Bibliamanta yachakuyta munaqkunap tapuykunasninku
Dios munakuwaptinchik, ¿imaraykutaq ñakʼarinanchikta saqin?
DIOS ñakʼariy kananta saqiptinpis, may chhika runas saqra ruwaykunata ruwanku. Sutʼinchanapaq, runasqa, maqanakuykunata qallarichinku, chaypitaq wawasta wañuchinku, chantá Jallpʼata chʼichichanku, yarqhaykunatapis rikhurichinku. May chhika runas cigarrota pitasqankurayku cancerwan unqunku, wakinkunataq khuchichakusqankurayku wak unquykunata tarikunku, wakkunataq, alcoholman qukusqankurayku kʼiwichamanta unqunku. Paykunaqa, kay saqra ruwaykuna chinkananta mana munankuchu, manaqa ruwasqankuwan imachus ñakʼarichisqan chinkananta munanku. Ruwasqankurayku ñakʼarisqankuta rikuspataq, Diosta juchachanku, phiñakuspataq ninku: “¿Imaraykutaq kay ñakʼariy ñuqapi kachkan?”, nispa. Proverbios 19:3, ninjina, “runaj wampu kaynenqa ñanninta qʼewin; chaywampis Tata Diosta juchachaspa, sonqompi mayta phiñakun”. Dios saqrata ruwanankuta manaña saqiptintaqrí, Diospa contranta rimanqanku, ni imata ruwaqta saqisqantataq ninqanku.
Jehovaqa, ñakʼariy kananta saqin, Kuraq Supay Satanaspa uqharikuyninman kutichinanpaq. Satanasqa, runa saqra ruwayman tanqasqa kaptin, mana Diosman juntʼa sunqu kananta nirqa (Job 1:6-12; 2:1-10). Chaywanpis, Jehovaqa, payta kawsaqta saqichkan, chay nisqan chiqachus manachus kasqanta sutʼinchananpaq (Éxodo 9:16). Kuraq Supaytaq, nisqan chiqa kasqanta rikuchinanpaq, runasta ñakʼarichichkallanpuni (Apocalipsis 12:12). Chiqa cristianostaq, Jobjina, Jesusjina ima, Diosman juntʼa sunqullapuni kanku (Job 31:6; Mateo 4:1-11; 1 Pedro 1:6, 7).
Jallpʼa juk paraisoman tukunanta, chaypi wiñay kawsay kananta ima, creeyta munayman, chaywanpis, ¿manachu chayqa nisqalla?
Bibliamanjinaqa, mana. Ichá wakin runaspaqqa, may chhika watas ñakʼariy kasqanrayku Jallpʼa paraisoman tukunanqa, juk nisqajinalla kanman. Chaywanpis, Jehová Jallpʼata ruwarqa, paytaq ñawpa qhariwarmita Jallpʼata chiqan runaswan juntʼachinankuta, juk kʼacha huertatajina japʼinankuta ima, kamachirqa, chantapis sachʼasta, uywasta ima, qhawananku karqa (12, 17 paginasta qhawariy). Chayrayku, Jallpʼa paraisoman tukunanqa creenapaqjina, ñakʼariy wiñaypaq kananmá mana creenapaqjinachu. Jallpʼaqa, juk paraisoman tukunqapuni.
Wakinqa, Bibliapi llulla cuentoslla tiyan nitaq ciencia nisqanmanjinachu kachkan ninku, ¿imaynatá chay nisqankuman kutichiyman?
Bibliap nisqanpi creeyqa, mana jinallamantachu rikhurin, imaraykuchus “uyarisqannejta runaman chay creeyqa jamun”. Bibliata ukhunchaptinchikqa, yachachiyninta rikusunchik, iñiyninchiktaq wiñanqa (Romanos 10:17; Hebreos 11:1).
Biblia runap kawsayninmanta chiqata parlasqanqa, runas rumispi qillqasqasta tarisqankuwan sutʼinchakun. Chantapis, cienciap nisqanqa, Bibliap nisqanwan kikillantaq. Imaraykuchus, niraq científicos sutʼinchachkaptinku, Bibliaqa, imaynachus Jallpʼanchik wakichisqa kasqanta, muyu kasqanta, ni ima japʼichkasqanta ima, ñawpaqmantaña sutʼincharqa, jinallataq wakin pʼisqus maymanchus rinankuta sumaqta yachasqankutapis (Génesis, 1 tʼaqa; Isaías 40:22, Quechua de Cuzce; Job 26:7; Jeremías 8:7).
