1 TAPUY

¿Imayna runataj kani?

¿IMARAYKUTAJ YACHANA?

Imayna runachus kasqaykita yachayqa, ima sajra ruwaymanpis tanqasqa kaspa, allin kajta ajllanaykipaj yanapasonqa.

**¿IMATÁ QAN RUWAWAJ?**

Kaypi tʼukuriy: Karenqa chunka minutosta jinallaraj uj fiestapi kashan. Jinallapitaj amiganqa qhepanmanta nin:

“¿Imatá ruwashankiri?”, nispa.

Karentaj amigan Rebecata iskay cerveza botellasta japʼishajta rikun. Rebecaqa Karenman ujnin cerveza botellata jaywayta munan, nintaj: “Qanqa niña wawachu kanki kusirikunaykipaj, tomayta atinkiña”, nispa.

Karenqa wawallaraj kasqanrayku machachej ujyanasta mana tomayta munanchu. Nitaj amigan paywan phiñakunanta munanchu. Imaraykuchus amiganqa paywan may kʼacha. Chayrayku Karenqa ajinata nikun: “Rebeca cervezata tomashan chayqa allillanchá, chantapis cervezalla manataj drogasta tomay jinachu”, nispa.

Karen kawaj chay, ¿imatá ruwawaj?

TUMPATA TʼUKURIY

Ajinapi rikukuspa allinta ajllanaykipajqa imayna runachus kasqaykita sumajta yachanayki tiyan. Chaytaj niyta munan, ima kʼacha kaykunasniyojchus kasqaykita, imapichus creesqaykita ima. Imayna runachus kasqaykita sumajta yachanki chayqa, kausayniykipi allin yuyaywan imatapis ajllanki, manataj saqenkichu wajkuna imatachus ruwanaykita nisunankuta (1 Corintios 9:26, 27).

Sinchʼita sayanallaykipajpuneqa kay tapuykunapi tʼukuriy yanapasonqa.

1. ¿IMASTÁ ALLINTA RUWANI?

Imatachus allinta ruwasqaykita yachasqayki, kʼacha kaykunasniyki ima, sinchʼita sayanaykipaj yanapasonqa.

BIBLIAPI QHAWARINA: Apóstol Pablo nerqa: “Mana allin parlayniyoj kani chaypis, yachaypeqa allin yachayniyoj kani”, nispa (2 Corintios 11:6). Pabloqa Diospa Palabran imatachus nisqanta sumajta yachasqanrayku sinchʼita sayarqa, wajkuna paymanta sajrata parlajtinkupis. Manataj wajkuna paypaj sajrata parlasqanku iskayrayacherqachu (2 Corintios 10:10; 11:5).

¿IMATÁ QANMANTA NIWAJ? Kaypi imatachus ruwayta atisqaykita qhelqay.

Kaypi imayna runachus kasqaykita qhelqay, (sutʼinchanapaj, kʼacha kani, qorikuyta yachani, nisqayta juntʼani, maymanpis horanpi chayani).

2. ¿IMASPITAJ URMANAYPAJ JINA KANI?

Imaynatachus uj waskha thantaña kaspa ñañu kajninmanta pʼitikun, ajinallatataj imapipis urmanaykipaj jina kasqaykeqa, niña allinpajchu qhawachisunkiman.

BIBLIAPI QHAWARINA: Pabloqa imaspichus urmananpaj jina kasqanta allinta reparakorqa. Pay nerqa: “Sonqoypeqa Diospa leynimpi kusikuni. Chantá waj leyta ukhuypi rikuni, chaytaj sonqoypa contrampi kashan; presochasqata jucha ruwayman pusawan, mayqenchus noqapi kashan, chayman”, nispa (Romanos 7:22, 23).

¿IMATÁ QANMANTA NIWAJ? ¿Imaspitaj sinchʼita sayanayki tiyan?

3. ¿IMASTÁ RUWAYTA MUNANI?

¿Uj automan wicharispa, autoyojta niwajchu callesta muyumunanta, gasolinan tukukunankama? Chaytaqa nichá ni jaykʼaj niwajchu, ¿icharí? Chantapis ashkhata pagachikusunkiman.

Kaymanta yachakunchej, imatachus ruwayta munasqanchejta yachayqa, kausayninchejpi imaynatachus, imatachus ruwanapaj yanapawasqanchejta.

BIBLIAPI QHAWARINA: Pablo nerqa: “Noqapis tʼijujkuna jina, cheqanta rishani maymanchus chayanayman”, nispa (1 Corintios 9:26). Pabloqa imatachus kausayninpi ruwananta allinta yacharqa, chayman jinataj kausakorqa (Filipenses 3:12-14).

¿IMATÁ QANMANTA NIWAJ? Qhelqay ima kinsa imastachus kay watapi ruwayta munasqaykita.

4. ¿IMAPITAJ CREENI?

Sumaj saphichasqa sachʼataqa may sinchʼi wayrapis mana urmachinchu — Ima kʼacha kaykunasniyojchus kasqaykita, imapichus creesqaykitapis sumajta yachanki chayqa, uj sumaj saphiyoj sachʼa jina kanki, may sinchʼi wayrapis mana urmachisonqachu.

Imapichus creesqaykita mana sumajta yachaspaqa iskayrayayta qallarinki. Uj camaleonqa qayllanpi kaj coloresman tukun, ajinallatataj qanpis amigosniyki jina ruwayta qallariwaj. Chayta ruwajtaj imatachus ruwayta munasqanta mana yachanchu.

Imatachus ruwanaykita yachaspaqa, imayna runachus kasqaykita rikuchinki, nitaj wajkuna nisusqankuman jinachu ruwanki.

BIBLIAPI QHAWARINA: Profeta Danielqa ichapis jovenllaraj karqa tatasninmanta tʼaqashajtinku. Jinapis “sonqompi nerqa” Jehovaj kamachisqasninta kasukunantapuni, karupi kaspapis (Daniel 1:8). Chayrayku imatachus ruwayta munasqanmanta mana iskayrayarqachu. Danielqa kausakorqa imatachus ruwananta nisqanman jina.

¿IMATÁ QANMANTA NIWAJ? ¿Imapitaj creenki? Sutʼinchanapaj: ¿Diospi creenkichu? ¿Imaraykú chayta ninki? ¿Imaraykutaj Dios kasqantapuni niwaj?

¿Creenkichu Diospa kamachiykunasnin allinniykipaj kasqanta? ¿Imaraykú chayta ninki?

¿Imamantaj rijchʼakuyta munawaj? ¿Wayrawan apaykachachikoj laqhemanchu chayri may sinchʼi wayrata aguantaj sumaj saphichasqa sachʼamanchu? Kallpachakuy sumaj imasta kausayniykipi ruwanaykipaj, chayta ruwanki chayqa sumaj saphiyoj sachʼa jina kanki. Chaytaj, ¿imayna runataj kani?, nisqa tapuyman kutichinaykipaj yanapasonqa.