2 Reyes
4 Profetaspa wawasninpata*+ ujninpa warmenqa Eliseota rogarikorqa: “Qosayqa wañupun, qan allinta yachanki qosayqa Jehová Diosta manchachikojpuni kasqanta.+ Kunantaj manuwarqayku chay runa jamuspa iskaynin wawasniyta apakapuyta munashan esclavosnin kanankupaj”, nispa. 2 Eliseotaj taporqa: “¿Imaynatá yanapariykiman? ¿Imataj wasiykipi tiyapusunki? Willariway”, nispa. Warmitaj kuticherqa: “Kay kamachiykejtaqa ni iman wasinpi kanchu, uj yurupi aceitella tiyan”,+ nispa. 3 Eliseotaj nerqa: “Rispa tukuy vecinasniykimanta chʼusaj yurusta mañakamuy. Tukuy atisqaykita mañakamuy. 4 Chantá wawasniykiwan khuska wasiykiman yaykuspa punkuta wisqʼakamunki. Tukuynin yurusman aceiteta juntʼaykuchinki, juntʼa yurustataj uj cheqaman churanki”, nispa. 5 Warmitaj riporqa.
Chantá wawasninwan khuska wasinpi wisqʼaykukorqa. Wawasnenqa yurusta jaywarqanku, warmitaj chay yurusman aceiteta juntʼacherqa.+ 6 Tukuynin yurusman juntʼachiytawan warmeqa ujnin wawanta nerqa: “Uj yurutawan jaywamuway”,+ nispa. Wawantaj nerqa: “Manaña yurus kanchu”, nispa. Aceitetaj niña yapakamorqachu.+ 7 Warmitaj cheqa Diospa* kamachinman rispa willamorqa. Diospa kamachintaj nerqa: “Chay aceiteta vendemuytawan manusniykita pagamuy. Puchojtaj qanpaj wawasniykipajwan kachun”, nispa.
8 Uj pʼunchay Eliseoqa Sunem llajtaman rerqa.+ Chay llajtapeqa uj qhapaj warmi tiyakoj, chay warmeqa Eliseota munajta mana munajta wajyarej mikhunata qorinanpaj.+ Eliseotaj chayninta pasaspaqa yaykurejpuni mikhurikoj. 9 Chayrayku warmeqa qosanta nerqa: “Noqa yachani kay runaqa Diospa kamachin kasqanta, payqa kaynintapuni pasayta yachan. 10 Terrazapi* cuartitota ruwachipuna,+ chaymantaj camata churapusun, mesata, sillata, candelerotawan.* Visitariwajtinchejqa chaypi samarikonqa”,+ nispa.
11 Uj pʼunchay Eliseoqa chay wasiman chayakorqa, chay pata cuartoman wicharispataj chaypi winkurikorqa.* 12 Chantá Eliseoqa kamachin Guehazita+ nerqa: “Sunamita+ warmita wajyarimuy”, nispa. Guehazitaj wajyamorqa, warmitaj jamorqa. 13 Chantá Eliseoqa Guehazita nerqa: “Ama jina kaspa tapuriy: ‘Kay jinata tukuy imata ruwapuwayku.+ Kunanqa, ¿imatá qanpaj ruwapuykiman?+ ¿Reymantachu imallatapis mañanpuykiman,+ manachayrí soldadospa comandantenmantachu?’, nispa”. Warmitaj kuticherqa: “Mana, noqaqa llajta masisniy chaupipi allillanta tiyakushani”, nispa. 14 Eliseotaj Guehazita taporqa: “¿Imatataj paypaj ruwapusunman?”, nispa. Guehazitaj nerqa: “Paypataqa mana wawan kanchu,+ qosanpis viejituña”, nispa. 15 Eliseotaj nerqa: “Wajyarqamuy”, nispa. Guehazitaj wajyarqamorqa, warmitaj punkullapi sayarqa. 16 Eliseotaj nerqa: “Wata kunan jina wawata marqʼarikunki”,*+ nispa. Warmitaj nerqa: “Señorníy, qanqa cheqa Diospa kamachin kanki. Ama ajinata kay kamachiykiman llullakuychu ari”, nispa.
17 Aswan qhepamantaj warmeqa onqoj rikhurerqa, chantá Eliseo nisqanman jina watanman qhari wawitata nacechikorqa. 18 Wawaqa jatunña karqa, uj pʼunchaytaj tatanman rerqa, campopi ruthojkunawan kashajtin. 19 Wawataj tatanta nerqa: “Umay nanawan. Umay nanawan”, nispa. Tatantaj ujnin kamachinta nerqa: “Mamanman apapuway”, nispa. 20 Kamachitaj wawata mamanpaman kuticherqa. Wawataj mamanpa moqosnin patapi chaupi pʼunchaykama tiyasqa kakorqa, chantá wañuporqa.+ 21 Warmitaj wawanta wicharichispa cheqa Diospa kamachinpa camanman siriykuchimorqa,*+ punkuta wisqʼaykuspataj riporqa. 22 Chantá qosanta wajyaspa nerqa: “Ama jina kaspa uj kamachita kachamuway, uj burrotawan, cheqa Diospa kamachinman usqhayllata rispa kuterqamunaypaj”, nispa. 23 Qosantaj nerqa: “¿Imajtintaj kunanpuni rishanki? Niraj killa rikhuriychu,*+ nitaj samarikuna pʼunchaychu”, nispa. Warmintaj kuticherqa: “Ama llakikuychu. Tukuy imapis allillan kashan”, nispa. 24 Chantá burrota caronaykuytawan* kamachinta nerqa: “Usqhayllata kay burropi aysaway, amapuni ñakʼayllata rinkichu, noqa nisojtillay sayanki”, nispa.
