Llulla religionta qhisachana

Satanás supaykunantin mana Diosta yupaychananchikta munankuchu. Atisqankuta ruwanku Diosmanta runata karunchanankupaq. ¿Imaynamanta? Llulla religión nisqawan (2 Corintios 11:13-15). Llulla religionqa, Bibliamanta llullata yachachiq chay. Llulla religionqa qhasi qullqijina: chiqalla kaspa jinan, qhasi mana kaqtaq. Astawanpis, achkha chʼampaykunata apamuwasunman.

Jehová chiqa kaq Diosqa, religionpa llullakuyninta mana allinpaqchu qhawan. Jesús Jallpʼapi kachkaptin, religionta umachaqkunaqa, payta wañuchiyta munarqanku. Chaykunaqa yupaychayninku chiqa kasqanta yuyaq kanku. “Uj tatayojlla kayku, chaytaj Dios” nispa niq kanku. ¿Jesús chayllatataqchu nirqa? Mana. Pay kutichirqa: “Qankunaqa tataykichej Kuraq Supaymanta jamunkichej” nispa (Juan 8:41, 44). Kunan pʼunchaw, runaqa Diosta yupaychachkasqankuta yuyanku, sutʼimanta qhawaspaqa Satanasllata supayninkunatawan yupaychachkanku (1 Corintios 10:20).

Imaynatachus mullphasqa sachʼa chʼusullata puqun, llulla religionqa saqra ruwaqkunallata puqun. Kay pachaqa runa saqrata ruwasqanrayku chʼampaykunamanta juntʼa. Khuchichakuyta, awqanakuyta, suwanakuyta, matʼinakuyta, wañuchinakuyta, warmi kallparpayta ima ruwachkanku. Achkha kayta ruwaqkunaqa religionniyuq kanku, manataq kay religionninkuqa allinta ruwanankupaq kuyurichinchu. Mana Diospa masin kayta atinkumanchu, mana saqra ruwayninta saqispaqa (Mateo 7:17, 18).

Llulla religionqa runaman lantikunamanta mañakuyta yachachin. Diosqa ama lantikunaman qunqurikunkichu niwanchik. Kayqa mana allinchu. ¿Pillapis mana jaykʼaq ñuqanchikwan parlaptin, chanta fotonchikllawan parlan, chay runata munakusunmanchu? ¿Chay runawan masichakusunmanchu? Mana ichari. Jehovaqa paywan parlananchikta munan, mana lantimanchu, mana wakʼamanchu, manataq mana kawsaq imamanpis, parlananchikta munanchu (Éxodo 20:4, 5).

Llulla religionqa maqanakuy kaptin runata wañuchiyta atinchik nispa yachachin. Jesús nirqa, Diospa masinkuna puraqmanta munanakunankuta. Munasqa runataqa mana wañuchisunmanchu (Juan 13:35). Saqra runata wañuchiypis mana allillantaqchu. Jesuspa awqankuna payta japʼiq richkaptinku, yachaqinkuna payrayku maqanakunankuta mana saqirqachu (Mateo 26:51, 52).

Llulla religionqa, saqra runa nina lawraypi qʼulakunankuta yachachin. Bibliaqa jucharayku wañusqanchikta yachachin (Romanos 6:23). Jehovaqa munakuq Dios. ¿Munakuyniyuq Diosqa, runata wiñaypaq ñakʼarichinmanchu? Mana ichari. Paraisopiqa juk religionlla kanqa, mayqintachus Jehová allinpaq qhawan chay (Apocalipsis 15:4). Tukuy religión llulla patapi sayaqkuna chinkanqanku.