachu. Amasiasqa Leypi nisqanman jina ruwarqa, Moisespa libronpi nisqanman jina, mayqenpichus Jehová Diosqa kamacherqa: “Tatasqa mana wañonqankuchu wawasninkoj juchasninkurayku, nillataj wawaspis wañonqankuchu tatasninkoj juchasninkurayku. Sapa ujpis juchanrayku wañunan tiyan”,+ nispa.

5 Amasiasqa Judamanta runasta tantachimorqa, paykunataqa grupo gruposta tantacherqa tukuynin Judapi tukuynin Benjaminpipis, ñaupa tatasninkoj familiasninkuman jina, waranqa runaspa kamachejninkuman jina, pachaj runaspa kamachejninkuman jinataj.+ Anotacherqataj 20 watasniyojmanta pataman kajkunata,+ chaykunataj kasqanku 300.000 soldados ejercitopi kanankupaj wakichisqa,* tʼojsina lanzasta, jatuchaj escudostawan apaykachayta yachajkuna. 6 Chantá Amasiasqa contratallarqataj Israelmanta 100.000 wapu soldadosta, 3.420 kilos* qolqe metalta pagaspa. 7 Cheqa Diospa* kamachintaj jamuspa Amasiasta nerqa: “Reyníy, amapuni Israelpa soldadosninta pusaychu. Manamin Jehová Diosqa Israelwanchu kashan,+ manamin mayqen efraimita soldadowanchu kashan. 8 Sapallayki riy, mana manchachikuspa maqanakamuy. Mana kasukojtiykeqa cheqa Diosqa enemigoykiwan atipachisunkiman. Diosqa atiyniyoj yanapananpaj,+ urmachinanpajpis”, nispa. 9 Amasiastaj cheqa Diospa kamachinta taporqa: “Israelpa soldadosninman chay 3.420 kilos* qolqe metalta qosqayrí, ¿qhasichu kanqa?”, nispa. Cheqa Diospa kamachintaj kuticherqa: “Jehová Diosqa chay qolqemanta nisqaqa astawanraj qosunkiman”,+ nispa. 10 Chayrayku Amasiasqa Efrainmanta jamorqanku chay soldadosta wasinkuman kachaporqa. Chay soldadostaj Judá nacionpaj mayta phiñakorqanku, wasisninkumantaj allin rabiasqa kutiporqanku.

11 Amasiasqa mana manchachikuspa ejercitonwan Kachi mayuman+ rerqa. Chaypitaj Seirmanta+ 10.000 runasta wañuracherqa. 12 Judamanta soldadosqa kausashajta japʼerqanku 10.000 runasta. Qaqa puntaman apaspataj chay patamanta chay runasta tanqaykorqanku, tukuyninkutaj chʼallpakorqanku.* 13 Amasías kachaporqa chay soldadosqa, mayqenkunatachus mana guerraman pusarqachu,+ chaykuna Judá nacionpa llajtasninman maqanakoj yaykuykorqanku, Samariamantapacha+ Bet-Horonkama.+ Wañucherqankutaj 3.000 runasta, ashkha imastataj apakaporqanku.

14 Amasiasqa edomitasta atipaytawan kutinporqa, apamorqataj Seír llajtayoj runaspa diosesninkuta, chaykunatataj diosesninta jina rejsikaporqa.+ Chay diosesmantaj kʼumuykukorqa, jaywanastapis chay diosespaj qʼoshñichiporqa. 15 Chayrayku Jehová Diosqa Amasiaspaj maytapuni phiñakuspa uj profetata kacharqa kay jinata ninanpaj: “¿Imajtintaj chay runaspa diosesninkuta yupaychankiri? Chay diosesqa mana makiykimanta salvayta aterqankuchu ni paykunata yupaychanku chay runasllatapis”,+ nispa. 16 Profeta parlashajtillanraj reyqa payta nerqa: “¿Reyta yuyaychanaykipajchu churarqayku?+ Chʼin kay.+ ¿Wañuchisunankutachu munanki?”, nispa. Profetataj chʼinyarqa, niraj chʼinyashaspataj nerqa: “Noqa yachani, Diosqa ninña qanta tukuchisunanta, kay jinata ruwasqaykirayku, nitaj yuyaychasusqaytapis japʼikusqaykirayku”,+ nispa.