25 Ajinata warmeqa cheqa Diospa kamachinman rerqa Carmelo orqoman. Cheqa Diospa kamachintaj karumantapacha rikuytawan kamachin Guehazita nerqa: “Qhawariy, sunamita warmi jaqayta jamushan. 26 Ama jina kaspa, usqhayllata taripamuspa taporqamuy: ‘¿Allillanchu kashanki? ¿Qosaykipis wapitullachu? ¿Wawaykipis allillanchu kashan?’, nispa”. Warmitaj kuticherqa: “Arí, walejlla kashayku”, nispa. 27 Chantá Carmelo orqoman chayaspa cheqa Diospa kamachinman qayllaykuspa chakisninmanta japʼiykukorqa.+ Guehazitaj qayllaykorqa kacharichinanpaj. Cheqa Diospa kamachintaj nerqa: “Ama jinaychu, allin llakisqa kashan. Jehová Diostaj mana willawanchu imamantachus llakisqa kasqanta”, nispa. 28 Warmitaj nerqa: “Señorníy, ¿noqachu wawata mañakorqayki? ¿Nichu nerqayki ‘ama qhasita kusichiwaychu’ nispa?”.+
29 Eliseotaj Guehazita nerqa: “Ropaykita cinturaykiman wataykukuy,+ tojnuyta oqharikuspa riy. Piwanpis tinkuspaqa ama napaykunkichu, napaykusojtinkupis ama napaykunkichu. Rispa tojnuyta wawaj uyanman churaykamuy”, nispa. 30 Wawaj mamantaj Eliseota nerqa: “Kausaj Jehová Diospa sutinpi jurani, kausayniykirayku jurallanitaj: Mana noqawan rejtiykeqa manapuni ripusajchu”,+ nispa. Eliseotaj sayarispa paywan khuska rerqa. 31 Guehazitaj ñaupaqenkuta chayaspa wawaj uyanman tojnuta churarqa. Wawataj pachallanpuni kasharqa.+ Chayrayku Guehaziqa kutirispa Eliseota taripamuytawan nerqa: “Wawaqa manapuni rijchʼarinchu”, nispa.
32 Eliseo wasiman yaykojtintaj wawaqa camanpi wañusqa kashasqa.+ 33 Yaykuspataj punkuta wisqʼaykakamorqa, chantá Jehová Diosmanta mañakuyta qallarerqa.+ 34 Chantá camaman wicharispa, wawaj patanman siriykorqa, simintaqa wawaj simin pataman churarqa, ñawisnintataj wawaj ñawisnin pataman, makisnintapis wawaj makisnin pataman, ajinata wawaj patanpi karqa, wawaj cuerpontaj qʼoñiyta qallarerqa.+ 35 Eliseoqa wasi ukhupi kayman jaqayman puriykacharqa, chantá camaman wichariytawan wawaj patanman siriykullarqataj. Wawataj qanchis kutita achhiytawan ñawisninta kicharerqa.+ 36 Eliseotaj Guehazita wajyaspa nerqa: “Sunamita warmita wajyamuy”, nispa. Guehazitaj wajyamorqa, warmitaj Eliseo kasharqa chayman yaykumorqa. Eliseotaj nerqa: “Wawaykita marqʼarikuy”,+ nispa. 37 Warmitaj yaykumuspa Eliseoj ñaupaqenpi pampakama kʼumuykukorqa, chantá wawanta marqʼariykukuspa llojsiporqa.
38 Chantá Eliseoqa Guilgalman kuterqa, chaypitaj manchay yarqhay karqa.+ Profetaspa wawasnintaj+ Eliseoj ñaupaqenpi tiyasharqanku, Eliseotaj kamachinta nerqa:+ “Jatun mankata churay, profetaspa wawasninpajtaj mikhunata waykʼorqoy”, nispa. 39 Paykunamanta ujninkutaj malvasta pallaj rerqa, tarerqataj uj chʼipakoj plantata poqoyniyojta, poqoyninta pallaspataj ropanpi juntʼata apamorqa. Payqa ima poqoychus kasqanta mana yachaspalla mikhuna mankaman qʼalluykorqa. 40 Chaymantataj runasman qararqanku mikhunankupaj. Paykunataj mikhunata mikhuyta qallariytawan qhaparerqanku: “Cheqa Diospa kamachin, kay mikhunaqa venenoyoj”, nispa. Nitaj mikhorqankuchu. 41 Eliseotaj nerqa: “Uj chhika jakʼuta apamuychej”, nispa. Chantá chay jakʼuta mankaman churaykuspa nerqa: “Runasman qaraychej”, nispa. Mikhunataj mana paykunata imanarqachu.+
42 Chantá uj runa jamorqa Baal-Salisamanta,+ payqa mosoj granomanta* 20 tʼantasta cheqa Diospa kamachinpaj apamusqa,+ apamullasqataj uj costalpi mosoj granota.+ Eliseotaj nerqa: “Runasman jaywariy, mikhuchunku”, nispa. 43 Kamachintaj nerqa: “¿Imaynatataj kaysituta 100 runasman qoymanri?”,+ nispa. Eliseotaj nerqa: “Runasman jaywariy, mikhuchunku. Jehová Diosqa kayta nin: ‘Paykunaqa mikhonqanku, chaymantataj puchurenqaraj kanpis’, nispa”.+ 44 Kamachintaj runasman jaywarerqa, Jehová Dios nisqanman jinataj paykunaqa mikhorqanku, puchurerqataj.+