Bibliap profeciasnin juntʼakusqanrayku, Diospa yuyaychasqan kasqanta yachanchik. Profeta Danielqa, kamachiqkuna rikhurinankumantataq chinkanankumantataq parlarqa, chantapis Mesías maykʼaqchus jamunanta, wañunanta ima, willarqa (Daniel, 2, 8; 9:24-27 tʼaqas). Kay pʼunchaykunapi, wak profecías juntʼakuchkasqanqa, tukukuy ‘pʼunchaykunapi’ kachkasqanchikta rikuchiwanchik (2 Timoteo 3:1-5; Mateo, 24 tʼaqa). Runarí, imachus aswan qhipaman kananta mana yachanchu (Isaías 41:23). Astawan yachakuyta atinki: La Biblia... ¿la Palabra de Dios, o palabra del hombre?, ¿Existe un Creador que se interese por nosotros?, nisqa librospi, chaykunataqa Jehovamanta sutʼinchaqkuna urqhunku.
Bibliamanta tapuykuna kaptin, ¿imatá ruwayman?
Bibliata ukhunchay, yachachisqanpi tʼukuriy, Diospa espíritu santontataq mañakuy (Proverbios 15:28; Lucas 11:9-13). Biblia nin: “Sichus mayqellampis qankunamanta pisi yachayniyoj kanman chayqa, Diosmanta mañakuchun. Diostaj chay yachayta payman qonqa, imaraykuchus Diosqa tukuyman qon mana michʼakuspa, chay mañakusqanmanta mana rimaspalla” (Santiago 1:5). Chantapis, Bibliata entiendenaykipaq, Bibliamanta publicacioneswan, wak runaswan ima, yanapachikuy. Imaynatachus, juk etíope Felipewan yanapachikurqa ajinata (Hechos 8:26-35). Jehovamanta sutʼinchaqkunaqa, runap wasinpipis Bibliamanta yachachillankutaq. Munaspaqa, maykʼaqllapis ajinata yachachisunankuta niwaq.
¿Imaraykutaq achkha runas Jehovamanta sutʼinchaqkunawan churanakunku, manataq paykunawan Bibliamanta yachakunayta munankuchu?
Jesuspa willasqanmanpis achkha runas churanakurqanku, yachachisqasninpaqpis kikillantaq kanan karqa. Juk kutiqa, Jesuspa yachachiyninmanta mayta tʼukurqanku, churanakuq runastaqrí, jinata nirqanku: “Qankunapis chay runaj chʼawkiyasqallantajchu kankichej? Mayqentaj kamachejkunamanta, chayri fariseosmanta paypi creenkuri?”, nispa (Juan 7:46-48; 15:20). Bibliamanta Jehovamanta sutʼinchaqkunawan mana yachakunaykita nisuqkunaqa, mana allintachu paykunata riqsinku chayri wak religionesmanta uyarinaykita mana munankuchu. Chaywanpis, Bibliamanjinachus manachus yachachisqankuta yachanaykipaqqa, paykunawan Bibliamanta yachakuy (Mateo 7:17-20).
¿Imaraykutaq Jehovamanta sutʼinchaqkuna, wak religionniyuq kaqkunamanpis, Bibliamanta willanku?
Imaraykuchus, Jesuspa ruwasqanta ruwayta munanku. Payqa, judiosman willarqa, paykuna religionniyuqña, Diospa Palabranmanta karunchasqaña ima, kaptinkupis (Mateo 15:1-9). Ima suyupipis runaqa, religionniyuqpuni, Jesuspi creechunkupis manapis. Chaywanpis, runap creesqanqa, Bibliamanjinapuni kanan tiyan. Chayrayku, Jehovamanta sutʼinchaqkunaqa, runa masinkuta munakusqankurayku ajinata yanapanku.
Jehovamanta sutʼinchaqkuna, ¿creenkuchu religionninkulla chiqa kasqanta?
Religionninta allinpaq qhawaq runaqa, chay religionnin chiqa kasqanta creenan tiyan. Mana jina kaptinqa, nichá chay religionpa nisqanta ruwanmanchu. Bibliaqa, jinata cristianosman yuyaychan: “Tukuy imata allinta reparaychej yachanaykichejpaj allinchus manachus kasqanta, allin kajtataj japʼikuychej” (1 Tesalonicenses 5:21). Chayrayku, sapa runap creesqan Bibliap nisqanmanjina kanan tiyan, imaraykuchus Efesios 4:5 nisqanmanjinaqa, “tiyan uj Señorlla uj creeylla, uj bautismolla” nisunman, juk chiqa religionlla kasqanta. Chaywanpis, kunan tiempopiqa, tukuy religiones allin kasqanta ninku, Jesustaqrí, ajinata nirqa: “Punkoqa kʼullkumin, kʼullkullataj kawsayman pusaj ñampis. Chayta tarejkunaqa pisi kanku”. Jehovamanta sutʼinchaqkunaqa, chay kʼullku ñanta tarisqankurayku, religionninku chiqa kasqanta creenku (Mateo 7:14).
