73 yachachiy
Israelmanta qhipa kaq allin rey
JOSÍAS 8 watitayuq Israelpa 2 ayllumanta reyjina kamachiyta qallariptin. Rey kananpaqqa wawallaraq karqa. Chayrayku, kuraqkunaqa llaqtata kamachiyta yanaparqanku.
Josías 7 watata kamachispa, Jehovata maskʼayta qallarirqa, Davidjina, Josafatjina, Ezequiasjina ima. Maqtʼitallaraq kachkaspa mana imata manchachikuspa allin kaqta ruwarqa.
Israelitasqa unaytaña lantista yupaychaspa kawsachkarqanku. Chayrayku Josiasqa kamachisninwan llaqtamanta chay llulla yupaychayta chinkachirqa. Chay ruwayqa llasa karqa, achkha runa lantista yupaychasqankurayku. Chaywanpis rikunkijina, Josiasqa kamachisninwan lantista tʼunachkan.
Chaymanta, Josías kimsa kamachisninman Diospa wasinta allinchanankupaq kamachirqa. Llaqtataq qullqita churarqa Diospa wasinta llamkʼaqkunapaq. Diospa wasinta llamkʼachkaptinku, kuraq kaq sacerdorte Hilcías juk sumaq qillqata tarirqa: Leymanta librota, Jehová Moisesta qillqichisqanta, mayqinchus may unayña chinkasqa kachkarqa.
Kay librota Josiasman apaptinku, payqa ñawiripunankuta mañarqa. Josiasqa uyarisqanmanjina llaqta Diospa kamachisqasninta mana kasuchkasqanta qhawarqa. Chayrayku, kay dibujopi rikunkijina mayta llakikuspa, pʼachanta llikʼin. Pay nirqa: ‘Jehovaqa ñuqanchikwan phiñasqa kachkan, tatasninchik mana kay libropi Dios kamachisqanta kasukusqankurayku’, nispa.
Josías kuraq kaq sacerdote Hilciasta imatachus Jehová munasqanta yachamunanpaq kacharqa. Hilciasqa Hulda profetisata tapurqa. Paytaq Jehová nisqanta Josiasman willarqa: ‘Jerusalén, tukuy suyupis, saqra ruwaykunawan jallpʼata juntʼachisqankurayku, lantista yupaychasqankurayku, jasutʼisqas kanqanku. Qam, Josías, allin imasta ruwasqaykirayku, kay jasutʼiyqa kawsayniykipi mana jamunqachu’, nispa.