¿Imanakunchiktaq wañuptinchik?

Wañuyqa kawsaypa churanakuynin. Sinchi puñuyjina (Juan 11:11-14). Wañusqaqa mana uyariyta, qhawayta, rimayta, yuyaytapis atinchu (Eclesiastés 9:5, 10). Llulla religionqa, wañusqap espiritunqa, janaq pachaman utaq ukhupachaman ripun nispa yachachin, ñawpa wañuqkunawan tinkukunankupap. Manataq Biblia chaytaqa yachachinchu.

Wañusqakunaqa mana yanapawasunmanchu manataq usuchiwasunmanchu. Tukuyniqpi runaqa, qʼuwarakuta, mastʼakuta ima ruwanku wañusqata kusichichkani nispa. Kayqa mana Diosta kusichinchu, Satanaspa llullakuyninmanta lluqsisqanrayku. Wañusqakunatapis mana kusichinchu, imaraykuchus wañusqaqa mana kawsayniyuqñachu. Wañusqata mana manchachikunachu manataq yupaychanachu tiyan. Diosllata yupaychana kachkan (Mateo 4:10).

Wañusqakuna watiqmanta kawsarinqanku. Qhipaman, Jehová wañusqakunata rikchʼarichinqa tʼikapacha Jallpʼapi kawsanankupaq (Juan 5:28, 29; Hechos 24:15). Dios wañusqakunata rikchʼarichiyta atin, imaynatachus ñuqanchik juk puñuchkaqta rikchʼarichinchik kikinta (Marcos 5:22, 23, 41, 42).

Mana wañunchikchu niyqa llulla, Kuraq Supay chay llullapi runata iñichin. Satanás supayninkunawan wañusqap espiritunqa kawsachkan, chʼampaykunata ruwan, unquchin ima nispa runata umallichin. Satanasqa musquykunawan, rikhuriykunawan runaman chʼawkiyan. Chayrayku Jehovaqa, wañusqawan parlayta munaqtaqa juchachan (Deuteronomio 18:10-12).