Jeremías
52 Sedequiasqa+ kamachiyta qallarishajtin 21 watasniyoj karqa, Jerusalenpitaj 11 watasta kamacherqa. Mamanqa Hamutal sutikorqa,+ Libnamanta Jeremiaspa wawan karqa. 2 Sedequiasqa Jehoiaquim jinallataj Jehová Diospa qhawayninpi sajra imasta ruwallarqapuni.+ 3 Jerusalenpi, Judapipis chay imas pasarqa Jehová Dios phiñasqa kasqanrayku. Diosqa sinchʼitapuni phiñakuspa paykunata ñaupaqenmanta chinkarparicherqa.+ Sedequiastaj Babiloniaj reyninpa contranta oqharikorqa.+ 4 Sedequiasqa jisqʼon watastaña kamachisharqa, chunka kaj killaña karqa, chunka kaj pʼunchaytaj. Chay pʼunchay Babiloniamanta rey Nabucodonosorqa* tukuynin ejercitontin Jerusalenman jamorqa. Paykunaqa Jerusalenpa muyuyninpi toldosninkuta* sayacherqanku Jerusalenwan maqanakunankupaj, llajtaj muyuyninpitaj uj perqata sayaricherqanku cercaykunankupaj.+ 5 Jerusalén llajtataj cercasqallapuni kasharqa, rey Sedequías 11 watastaña kamachishajtin.
6 Tawa kaj killaña karqa, jisqʼon kaj pʼunchaytaj.+ Jerusalén llajtapitaj yarqhayqa allin sinchʼiñapuni karqa, niñapuni imapis karqachu runas mikhunankupaj.+ 7 Chantá llajtaj perqanta uj trechota urmacherqanku. Tutantaj tukuynin soldados ayqekorqanku iskaynin perqaspa punkunta, reypa huertan chayninta. Caldeostaj llajtaj muyuyninpi kasharqanku. Chantá chay ayqekojkunaqa Arabá ñanta rerqanku.+ 8 Chaywanpis caldeo soldadosqa rey Sedequiasta+ qhatiykorqanku, Jericó chʼin pampaspitaj tariparqanku. Reypa soldadosnintaj tukuyninku ayqekorqanku. 9 Chantá caldeo soldadosqa reyta japʼiytawan, Babiloniaj reyninpaman aparqanku Riblá lugarman, Hamat jallpʼaman, chaypitaj juzgarqanku. 10 Chantá Babiloniamanta reyqa Sedequiaspa wawasninta paypa rikunanta wañucherqa. Chay Riblá lugarllapitaj wañuracherqa Judamanta tukuy kuraj kamachejkunata. 11 Chantá Babiloniamanta reyqa Sedequiasta ciegoyarpacherqa.+ Makisninta chakisnintawan cobre cadenaswan wataykuspataj Babiloniaman apakaporqa. Chaypitaj presota japʼerqa wañupunankama.
12 Babiloniamanta rey Nabucodonosorqa* 19 watastaña kamachisharqa, phishqa kaj killaña karqa, chunka kaj pʼunchaytaj. Chay pʼunchay guardiaspa kamachejnin Nebuzaradanqa Jerusalenman yaykorqa, payqa karqa Babiloniamanta reypa ujnin yanapajnin.+ 13 Nebuzaradanqa ruphaykucherqa Jehová Diospa wasinta,+ reypa wasinta,* Jerusalenpi karqa chay tukuynin wasista, tukuynin jatuchaj wasistapis. 14 Guardiaspa kamachejninkuwan kasharqanku chay tukuynin caldeo soldadosqa, Jerusalenpa muyuyninmanta perqasta urmaracherqanku.+
15 Guardiaspa kamachejninku Nebuzaradanqa Babiloniaman presosta apakaporqa wakin wajcha runasta, Jerusalén llajtapi puchoj runasta ima. Chantá apakapullarqataj Babiloniamanta rey ladoman pasapoj runasta, jinallataj tukuy imata ruwayta yachajkunamanta puchojkunatapis.+ 16 Jinapis guardiaspa kamachejninku Nebuzaradanqa, chaypi saqerqa aswan wajcha runasllataña uva huertasta qhawanankupaj, esclavos jinataj trabajanankupaj.+
17 Chantá caldeo soldadosqa tʼunata ruwarqanku Jehová Diospa wasinpi karqa chay cobre pilaresta,+ carrosta,+ Jehová Diospa wasinpi karqa chay cobremanta jatun wirkhitapis.*+ Chay tukuynin cobretataj Babiloniaman apakaporqanku.+ 18 Apakapullarqankutaj baldesta, palasta, nina wañuchinasta, fuentesta,+ copasta,+ templopi Diosta yupaychanapaj imaschus cobremanta ruwasqa karqa chay tukuy imastapis. 19 Guardiaspa kamachejninkoqa apakapullarqataj jatuchaj fuentesta,+ brasa apaykachanasta, fuentesta, baldesta, candelerosta,*+ copasta, chantá oro puromanta, qolqe metalmanta ruwasqa fuentesta.+ 20 Chay iskay pilaresmanta, chay jatun wirkhimanta, chay wirkhej uranpi kasharqa chay 12 cobre torosmanta,+ chay carrosmantapis, mayqenkunatachus rey Salomón ruwarqa Jehová Diospa wasinpaj, chaykunamanta ashkhapuni cobre tantakorqa, mana pesay atinapuni karqa.
