Allin ruwasqankuta qhawana
¿Imaynataj runas kanku?
Jatunchakoj runasqa wajkunata sajra ñawiwan qhawanku. Chantapis may kasqankuta yuyakunku, mana paykuna jina kaj runastataj pisipaj qhawanku. Tukuytaj jatunchakuyta qallarisunman. Uj libropi nin: “Casi tukuy runasqa yuyanku culturankupi kausasqanku, mikhusqanku, vistikusqanku, costumbresninku, religionninku, waj imastawan ruwasqanku, aswan sumaj kasqanta waj culturasmanta nisqaqa”, nispa. ¿Imatataj ruwasunman mana chay runas jina yuyanapaj?
Biblia niwanchej
“Kʼumuykukoj sonqo kaspa, wajkunata qankunamanta aswan kurajta jina qhawaychej” (FILIPENSES 2:3).
¿Ima niyta munan? Mana jatunchakunapajqa, kʼumuykukoj sonqo kananchej tiyan. Kʼumuykukoj sonqo kaspataj, reparasunchej noqanchejmanta nisqaqa wajkuna ashkha imaspi aswan kuraj kasqankuta. Chantapis ni mayqen cultura aswan sumajchu.
Stefan sutiyoj runamanta parlarina. Payqa uj jatun llajtapi kausakorqa, waj suyumanta runastataj chejnikoj. Jinapis chayta atiparqa. Pay nin: “Yuyasqayman jinaqa wajkunata aswan kurajta jina qhawana, ajinamanta manaña sajra ñawiwanchu paykunata qhawasun. Noqaqa mana tukuy imatachu yachani, wajkunamantataj imallatapis yachakuymanpuni”, nispa.
¿Imatá ruwasunman?
Ama yuyanachu ni imapi pantasqanchejta. Noqanchejmanta nisqaqa wajkuna wakin imasta aswan allinta ruwayta yachanku. Amataj yuyanachu kikin culturamanta kaj runas tukuyninku kikin imaspi pantasqankuta.
Waj culturayoj runamanta sajrata yuyanamantaqa, kaypi piensarina:
Noqanchejmanta nisqaqa wajkuna wakin imasta aswan allinta ruwayta yachanku.
¿Imastachus wajkuna ruwasqanku sajrapunichu chayri noqallanchejchu chayman mana yachasqa kashanchej?
Chay runa, ¿mana allin ruwasqallanchejtachu qhawanman?
¿Imastataj chay runa aswan sumajta yachan noqanchejmanta nisqa?
Chaykunata sutʼita yachasun chayqa, chay runaj sumaj ruwasqasninta astawan qhawasun.