Diospa yachachiykunasnenqa suyakuyta qowanchej
Diosqa niwanchej tumpamantawan allin kausay kananta. Payqa llakiyta chinkachenqa, chantapis runasqa kusisqa kausakuyta atisunchej (Salmo 37:11). ¿Diospa nisqan juntʼakonqapunichu? Ari juntʼakonqa, imaraykuchus “Diosqa mana wañoj runa jinachu llullakunampaj” (Números 23:19). Qhawarina imastachus Diosninchej tumpamantawan ruwananta.
Diosqa sajra runasta chinkachenqa
“Sajra runasqa qhora jina wiñanku. Tukuy sajrata ruwajkunataj tʼika jina phancharinku, ruthusqa, wiñaypaj chinkarisqa kanallankupaj” (SALMO 92:7).
Ñaupaj yachaqanapi yachakorqanchej jina kausayqa aswan llakiyman tukushan. Chaywanpis chayqa mana tʼukuchinawanchejchu tiyan, imaraykuchus Bibliapi 2 Timoteo 3:1-5 nisqanman jina “qhepa pʼunchaykunapeqa” runasqa may sajrasman tukunanku karqa. Jinapis, qhepa pʼunchaykuna nispa, ¿imamantá parlashanman? Diosta mana kasukoj runas tumpamantawan chinkachisqa kanankumanta parlashan. Tumpamantawan Diosqa sajra kausayninkuta mana cambiayta munajkunata chinkachenqa, jinamanta jallpʼapi Diosta kasukuyta munajkunalla qhepakonqanku. Salmo 37:29 nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa.
Diosqa Satanasta chinkachenqa
‘Allin kausayta qoj Diosqa, pisimantawan Satanasta pʼaltarparenqa’ (ROMANOS 16:20).
Satanaswan supaykunawan sajra runaswan ima chinkachisqa kajtinku, jallpʼapi allin kausay kanqa. Dios niwanchej ‘ni pi manchachinawanchejta’ (Miqueas 4:4).
Diosqa onqoykunata wañuyta ima chinkachenqa
‘Diospa toldonqa runas chaupipi kashan. Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj qhapariypis, nitaj nanaypis’ (APOCALIPSIS 21:3, 4).
Diosqa imatachus Satanaswan Adanwan Evawan ima ruwasqankuta allinchanqa. Chantapis pantaj runas kasqanchejrayku imatachus ruwasqanchejtapis allinchanqa. Chayrayku llakiykuna, onqoykuna, wañuypis manaña kanqachu. Chanta, ¿maypitaj wiñaypaj kausanqanku Diosta munakojkuna, kasukojkuna ima?
Diosninchejqa jallpʼata uj paraisoman tukuchenqa
“Chʼin pampapis, tʼojra pampapis kusikonqanku. Qʼara pampapi kusikuspa, qhallallarishaj rosas jina tʼikanqa” (ISAÍAS 35:1).
Diosqa sajra kausayta chinkachenqa, jallpʼatataj uj paraisoman tukuchenqa. Tukuynejpi kʼacha parques, kʼacha huertas ima kanqa, jallpʼantinpitaj mikhuna jinantin kanqa (Salmo 72:16). Mama qochaspis, mayuspis llimphu kanqanku. Ichapis niña jallpʼanchej chʼichichakusqanmanta uyarisunchu. Runasqa wasista ruwakonqanku, chaypitaj tiyakonqanku. Ni pipis wajcha chayri yarqhasqa kanqachu, nitaj pipis callespi tiyakonqachu (Isaías 65:21, 22).
Diosqa wañojkunata kausarichenqa
Wañusqas ‘kausarimonqanku’ (HECHOS 24:15).
¿Wañusqa familiaresninchejwan amigosninchejwan tinkukapuyta munasunmanchu? Tukuy atiyniyoj Diosqa paykunata paraisopi kausarichenqa. Paykunata watejmanta rikuspa, paykunawan tinkuspa ima mayta kusikusun. Biblia niwanchej Dios wawasta, runasta ima kausarichisqanta. Paykuna watejmanta familiankuwan tinkukapusqankuta, chaytataj ashkha runas rikusqankuta (Lucas 8:49-56; Juan 11:11-14, 38-44). Tukuy atiyniyoj Diospajqa tukuy imapis atikun.