21 Chay pilaresqa sapa ujnin sayayninman 8 metros* karqa, sapa pilarpa muyuynintaj 5 metros 30 centimetrosniyoj* karqa.+ Chay pilaresqa phatunman* tawa dedos* karqa, ukhuntaj soqolla karqa. 22 Ujnin pilarpa patanpi karqa chay pʼuñoqa cobrellamantataj karqa, sayayninmantaj miderqa iskay metros 20 centimetrosniyoj.*+ Chay pʼuñuta muyuykoj mallapis granadaspis cobrellamantataj karqanku. Chay ujnin kaj pilarpis kikillantaj karqa, granadaspis kikillantaj karqanku. 23 Pʼuñoj muyuyninpeqa 96 granadas karqanku. Tukuyninpitaj mallapi 100 granadas karqanku.+
24 Guardiaspa kamachejninku Nebuzaradanqa apakapullarqataj kuraj sacerdote* Serayata,+ iskay kaj sacerdote Sofoniasta,+ punkuta qhawajkunamantataj kinsa runasta.+ 25 Chantá llajtamanta apakapullarqataj soldadospa comandantenta, mayqenchus reypa wasinpi cargoyoj karqa chayta. Apakapullarqataj llajtamanta reypa qanchis yuyaychaj runasninta, soldadospa capitanninkoj secretariontapis, mayqenchus nacionmanta runasta tantaj soldados kanankupaj chayta. Apakapullarqataj 60 runasta, pikunachus llajtallapiraj kasharqanku chaykunata. 26 Guardiaspa kamachejninku Nebuzaradanqa, chay runasta aparqa Babiloniaj reyninpaman, Riblá lugarman. 27 Babiloniamanta reytaj chay runasta Riblapi+ wañuracherqa, Hamat jallpʼapi. Ajinata Judá naciontaqa jallpʼanmanta presota apakaporqanku.+
28 Nabucodonosorqa* kay chhika runasta presosta apakaporqa: Qanchis kaj watapeqa 3.023 judiosta apakaporqa.+
29 Nabucodonosorqa* 18 watastaña kamachishaspa+ 832 runastawan Jerusalenmanta apakapullarqataj.
30 Chantá Nabucodonosor* 23 watastaña kamachishajtin, guardiaspa kamachejninku Nebuzaradanqa 745 judiosta presosta apakaporqa.+
Tukuyninpitaj Babiloniaman presos apasqa kajkunaqa 4.600 karqanku.
31 Judamanta rey Joaquinqa+ 37 watastaña preso kasharqa. Chay wataj 12 killanpi, 25 pʼunchayninpi Babiloniaj reynin Evil-Merodacqa, Judaj reynin Joaquinta kachariporqa, carcelmantataj orqhorqa. Evil-Merodacqa chay wata kamachiyta qallarerqa.+ 32 Rey Evil-Merodacqa Joaquinwan kʼacha karqa. Babiloniapi presos kasharqanku chay reyesmantapis Joaquintaqa aswan allinpaj qhawarqa.* 33 Joaquinqa preso ropanta orqhokaporqa, wañupunankamataj reypa mesanpi mikhorqa. 34 Joaquinmanqa sapa día mana faltayta Babiloniaj reyninpa mikhunanmanta qoj kanku, tukuy kausayninpi, wañupunan pʼunchaykama.