Supaykunaqa runata tanqanku Diospa contranta uqharikunankupaq
Costumbresninkuman jina wakin runasqa, wañupojkuna qhawamushawasqanchejta yuyanku
Satanás, supaykuna ima, ¿imaraykutaq runata chʼawkiyanankupaq tukuy imata ruwachkanku? Paykunawan khuska Diospa contranta uqharikunanchikpaq. Paykunaqa, nisqankuta creenanchikta, Jehovap nisqanta mana kasukunanchikta, paykunata yupaychananchikta ima munanku. Kay ruwaykunaqa runa wañupuptin costumbresta ruwasqankupi rikukun.
Familianchikmanta pillapis wañupuptinqa, tukuypis waqanchik, llakikunchik ima. Jesuspis, amigon Lázaro wañupusqanmanta, “waqarikorqa” (Juan 11:35).
Pillapis wañupuptin tukuy imaymana costumbresta ruwanku, chay costumbrestataq pachantinpi mana kikintachu ruwanku. Chay costumbresmanta wakintaq mana Diospa Palabranwan churanakunchu. Chaywanpis veloriosta ruwasqanku, mana sunquchayta atinapaqjina waqasqanku, pʼampanankupaq tukuy imata ruwasqankuqa, mana Bibliap nisqamanjinachu. Tukuy kaytataq wañusqasta mana phiñachinankupaq ruwachkasqankuta yuyanku. Chaywanpis ‘wañupuqkunaqa mana imatapis yachankuchu’. Chayta ruwaqkunaqa, wakkunata Satanaspa nisqanta ruwanankupaq tanqanku (Eclesiastés 9:5).
Wakintaj costumbresninkuman jina, wañupojkuna yanapananchejta necesitasqankuta ninku
Wakin runaqa, wañupuqkuna mana paykunata ñakʼarichinanpaq, wañupuqkunata yanapananku kasqanta yuyanku. Chayraykutaq 9 días nisqata, killa misata, wata misata ima ruwanku. Jinamanta wañusqasta ‘kusichichkasqankuta’ yuyanku. Wakintaq wañupuqpaq mikhunata, ukyanata ima wakichipunku.
Kay ruwaykunaqa mana allinchu, imaraykuchus Satanaspa llulla yachachiynin. Supaykuna yachachisqankumanjina ruwayta, ¿Jehová allinpaqchu qhawan? ¡Mana! (2 Corintios 6:14-18.)
Diospa kamachisninqa, Satanaspa llulla yachachiyninman mana chhapukunkuchu. Chaymanta nisqaqa, may munakuywan wak runasta yanapanankupaq kallpachakunku. Imaraykuchus juk runa wañupuptinqa, Jehovalla chay runata yanapayta atisqanta yachanku (Job 14:14, 15).
Diosqa layqasta juchachan
Wakin runasqa, layqasniqta supaykunawan parlanku. Kaytataq aysirikunaniqta, yatirisniqta, adivinosniqta, qhipaman imachus kananmanta yachaqkunaniqta ima ruwanku. Tukuy kay ruwaykunataq supaykunamanta jamun.
Diosqa kay sajra ruwaykunata chejnikun. Payllata yupaychanata munan (Éxodo 20:5).
Bibliaqa kay millay ruwaykunata juchachan: “Amapuni ni mayqenniykichej adivino kaychejchu, nitaj qhepaman imachus kananmantapis yachaj tukunkichejchu. Ama layqapis kankichejchu, ama mayqentapis layqachinkichejchu, ama adivinosta tapukunkichejchu, amallataj aysirista tapukunkichejchu. Tata Diosqa millachikun chaykunata ruwajkunamantaqa” (Deuteronomio 18:10-12).
¿Imaraykutaq Jehová kay millay ruwaykunamanta jarkʼakunanchikta niwanchik?
Diosqa, allinninchikrayku supaykunap tuqllasninmanta jarkʼakunanchikta niwanchik. Payqa munakuyniyuq, tukuy runasmantataq dakun, yachantaq supaykunawan chhapukuqkuna ñakʼarinankuta.
Nildaqa, Brasil suyupi layqa karqa. Supaykunataq payta mayta ñakʼarichiq kanku. Pay nin: “Supaykunaqa [...] munasqankumanjina apaykachawaq kanku. Wakin kutitaq musquypijina yuyayniyta chinkachinaypaq tanqawaq kanku. Chayrayku hospitalpi internakurqani. Supaykuna anchata qhatiykachawasqankurayku unqurqani. Sanoyanaypaqtaq jampista ukyarqani, chantá machayman, cigarrota pitayman ima qukurqani. May unayta ajinata unqurqani”.
Layqas, paykunawan chhapukojkuna ima, ñakʼarinkuman. Imaraykuchus wasinkuta, kausayninkuta ima, chinkachinkuman
Chaymanta Nildaqa, Diospa yanapayninwan, Jehovamanta sutiqchaqkunap yanapayninwan ima, supaykunamanta kacharichikuyta atirqa, kunantaq allinta kawsakuchkan. Pay nin: “Tukuyta niykichik ama ni jaykʼaq supaykunawan chhapukunaykichikta”, nispa.