Julio

Qhepa pʼunchaykunapi kausakusqanchejrayku, kausayqa may llakiy, maytataj sajrayashan (2 Tim. 3:1). Jehová Dios sumaj kausayta apamunankamataj astawanraj sajrayanqa. Chay día chayamunankamaqa Jehová Diospa yanapayninta maskʼana, ñannintataj pusachikuna. Unayña uj salmista nerqa, llakiykunapi kashaspa Jehová Diosta qhawarinapuni kasqanta yanapanawanchejpaj (Sal. 123:1-4). Pay nerqa: ‘Imaynatachus kamacheqa patronninta qhawan, ajinata noqanchejpis Tata Diosta qhawallanchejtaj noqanchejmanta khuyakunawanchejkama’, nispa. Uj kamacheqa patronninta qhawarin khuyakunanpaj, mikhunata qonanpaj, sajra imasmantataj jarkʼananpaj. Tukuy tiempotaj patronninta qhawarillanpuni imatachus munasqanta reparananpaj, chayman jina ruwananpajtaj. Noqanchejpis uj kamachi jinallataj Jehová Diosta qhawananchej tiyan, imachus munaynin kasqanta reparanapaj, chayman jinataj ruwanapaj. Imachus Diospa munaynin kasqanta reparanapajtaj, sapa día Diospa Palabranta estudiananchej tiyan. Chayta ruwajtillanchej Jehová Diosqa khuyakuwasunchej, yanapawasunchejtaj. Chayrayku ashkha problemaspi rikukuspapis, Diospa munayninta ruwanallapuni. w18.07 pág. 12 párrs. 1, 2

Runasqa yuyanku munasqankuman jina kausakuspa sumajta kausakunankuta. Chaywanpis juchamanta kacharichisqa kaspalla sumajta kausakusunman. Imajtinchus noqanchejqa, juchaj esclavon kanchej. Juchasapa runas kasqanchejraykutaj allin imasta ruwayta munaspapis, sajra imasllata ruwanchej. Chayraykutaj, llakiykunapi rikukunchej, sufrinchej, wañunchejtaj (Rom. 6:23). Chayrayku nisunman Jesús juchamanta kacharichillawajtinchej, ‘cheqamanta kacharichisqa kananchejta’, sumajtataj kausakunanchejta, imaynatachus qallariypi Adanwan Evawan sumajta kausakorqanku, ajinata (Juan 8:34). Juchamanta kacharichisqa kanapajqa, noqanchej kikinchejta chejnikuspa, Jesuspa ‘nisqasninta kasukunanchej tiyan’ (Mat. 16:24). Chaykunata ruwajtinchejtaj, Jesús nisqanman jina paraisopi cheqamanta juchamanta kacharichisqa kasunchej (Juan 8:31). Imajtinchus Jesusqa juchanchejrayku kausayninta qorqa. w18.04 pág. 7 párrs. 14-16

Jehová Diosqa kamachisninta sumajta entienden, pantasqata yuyajtinkupis. Profeta Jonasmanta parlarina. Jehovaqa Jonasta Nínive llajtaman kacharqa, chinkachisqa kanankuta willamunanpaj. Ninivitastaj sajra ruwayninkumanta pesachikorqanku, Jehovataj paykunata perdonarqa. Jinapis Jonasqa willasqan mana juntʼakusqanrayku, “mayta phiñarikorqa”. Chaywanpis Jehovaqa Jonaswan pacienciakorqa, pantasqa kasqantataj reparacherqa (Jon. 3:10–4:11). Chantaraj Jonasqa yuyayninta cambiarqa. Diostaj Jonaspa kausayninta Bibliapi qhelqacherqa, noqanchej yachakunanchejpaj (Rom. 15:4). Jehová Dios ñaupa tiempopi kamachisninta khuyakusqanqa, rikuchiwanchej noqanchejtapis khuyakunawanchejta. Jehovaqa sumajta entienden yuyayninchejta, imaynapunichus kashasqanchejtapis. Yachallantaj maykamachus aguantayta atisqanchejta. Payqa “mana saqenqachu, mana sayay atinata juchaman tanqasqa” kananchejta (1 Cor. 10:13). Chayta yachayqa mayta sonqochawanchej. w19.03 pág. 16 párrs. 6, 7

