Jehová Dios Sansonman kallpata qon

Ashkha israelitasqa, watejmanta santosta yupaychallarqankutaj. Chayrayku Jehová Diosqa paykunata filisteosman jaywaykorqa. Jinapis wakin israelitasqa Jehová Diosta munakullarqankupuni. Paykunamanta ujnintaj Manóah karqa. Paywan warminwanqa mana wawasniyojchu karqanku. Uj kutitaj, Diosqa angelninta Manoahj warminman kacharqa. Chay angelqa nerqa: “Qhari wawayki tiyapusonqa. Paymin israelitasta filisteosmanta kacharichenqa. Payqa nazareo kanqa”, nispa. Nazareosqa Diospaj tʼaqasqa runas karqanku, nitaj chujchankuta kʼutuchikojchu kanku.

Tiemponmanqa Manoahj wawan nacekorqa, sutintaj karqa Sansón. Pay wiñarqojtin Jehová Diosqa kallpata qorqa. Chayrayku payqa makillanwan uj leonta wañurpachiyta atej. Uj kutitaj, sapitallan 30 filisteosta wañucherqa. Chayrayku filisteosqa Sansonta mayta chejnikorqanku, wañuchiytataj munarqanku. Uj chʼiseqa, Sansón Gaza llajtapi puñoj qhepakorqa. Enemigosnintaj llajta punkupi suyaykorqanku qʼayantin paqarin wañuchinankupaj. Sansontaj chaupi tutata jatariytawan llajtaj punkusninta sikʼirparerqa, qʼepiriykukuspataj Hebrón qayllapi kashan chay orqoman apakaporqa.

Chantá filisteosqa Sansonpa munasqan Dalilawan parlaj rerqanku, nerqankutaj: “Maymantachus Sansonpa kallpan jamusqanta willawajtiykoqa, ashkha qolqeta pagasqayku. Payta carcelman wisqʼaykuyta munayku”, nispa. Dalilaqa qolqerayku “ya” nerqapacha. Sasonqa Dalilaman mana willayta munarqachu maymantachus kallpan jamusqanta. Jinapis Dalila kutin kutita chayllatapuni tapusqanrayku uman nanarqa. Chayrayku nerqa: “Ni jaykʼaj chujchasniyta kʼutuwarqankuchu, nazareo kasqayrayku. Sichus kʼutuwankuman chayqa, kallpay chinkanman”, nispa. Sansonqa chayta willaspa mayta pantaykorqa.

Dalilaqa chayta chay rato filisteosman willarqa. Chantá Sansonta chaki moqosnin patapi puñurpacherqa, uj runawantaj chujchasninta kʼutucherqa. Chantá qhaparerqa: “Sansón, filisteos yaykuykamunku”, nispa. Sansontaj rijchʼarerqa, repararqataj manaña kallpan kasqanta. Filisteostaj Sansonta japʼispa ñawisninta orqhorarqanku, carcelmantaj wisqʼaykorqanku.

Uj kuti, ashkha filisteos tantakorqanku Dagón nisqa diosninkoj templonpi. Paykunaqa nerqanku: “Sansontaqa diosninchej jaywaykuwanchej. Orqhomuychej paymanta asikunanchejpaj”, nispa. Chantá Sansonta asipayarqanku wasej sayantasnin chaupiman sayaykuchispa. Sansontaj jatunmanta nerqa: “Jehová Diosníy, ama jina kaspa kay kutillatawanpis kallpata qoway ari”, nispa. Sansonpa chujchanqa ñapis watejmanta wiñasqaña kasharqa. Chayrayku temploj machonesninta tukuy kallpanwan tanqaspa urmaykucherqa. Tukuy chaypi kajkunataj wañorqanku, Sansonpis wañullarqataj.