Jehová Dios Samuelman parlan

Kuraj kaj sacerdote Eliqa iskay wawasniyoj karqa. Sutisninkutaj karqa Hofní, Finehás ima. Paykunaqa Diosta yupaychana toldopi sacerdotes karqanku. Jinapis Jehová Diospa leyesninta mana kasojchu kanku, runastataj kʼumuykachachej kanku. Israelitas Jehová Diosman jaywanasta apajtinku, paykunaqa aswan sumaj aychasta japʼikapoj kanku. Elitaj chayta qhawallarqa. Jehová Diostajrí chayta mana allinpajchu qhawarqa.

Samuelqa wawallaraj karqa, manataj Hofní, Finehás jinachu ruwarqa. Chayrayku Jehová Diosqa payta allinpaj qhawarqa. Uj chʼisi, Diosqa payta wajyarqa “Samuel” nispa. Paytaj chay rato Eliman correspa nerqa: “Kaypi kashani”, nispa. Elitaj nerqa: “Mana wajyamorqaykichu, riy puñukanpullay”, nispa. Samueltaj puñoj riporqa. Chantá watejmanta wajyasqanta uyarillarqataj. Kinsa kutitaña wajyasqanta uyarejtin, Eliqa cuentata qokorqa Jehová Dios wajyashasqanmanta. Chayrayku nerqa: “Ujtawan wajyamusonqa chayqa, ninki: ‘Parlallay Jehová Diosníy, kay kamachiykeqa uyarishasunki’, nispa”.

Samuel puñoj ripojtintaj, Diosqa wajyarqa: “Samuel, Samuel”, nispa. Samueltaj nerqa: “Parlallay, kay kamachiykeqa uyarishasunki”, nispa. Jehová Diostaj nerqa: “Eliman niy, paytawan familiantawan castiganayta. Payqa yachan wawasnin mana allintachu toldoypi ruwashasqankuta, nitaj kʼaminchu”, nispa. Qʼayantin paqarin, Samuelqa sapa día jina Diosta yupaychana toldoj punkusninta kicharerqa. Manchachikusharqa Diospa nisqanta Eliman willayta. Elitajrí payta wajyaspa, nerqa: “Wawáy, ¿imatataj Dios nisunkiri? Ama jina kaspa, ni imata pakaspa willarillaway”, nispa. Samueltaj tukuyninta willarqa.

Samuel jovenyasqanman jina, Jehová Diosqa payta yanapallarqapuni. Tukuynin israelitastaj yacharqanku Jehová Dios Samuelta ajllasqanta profeta kananpaj, juez kananpajtaj.