17 Yuyaychaj runasninwan parlaytawan Judamanta rey Amasiasqa, Israelmanta rey Jehoasman uj willayta apacherqa. Jehoasqa Jehoacazpa wawan karqa, Jehoacaztaj Jehuj wawan karqa. Amasiasqa kay willayta Jehoasman apacherqa: “Jamuy, guerrapi tinkusunchej”,* nispa.+ 18 Israelmanta rey Jehoastaj, Judamanta rey Amasiasman kay jinata nichillarqataj: “Khishkarara qhoraqa Libanomanta cedro sachʼaman nichisqa: ‘Warmi wawaykita qhari wawayman entregapuy warmin kananpaj’, nispa. Jinapis Libanomanta uj monte animal jamuspa chay khishkarara qhorata qʼalata sarorqosqa. 19 Qanqa nishanki: ‘Edomta atipani’,+ nispa. Chayrayku qanqa runaykachashanki, jatunpajtaj qhawachikuyta munashanki. Wasillaykipi* kakuy. ¿Ima kajtataj desgraciata maskʼakushanki? Atipachikojtiykeqa Judá nacionnintinta ñakʼarichinki”, nispa.

20 Amasiastaj mana kasuta ruwarqachu,+ chaytaj cheqa Diospa munayninman jina karqa. Diosqa paykunata enemigosninkoj makinkuman jaywaykuyta munarqa+ Edommanta diosesta yupaychasqankurayku.+ 21 Ajinamanta Israelpa reynin Jehoasqa maqanakoj wicharerqa Judamanta rey Amasiaswan. Paykunaqa guerrapi tinkorqanku Bet-Semes+ llajtapi, chaytaj kashan Judá nacionpa japʼiyninpi. 22 Israeltaj Judá nacionta atiparqa, Judamanta soldadostaj wasisninkuman ayqekorqanku. 23 Israelmanta rey Jehoasqa Judamanta rey Amasiasta presota japʼerqa Bet-Semes llajtapi. Amasiasqa Jehoaspa wawan karqa, Jehoastaj Jehoacazpa* wawan karqa. Jehoasqa Amasiasta Jerusalenman apamorqa, chantá Jerusalenpa perqanta 178 metrosta* urmacherqa Efraín Punkumantapacha+ Esquina Punkukama.+ 24 Chantá Jehoasqa apakaporqa tukuynin qorita, tukuynin qolqe metalta, tukuy imastawan, presostapis. Chay imastaqa apakaporqa cheqa Diospa wasinpi Obed-Edom qhawasharqa chaymanta, jinallataj reypa wasinpi valorniyoj imasta jallchʼana cuartosmantapis.+ Chay tukuy imas aparisqataj Samariaman riporqa.

25 Israelmanta rey Jehoacazpa wawan Jehoás+ wañupusqanmanta, Judamanta rey Jehoaspa wawan Amasiasqa+ 15 watastaraj kausarqa.+ 26 Amasiaspa tukuy kausayninmanta, qallariymantapacha tukukuykama qhelqasqa kashan Judajpa, Israelpa Reyesninmanta Libropi. 27 Amasías Jehová Diosta yupaychayta saqepusqanmantapacha Jerusalenpi runasqa Amasiasta wañuchinankupaj yachachinakorqanku,+ paytaj Lakís llajtaman ayqekorqa. Chay yachachinakojkunataj Lakís llajtaman paypa qhepanta runasta kachallarqankutaj, chaypitaj Amasiasta wañucherqanku. 28 Chantá caballopi apakaporqanku, Judá llajtapitaj pʼamparqanku, maypichus ñaupa tatasninta pʼamparqanku chaypi.