Kapuwasqallanchejwan kusisqa kausakunapaj yuyaychaykuna
Tukuypis solteros chayri casarasqa kaspapis, jóvenes chayri machu runas kaspapis sonqo juntʼasqa kausakuyta munanchej. Diosninchejpis sonqo juntʼasqa kausakunanchejta munan. Chayrayku sumaj yuyaychaykunata qowanchej.
Sumajta trabajana
‘Sinchʼita trabajay, makisniykiwan allin kajta ruwaspa. Ajinamanta pisichikojkunaman imatapis qoriyta atinaykipaj’ (EFESIOS 4:28).
Ruwawajninchej Diosqa trabajota allinpaj qhawananchejta munan. Imaraykuchus sumajta trabajaj runaqa familianman necesitasqanta qoyta atin, chaytaj payta kusichin. Chantapis pisichikojta yanapariyta atin. Patronesqa sumajta trabajajkunata allinpaj qhawanku, chayrayku sumajta trabajajkunapajqa trabajoqa manapuni faltanchu. Chayraykuchá Biblia niwanchej, sumajta ‘trabajaspaqa’ kusiyta tarinanchejta (Eclesiastés 3:13).
Tukuy imapi allinta purina
“Imaraykuchus yachayku chʼuwa sonqoyoj kasqaykuta, tukuy imapitaj allintapuni puriyta munayku” (HEBREOS 13:18).
Mana llullakusunchu nitaj suwakusunchu chayqa, kusisqa sonqo tiyasqataj kasun, sumajtataj puñukusun. Wajkunapis respetawasun, noqanchejpitaj atienekuyta atillanqanku. Mana allinta purej runastajrí mana ajina kusisqachu kanku. Astawanpis sonqo yuyayninku juchachanman, juchanku sutʼiman llojsinanmantataj mancharisqalla kankuman.
Qolqeta maychus kajllata qhawana
“Kausayniykichejpi amapuni qolqemanta wañusqa kaychejchu. Astawanpis imaschus kapusunkichej chaywan kusisqa kaychej” (HEBREOS 13:5).
Mikhunata chayri waj imasta rantinapajqa qolqeta necesitanchejpuni, chaywanpis qolqeta munakuspa llakiypi rikukusunman. Uj runa aswan qolqeyoj kayta munaspa tiemponta, kallpanta chayllaman churanman. Chayta ruwaspataj matrimonionta llakiypi rikuchinman, wawasninpaj niña tiempon kanmanchu, onqonman ima (1 Timoteo 6:9, 10). Qolqeta munakojqa mana allin imasta ruwarpallanman. Uj yachayniyoj runa nerqa: “Nisqanta juntʼaj runaqa allin imasta japʼenqa; usqhayllata qhapajyayta munajrí castigasqa kanqa”, nispa (Proverbios 28:20).
Diosmanta yachakuyta ajllana
“Leytawan, yuyaychaytawanqa sumajta waqaychay” (PROVERBIOS 3:21).
Sumaj estudioyoj kayqa yanapawasunman imatapis sumajta ruwanapaj, allin tatas kanapaj ima. Sumaj estudioyoj kaspapis mana kusisqapunichu nitaj qolqeyojpunichu kasunman. Tukuy ima ruwasqanchejpi allin rinawanchejpajqa Diosmanta yachakuyta necesitanchej. Biblia nin Diosta uyarejtaqa tukuy ima ruwasqanpi allin rinanta (Salmo 1:1-3).