¿Pitaj Jesucristo?

1. ¿Maymantá Jesús jamorqa?

Jesusqa niraj jallpʼaman jamushaspa, cielopi uj ángel karqa (Juan 8:23). Paytataj ñaupajta Dios ruwarqa. Tukuy imataj, paynejta ruwasqa karqa. Jesusllata Diosninchej ni pejpa yanapayninwan ruwasqanrayku, “kʼata” Wawan nispa sutichakun (Juan 1:14). Jesustaqa Tatanpa sutinpi parlasqanrayku, ‘Palabra’ nispa sutichakullantaj. Proverbios 8:22, 23, 30; Colosenses 1:15, 16 leey.

2. ¿Imapajtaj Jesús kay jallpʼaman jamorqa?

Jesustaqa Dios kachamorqa. Kay jallpʼapi nacekunanpajtaj, Jesuspa kausayninta uj doncellaj wijsanman churarqa. Chay doncellataj María karqa. Jesuspa tatanqa mana runachu karqa (Lucas 1:30-35). Jesusqa kay jallpʼaman jamorqa Diosmanta yachachinawanchejpaj, kausayninta noqanchejrayku qonanpaj ima. Chantapis payqa yachachiwarqanchej ñakʼariypi kaspapis Diosta kasukuyta atikusqanta. Mateo 20:28 leey.

3. ¿Imamantá kacharichisqa kayta necesitarqanchej?

Ñaupa tatanchej Adanqa wiñaypaj kausakuyta aterqa. Jinapis Diosta mana kasukusqanrayku wañorqa (Génesis 2:16, 17; 5:5). Ajinamanta payqa juchaman wañuymanwan entregaykuwarqanchej. Chaymanta kacharichikunapajtaj uj precio pagakunan karqa, imaynatachus wisqʼasqa runata kacharichinapaj pagakun, ajinata (Éxodo 21:29, 30). Diosqa mana jaykʼajpis munarqachu viejoyananchejta, wañunanchejta ima. Jinapis tukuy juchasapa runas kanchej Adannejta ‘jucha kay mundoman yaykumusqanrayku’. Chayrayku tukuy, kacharichisqa kayta necesitanchej. Romanos 5:12; 6:23 leey.

¿Pitaj kacharichiwasunman? Bibliaqa nin: “Juchaj pagonqa wañuymin”, nispa. Tukuy juchasapas kasqanchejraykutaj, ni pita juchamanta kacharichiyta atisunmanchu. Salmo 49:7-9 leey.

4. ¿Imaraykutaj Jesús wañorqa?

Jesusqa mana noqanchej jina juchasapa runachu karqa. Chayrayku payqa runasta salvananpaj kausayninta qorqa. Jehová Diosqa mayta munakuwasqanchejrayku Wawanta kachamorqa. Jesuspis Tatanta kasukuspa, kausayninta noqanchejrayku qospa ima, munakuwasqanchejta rikucherqa. Juan 3:16; Romanos 5:18, 19 leey.

Kay ¿Imapajtaj Jesús wañorqa? nisqa videota qhawariy.

5. ¿Imatá Jesús kunan ruwashan?

Jesús onqosqasta sanoyacherqa, wañusqasta kausaricherqa, ñakʼarejkunatapis yanaparqa. Ajinamanta imatachus kasukojkunapaj qhepaman ruwananta rikucherqa (Mateo 15:30, 31; Juan 5:28). Jesús wañupojtintaj, Diosqa payta kausaricherqa mana rikukoj cuerpopi. Chaymantataj cieloman Jesús kutiporqa (1 Pedro 3:18). Chantá jallpʼata kamachimunanpaj atiyta japʼinankama Diospa pañanman tiyaykorqa (Hebreos 10:12, 13). Kunanqa cielopi kamachishanña. Yachachisqasnintaj, ¡tukuynejpi chayta willashanku! Daniel 7:13, 14; Mateo 24:14 leey.

Atiyniyoj reyninchej Jesusqa, pisimantawan tukuy sajra runasta, llakiykunata ima chinkachenqa. Jesuspi creejkunaqa payta kasukusqankurayku kay jallpʼata herenciata jina japʼenqanku. Salmo 37:9-11 leey.