Moisespa Leyninman jinaqa kurajkuna juzgananku karqa Diospa contranpi juchallikojkunata, tukuy imaymana problemaspi rikukojkunata, wañuchejkunatapis. Wakin casosmanta parlarina. Pillatapis wañurpachej israelitataqa, mana chay ratochu wañurpachillajtaj kanku. Llajtamanta kurajkunaqa sutʼitaraj yachananku karqa imaynapichus wañuchisqanmanta. Chayta yachasparaj nej kanku wañuchichisqa kanantachus chayri manachus (Deu. 19:1-7, 11-13). Chantapis chay kurajkunaqa juzgaj kanku jallpʼasninkumanta, animalesninkumanta, herenciankumanta, waj imasmantawan problemaspi rikukojkunata. Juzgallajtaj kanku qhariwarmi ukhupi problemaspi rikukojkunatapis (Éxo. 21:35; Deu. 22:13-19). Kurajkuna cheqan kajta ruwajtinku, israelitaspis Leyta kasukojtinku, tukuypis allinpi kausakoj kanku, Jehová Diostataj jatunchaj kanku (Lev. 20:7, 8; Isa. 48:17, 18). Kaymanta yachakunchej Jehová Dios tukuy imapi allin rinawanchejta munasqanta. Munantaj wajkunapaj cheqan kajta ruwapunanchejta, munakunanchejtataj. Chantapis Jehová Diosqa yachan imastachus sapallanchejpi ruwasqanchejta, imastachus parlasqanchejtapis. w19.02 pág. 23 párrs. 16-18

Phutisqa kashaspaqa, ichá mana llampʼu sonqo kayta atillasunmanchu. Chantapis ichá wajkunata kʼumuykachachisunman chayri kʼamirpasunman. Phutisqa kashaspaqa allin kanman Jesuspi piensarinanchej. Wañuchisqa kananpaj killasllaña faltashajtin Jesusqa mayta phutikorqa. Jesusqa yacharqa wañuchinankuta, mayta ñakʼarichinankutataj (Juan 3:14, 15; Gál. 3:13). Payqa killasllaña wañuchisqa kananpaj faltashajtin nerqa: “Maytapuni llakikushani”, nispa (Luc. 12:50). Diasllaña wañuchisqa kananpaj faltashajtin nillarqataj: “Noqaqa may llakisqa kashani”, nispa. Chaywanpis Jesusqa kʼumuykukoj sonqoyoj karqa, kasukojtaj. Chaytaqa sutʼita reparasunman Diosmanta mañakusqanpi (Juan 12:27, 28). Jesusqa mana manchachikuspa enemigosninman jaywaykukorqa. Paykunataj manchayta ñakʼarichispa pʼenqayta wañucherqanku. Jesusqa phutisqa kaspapis, sufrispapis llampʼu sonqollapuni karqa, Diospa munaynintataj ruwarqa. Paymantaqa yachakusunman phutisqa kaspapis llampʼu sonqo kayta atisqanchejta (Isa. 53:10). w19.02 pág. 11 párrs. 14, 15

Ichapis tantakuykunaman mana riyta atillasunmanchu onqosqa kasqanchejrayku, manchay phutisqa kasqanchejrayku, familiaresninchej chayri autoridades churanakuwasqanchejrayku. Ajinapi rikukuspapis tantakuykunaman mana manchachikuspa rinapaj mayta kallpachakuna. Ichapis tʼukurisunman Jehová Diosta sirvisqankurayku carcelpi kashanku chay hermanospi. Paykunataqa ejemplonchejwan yanapasunman (Heb. 13:3). Llakiyniyoj kaspapis Jehová Diosta tukuy sonqo yupaychanallapuni. Imajtinchus carcelpi kaj hermanosqa chayta yachaspa mayta kallpachakonqanku, creeyninkupis astawan sinchʼiyanqa, Jehová Diostapis kasukullanqankupuni. Apóstol Pablopis Romapi presochasqa kashaspa, hermanos Diosta tukuy sonqo sirvishallasqankutapuni yachaspa mayta kallpachakorqa (Fili. 1:3-5, 12-14). Pabloqa ichá carcelmanta kacharichisqa kananpaj pisi tiempollaña faltashajtin chayri kacharichisqa kasqantawan Hebreosman cartanta qhelqarqa. Chay cartanpi Pabloqa Diosta tukuy sonqo sirvej hermanosman nerqa tantakuykunaman riyta ama saqenankuta (Heb. 10:25). w19.01 pág. 28 párr. 9

Satanasqa manchay sajra, payllapitaj yuyan, manataj Jehová Diosta kasukunchu. Munantaj noqanchejpis pay jina yuyananchejta, kananchejtataj. Chaywanpis may chhika runasta pantachishan paykunanejta pantachinawanchejpaj. Satanasqa munan mana allinta purejkunawan astawan tantakunanchejta. Chaywanpis yachanchej paykuna pierdechinawanchejta, chayri sajra imaspi yuyanapaj tanqanawanchejta (1 Cor. 15:33, sutʼinchaynin). Satanasqa kay mundoj yuyaykunasninta sonqonchejman churayta munan, manataj munanchu Jehová Diospi confiananchejta (Col. 2:8). Chayrayku payqa yuyachiyta munawanchej qhapaj kaspalla kusisqa kayta atisqanchejta. Ajinata yuyaj runastaj qhapajyanankurayku tukuy imata ruwanku. Wakenqa qolqeta mayta maskʼasqankupi onqoykunku, familiankuta saqerpanku, Diosmantapis karunchakapunku (1 Tim. 6:10). Noqanchejqa mayta kusikunchej Tatanchej Jehová qolqeta munapayaymanta jarkʼawasqanchejmanta (Ecl. 7:12; Luc. 12:15). w19.01 pág. 15 párr. 6; pág. 17 párr. 9