¿Jehovamanta sutʼinchaqkunallachu salvakunqanku?
Mana. Imaraykuchus achkha runas, niraq Jehovamanta sutʼinchaq kachkaspa wañunku, paykunataq kawsarimuspa wiñay kawsayta japʼinankupaq, Bibliamanta yachakuyta atinqanku. Kunan tiempopi runaspis, manaraq “manchay ñakʼariy” chayamuchkaptin, chiqa kaqta akllaspa salvakuyta atinkuman. Chantapis Jesús, runa masinchikta mana juzgananchikta nirqa, imaraykuchus Dioslla, runap sunqunta riqsiyta atin. Payqa, imaynachus kasqanchikta yachan, khuyakuywantaq juzgawanchik. Chantapis, Jesusta juzgananpaq kamachin, mana ñuqanchiktachu (Mateo 7:1-5; 24:21; 25:31).
Jehovamanta sutʼinchaqkunap tantakuyninkuman riptiy, ¿qullqita qunaychu kanqa?
Apóstol Pablo qullqita quymanta jinata nirqa: “Sapa uj churachun sonqompi yuyasqanman jina, mana llakikuspa, nitaj kamachisqa jinachu, imaraykuchus Diosqa munakun pichus kusiywan qojta” (2 Corintios 9:7). Chayrayku, Jehovamanta sutʼinchaqkunaqa, Tantakunapaq Wasispi, jatun tantakuykunapi ima, runamanta mana qullqita mañankuchu. Chay lugarespiqa, qullqita churayta munaqkunapaq, qullqita churanapaq cajas tiyan. Chantapis pikunachus, machkhatachus churasqankupis, mana yachakunchu, manaqa munasqankumanjina churanku. Chaytataq Jesús, Jerusalén templopi ofrendata churanamanta parlaspa yachachirqa. Payqa, machkhatachus churana kasqanta nisqamantaqa, tukuy sunquwan churay aswan allin kasqanta nirqa (Lucas 21:1-4).
Jehovamanta sutʼinchaqman tukuptiy, ¿paykunajinachu willamunay tiyan?
Diospa Reinon Jallpʼata paraisoman tukuchinanta yachaptiyki, chay yachasqayki wakkunaman willanaykipaq tanqasunqa (Hechos 5:41, 42).
Chantapis, Diospa Reinonmanta willaptinchikqa, Jesuspa yachachisqasnin kasqanchikta rikuchisun. Paymanta Biblia nin: “Cheqanta willaj cheqa testigo”, nispa. Jesustaq, “Janaj pacha reinoqa qayllaykamunña” nispa willarqa. Yachachisqasninmanpis, kikinta ruwanankuta nirqa (Apocalipsis 3:14; Mateo 4:17; 10:7). Aswan qhipamantaq, jinata kamachirqa: “Rispa, tukuy laya runasta yachachisqasniyman tukuchimuychej, [...] yachachimuychej” ima. Manaraq kay saqra pacha tukukuchkaptintaq, tukuy runas yachanankupaq, “Janaj pacha reinomanta evangelio tukuynejpi willasqa” kanan karqa (Mateo 24:14; 28:19, 20).
¿Imaynasmantá kay allin willaykunata willasunman? Amigoswan chayri riqsisqaswan parlachkaspa, Bibliamanta willasunman. Wakinkunaqa, cartaniqta, telefononiqta ima, willanku. Wakintaq, riqsisqasninkuman correoniqta Bibliamanta publicacionesta apachinku. Astawanpis, Jehovamanta sutʼinchaqkunaqa, tukuyman yachachiyta munasqankurayku wasimanta wasi willanku.
Bibliapi kay waqyariy tarikun: “Espirituwan, noviawan ninku: Jamuy, nispa. Chayta uyarejpis nillachuntaj: Jamuy, nispa. Chʼakichikojqa jamuchun, munajtaj, kawsay yakumanta qhasilla ujyachun” (Apocalipsis 22:17). Jallpʼapi paraíso, sumaq bendiciones ima kanamanta wakkunaman sunqu kʼajaywan willanapaqqa, sapa runap sunqunmanta lluqsinan tiyan.
Jehovamanta sutʼinchaqkunap creesqankumanta, ichá achkha tapuykunasraq kapusunki. Kay folletoniqtataq, ichá mana tukuy tapuykunasniykimanchu kutichikun, imaraykuchus wakinpaqqa, aswan tiempo necesitakun. Chayrayku, Jehovamanta sutʼinchaqkunawan astawan parlariy, Tantakunankupaq Wasinkupi chayri wasiykiman jamuptinku. Jehovamanta sutʼinchaqkunamanta, astawan tapuykunasniyki kaptinqa, kay urapi rikhuriq direccionman qillqayta atinki.