Jueces
12 Chantá Efraín ayllumanta* kajkunaqa tantaykukuspa mayuta chimparqanku, Zafón chaynejman.* Jeftetataj nerqanku: “¿Imaraykutaj noqaykuman mana willaspalla ammonitaswan maqanakoj rerqankiri?+ Noqaykoqa qanwan riykuman karqa. Kunanqa qanta, wasiykitawan ruphaykuchisqayku”, nispa. 2 Jeftetaj paykunaman kuticherqa: “Noqawan soldadosniywanqa uj jatun chʼajwapi ammonitaswan karqayku. Noqaqa qankunata wajyakorqaykichej. Qankunatajrí mana jamorqankichejchu ammonitasmanta salvanawaykupaj. 3 Mana jamojtiykichejtaj, noqa kikin ammonitaswan maqanakuspa casi wañorqanipis.+ Jehová Diostaj paykunata makisniyman jaywaykuwarqa. Kunanqa, ¿imaraykutaj noqawan maqanakoj jamunkichejri?”, nispa.
4 Chantá Jefteqa Galaadmanta+ tukuy qharista tantaykuspa Efraín ayllumanta kajkunawan maqanakorqa, atipaykorqataj. Efraín ayllumanta kajkunaqa paykunata nisqanku: “Qankuna Efraín aylloj jallpʼasninpi, Manasés aylloj jallpʼasninpi tiyakoj galaaditasqa, ayqekoj efraimitaslla kankichej”, nispa. 5 Galaadmanta kajkunaqa, Jordán mayu+ chimpanaspi sayaykamorqanku efraimitas ama ayqekunankupaj. Efraín ayllumanta kajkuna, mayqellanpis ayqekuspa “pasarichiway ari” nispa mañakojtin, Galaadmanta kajkunaqa tapoj kanku: “¿Efraimitachu kanki?”, nispa. Pichus “mana” nejtaqa, 6 kay jinata nej kanku: “Shibolet niy”, nispa. Pichus chay palabrata mana tʼojyachiyta atispa “sibolet” nispalla nejtaqa, chay kikinpi wañuchej kanku, chay Jordán mayu chimpanaspi. Chay kutipeqa 42.000 efraimitas wañuchisqa karqanku.
7 Galaadita Jefteqa Israelpi sojta watasta juez karqa. Wañupojtintaj llajtanpi pʼamparqanku, Galaadpi.
8 Jeftej qhepantaqa Belenmanta Ibzanñataj Israelpi juez karqa.+ 9 Ibzanpataqa 30 qhari wawasnin, 30 warmi wawasnin tiyaporqa. Warmi wawasnintaqa mana familianmanta qhariswanchu casaracherqa. Qhari wawasninpajpis 30 warmista pusamorqa paykunawan casarachinanpaj. Ibzanqa qanchis watasta Israelpi juez karqa. 10 Ibzán wañupojtintaj Belenpi payta pʼamparqanku.
11 Paypa qhepantaqa zabulonita Elonñataj Israelpi juez karqa. Payqa chunka watasta Israelpi juez karqa. 12 Zabulonita Elón wañupojtintaj, Ayalonpi payta pʼamparqanku, Zabulonpa jallpʼanpi.
13 Paypa qhepantaqa Piratonmanta Hilelpa wawan Abdonñataj Israelpi juez karqa. 14 Abdonpataqa tiyaporqa 40 qhari wawasnin, 30 allchhisnin ima, 70 burrospitaj lloqʼasqa purej kanku. Abdonqa pusaj watasta Israelpi juez karqa. 15 Piratonmanta Hilelpa wawan Abdón wañupojtintaj, Piratonpi payta pʼamparqanku, Efrainpa jallpʼanpi, amalequitaspa+ orqonkupi.