Niraj Jesús kay jallpʼaman jamushajtin Diospa kamachisnenqa runasta kallpachajpuni kanku. Ezequiasmanta parlarina. Payqa Diospa llajtanta, soldadosta kamachejkunatapis kallpacharqa asirios Jerusalenta thuñej muyuykushajtinku. Israelitastaj “rey Ezequiaspa parlasqasninta uyarispa”, “may kallpachasqa karqanku” (2 Cró. 32:6-8). Jobmanta parlarina. Payqa may llakiypi rikukorqa. Payta kallpacharej rejkunataj, sonqochanankumantaqa contranpi parlaspa umanta nanacherqanku. Ajinapi rikukuspapis, Jobqa paykunata yuyaycharqa, imaynatachus wajkunata sonqochanata. Job nerqa: “Noqaqa qankunata qhawarispa, kʼachamanta parlapayaykichejman; qankunaj nanayniykichejtapis thañirichiykichejman, kallpachaykichejmantaj”, nispa (Job 16:1-5). Jobtaqa Eliuwan Jehová Diosllawan kallpacharqanku (Job 33:24, 25; 36:1, 11; 42:7, 10). w18.04 pág. 16 párr. 6; pág. 17 párrs. 8, 9

Isaiasqa nerqaña imaynatachus Jehová Dios llajtanta kallpachananta. Isaías nerqa: “Tukuy Atiyniyoj Tata Diosqa jatun atiyninwan jamushan, makinwan tukuy imata kamachispa”, nispa (Isa. 40:10). Bibliapeqa maki palabra oqharikun atiymanta parlanapaj. Chayrayku Isaiaspa nisqanqa yuyarichiwanchej Jehová Dios may atiyniyoj Rey kasqanta. Jehová Diosqa ñaupa tiempopi kamachisninta jatun atiyninwan yanaparqa, jarkʼarqataj. Kay tiempopipis Jehová Diosqa paypi atienekojkunata kallpachashan, jarkʼashantaj (Deu. 1:30, 31; Isa. 43:10). Jehová Diosqa kallpata qowanchejpuni. Chaytaqa sutʼita reparanchej enemigosninchej qhatiykachawajtinchej. Wakin lugaresmanta enemigosninchejqa, tukuy imata ruwashanku manaña Diosmanta willananchejpaj chayri prohibinawanchejpaj. Qhatiykachasqa kaspapis mana anchata phutikunchejchu. Imaraykuchus Jehová Diosqa niwanchej: “Mana mayqen arma ruwasqankupis qanta chinkachisunampaj jina kanqachu”, nispa (Isa. 54:17). Chayta yachaspaqa ni imata manchachikunchejchu, astawanpis Jehová Dios yanapanawanchejpi atienekunchej. w19.01 págs. 5, 6 párrs. 12, 13

Animalesqa mana necesitankuchu Diosmanta yachakuyta. Runastajrí necesitanchej Diosmanta yachakuyta (Mat. 4:4). Diosta kasukuspaqa yuyayniyoj, yachayniyoj, kusisqastaj kasunchej. Jehová Diosqa paymanta yachakunapaj, creeyninchejtapis astawan sinchʼiyachinapaj Bibliata qowarqanchej. Chantapis ‘allin kamachi yuyayniyojnejta’ publicacionesta, videosta, grabacionesta, waj imastawan qowanchej (Mat. 24:45). Chaykunataj yanapawanchej creeypi sinchʼita sayanapaj, Diospa qayllallanpipunitaj kanapaj (Isa. 65:13, 14). Bibliata, publicacionestawan jóvenes estudiajtinkoqa, sumaj yachayniyoj kanqanku, tanteaytapis atenqanku. Ajinamantataj mana imatapis ruwarpallanqankuchu (Pro. 2:10-14). Chantapis wajkuna “mana Dios kanchu” nejtinku chayri “qhapaj kaspaqa kusisqa kanki” nejtinku mana creeykullanqankuchu. Manallataj sajra munayninkuwan atipachikonqankuchu, nitaj ima viciopipis urmanqankuchu. Chayrayku jovenesqa yachayniyoj kanankupaj, tanteayta atinankupaj ima, kallpachananku tiyan. w18.12 pág. 20 párrs. 6, 7

