2 Reyes
13 Judamanta rey Ocoziaspa+ wawan Jehoás+ 23 watastaña kamachishajtin, Jehujpa+ wawan Jehoacazqa Israelta rey jina kamachiyta qallarerqa, Samariapitaj 17 watasta kamacherqa. 2 Jehoacazqa Jehová Diospa qhawayninpi sajra imasta ruwallarqataj. Payqa Nebatpa wawan Jeroboanpa juchasninta manchayta ruwallarqataj, mayqenkunawanchus israelitasta juchaman urmacherqa chay juchasta.+ Manataj cambiarqachu. 3 Jehová Diostaj maytapuni israelitaspaj+ phiñakorqa.+ Chayrayku Diosqa Siriaj reynin Hazaelpa+ makinman paykunata jaywaykullajpuni, Hazaelpa wawan Ben-Hadadpa+ makinmanpis.
4 Chaypacha Jehoacazqa Jehová Diosta rogarikorqa paykunata khuyarikunanpaj, Jehová Diostaj chay rogakusqanta uyarerqa. Diosqa rikorqa imaynatapunichus Siria nacionpa reynenqa israelitasta ñakʼarichisqanta.+ 5 Chayrayku Jehová Diosqa israelitasman uj salvajta qorqa+ Siria nacionpa makinmanta kacharichinanpaj. Israelitastaj ñaupa wataspi jina allinta kausakorqanku. 6 (Jinapis israelitasqa Jeroboanpa familian jina juchata ruwallarqankupuni, mayqenwanchus Jeroboanqa israelitasta juchaman urmacherqa chayta.+ Israelitasqa chay juchasta ruwallarqankupuni, waj diosta yupaychana kʼullu postepis*+ Samariapi kashallarqapuni). 7 Siriamanta reyqa Jehoacazpa ashkha soldadosninta wañuracherqa, paykunataqa erapi* pajata jina saruspa chinkarpacherqa.+ Chayrayku Jehoacazpa ejercitonqa pisillaña karqa: caballospi purej soldadosnenqa phishqa chunkallaña karqa, guerrapaj carretasninpis chunkallaña karqa, soldadosninpis chunka waranqallaña karqa.
8 Jehoacazpa tukuy kausayninmanta, tukuy ima ruwasqanmanta, sumaj atiyniyoj kasqanmantapis qhelqasqa kashan Israelpa reyesninmanta parlaj libropi. 9 Chantá Jehoacazqa ñaupa tatasnin jina wañuporqa, Samariapitaj pʼamparqanku.+ Wawan Jehoastaj paypa cuentanmanta rey jina kamachiyta qallarerqa.
10 Judá nacionpi rey Jehoás+ 37 watastaña kamachishajtin, Jehoacazpa wawan Jehoasqa Israel nacionta kamachiyta qallarerqa, Samariapitaj 16 watasta kamacherqa. 11 Jehoasqa Jehová Diospa qhawayninpi sajra imasta ruwallarqapuni. Payqa Nebatpa wawan Jeroboanpa juchasninta ruwallarqapuni, mayqenwanchus israelitasta juchaman urmacherqa chay juchasta.+ Jehoasqa manapuni chay juchasta ruwayta qonqarqachu.
12 Jehoaspa tukuy kausayninmanta, tukuy ima ruwasqanmanta, sumaj atiyniyoj kasqanmanta, Judamanta rey Amasiaswan+ maqanakusqanmantapis qhelqasqa kashan Israelpa reyesninmanta parlaj libropi. 13 Chantá Jehoasqa ñaupa tatasnin jina wañuporqa. Paytaqa Samariapi pʼamparqanku, maypichus Israelpa ñaupa reyesnin pʼampasqa kasharqanku chaypi.+ Chantá Jeroboanñataj*+ paypa cuentanmanta kamachiyta qallarerqa.
14 Eliseoqa+ onqoykuspa wañuporqa. Niraj wañupushajtintaj Israelmanta rey Jehoasqa waturikoj uraykorqa. Waqaspataj nerqa: “Tatáy, tatáy. Israelpa carretan, caballospi purej soldadosnin”,+ nispa. 15 Eliseotaj Jehoasta nerqa: “Flechana arcota,* flechasnintawan oqhariy”, nispa. Jehoastaj flechana arcota, flechasnintawan oqharerqa. 16 Eliseotaj Israelpa reyninta nerqa: “Flechana arcoykita flechanaykipaj aysay”, nispa. Israelpa reynintaj flechana arconta aysarqa, Eliseotaj reypa makisnin pataman makisninta churarqa. 17 Chantá Eliseoqa reyta nerqa: “Inti llojsimuy ladoman ventanata kichariy”, nispa. Reytaj ventanata kicharerqa. Eliseotaj nerqa: “Flechay”, nispa. Reytaj flecharqa. Chantá Eliseoqa nerqa: “Chayqa Jehová Diospa atipananpaj flecha.* Siria nacionta atipanapaj flecha. Siria naciontaqa Afec+ llajtapi atipanki paykunata chinkachinaykikama”, nispa.
18 Chantá Eliseo nillarqataj: “Kunanqa flechasta japʼiy”, nispa. Reytaj flechasta japʼerqa. Chantá Eliseoqa Israelpa reyninta nerqa: “Chay flechaswan pampata wajtay”, nispa. Reytaj kinsa kutillata pampata wajtarqa. 19 Cheqa Diospa* kamachintaj rabiakuspa reyta nerqa: “Pampataqa phishqallatapis sojtallatapis wajtanayki karqa. Chaywanqa Siria nacionta chinkachinaykikama atipawaj karqa. Kunantajrí kinsa kutillata Siria nacionta atipanki”,+ nispa.
20 Chantá Eliseoqa wañuporqa pʼamparqankutaj. Chaymantapacha sapa wata qallariyta Moab jallpʼamanta suwa runas Israel nacionman yaykumoj kanku.+ 21 Uj pacha runasqa wañusqa runata pʼampasharqanku, suwa runasta rikuspataj chay wañusqa cuerpota usqhayllata Eliseoj sepulturanman choqaykuspa ayqekorqanku. Chay wañusqa runaj cuerpon Eliseoj tullusninman chayajtintaj chay runaqa kausarerqa,+ sayarerqataj.
22 Jehoacazpa kamachisqan wataspi Siriamanta rey Hazaelqa+ israelitasta mayta ñakʼaricherqa.+ 23 Ajinapis Jehová Diosqa Abrahanwan,+ Isaacwan,+ Jacobwanpis+ tratota ruwarqaña. Chayrayku israelitaswan kʼacha karqa, paykunata yanapananpaj sonqon karqa, khuyakorqataj.+ Diosqa mana paykunata tukuchiyta munarqachu. Chayrayku kunankamapis ñaupaqenmanta mana paykunata chinkarparichinchu. 24 Siriamanta rey Hazael wañupojtintaj, wawan Ben-Hadadñataj cuentanmanta rey jina kamachiyta qallarerqa. 25 Ben-Hadadpa tatan Hazaelqa Jehoaspa tatan Jehoacazmanta wakin llajtasta guerrapi tinkuspa qhechuykusqa, chay llajtastataj Jehoasqa Ben-Hadadmanta qhechukapullarqataj. Jehoasqa kinsa kutita Ben-Hadadta atiparqa+ ajinamanta Israel llajtasta kutichikaporqa.