Jehová Diosqa profeta Isaiasnejta nerqa runas “sachʼas jina” kausanankuta. Wakin sachʼasqa may chhika watas pasajtinpis mana chʼakipunkuchu. Noqanchejpis mana onqospalla chay sachʼas jina unayta kausasunman. Profeta Isaías nisqanman jina, Paraisopi kausakoyqa may sumajpunichá kanqa. Chay kʼachitu lugarpeqa unayta, ni ima llakiyta uyarispataj kausakusunchej. Jehová Diospa nisqanqa juntʼakonqapuni. Profeta Isaiaspa nisqanqa reparachiwanchej aswan qhepaman kay Jallpʼapi uj Paraíso kananta. Reparachillawanchejtaj Diosninchej Paraisopi tukuy runasta bendecinanta. Chaypachaqa manaña kanqachu sajra runas, phiña animalespis mansoyanqanku. Ciegospis, cojospis, joqʼaraspis chayri lojtʼituspis sanoyaponqanku. Chaypi wasista ruwakuspa tiyakonqanku, tarpusqankuta cosechaspataj mikhonqanku. Chantapis runasqa sachʼasmanta nisqaqa aswan unayta kausanqanku. Reparanchej jina Bibliaqa sutʼita niwanchej aswan qhepaman kay Jallpʼapi uj paraíso kananta. Chaywanpis wakin runasqa, ichapis niwasunman Isaiaspa nisqasnin mana kay jallpʼapi uj Paraíso kananmantachu parlashasqanta. Paykunaman sutʼinchanapajqa, noqanchejraj seguros kananchej tiyan kay jallpʼapi uj Paraíso kananmanta. Seguros kanapajtaj Señorninchej Jesuspa nisqan yanapawasunchej (Luc. 23:43). w18.12 pág. 5 párrs. 13-15

Ñaupa kausayninchejpi sajra imaspi yuyaj kanchej chaypis, chayri tatasninchej jina yuyaj kanchej chaypis, Jehová Dios jina yuyayta atisunman. Jehová Dios jina yuyanapajqa, imatachus Jehová Dios ruwananchejta munasqanpi yuyananchej tiyan. Ajinamanta Jehová Dios jina yuyayta atillasunchej. Yuyayninchejta mosojyachinapajqa ‘manaña kay tiempomanta runas jinachu kausananchej’ tiyan. Chaypajqa imastachus Jehová Dios chejnikun chaykunata amaña qhawanachu, nitaj leenachu, nitaj uyarinachu. Chayta allinta entiendenapaj uj runamanta parlarina. Ichapis chay runaqa sanito kausakuyta munasqanrayku, manaña wakin mikhunasta mikhunmanchu. Chaywanpis mana allin mikhunasta mikhullanmanpuni chayqa, qhasillata sanito kananpaj kallpachakushanman. Ajinallataj noqanchejwanpis kanman. Sichus mundomanta runas jina mana allin imaspi yuyallasunpuni chayqa, qhasillata Jehová Dios jina yuyanapaj kallpachakushasunman. w18.11 pág. 21 párrs. 14, 15

Imata ruwashaspapis Bibliata kasukunapuni. Biblia niwanchej: “Cheqa kajwan chumpiwan jina matʼita chumpiykukuychej”, nispa. Unay tiempopi soldadosqa ñañu wasankuta chumpiwan matʼita chumpiykukoj kanku cheqanta sayanankupaj, sumaj jarkʼasqa kanankupajtaj. Llauqhallata chumpiykukojtinkoqa, mana cheqantachu sayaj kanku. Cheqa kajman jina kausakuy chayri Bibliaman jina kausakoyqa chumpiwan chumpiykukuy jina. Chayrayku sichus tukuy tiempo Bibliaj nisqanman jina kausakusunchej chayqa, mana sajra imaspi yuyasunchu, nitaj pantarpallasunchu. Astawanpis uj problemapi rikukuspa chayri juchaman urmanapaj jina kashaspa, Bibliaj nisqanman jina allin kajtapuni ruwasunchej. Unay tiempomanta soldadosqa, guerraman rinankupaj qhawarikojpuni kanku chumpiwan chumpiykukusqankutachus manachus. Noqanchejpis chay soldados jinallataj sapa kuti qhawarikunanchej tiyan Bibliaj nisqanman jinachus manachus kausakushasqanchejta. w18.11 pág. 12 párr. 15

Cheqa kajta yachanapaj chayri Bibliaj nisqasninta entiendenapajqa, mayta kallpachakunanchej tiyan, waj imastawan saqepunanchej tiyan. Cheqa kajta yachakoyqa “cheqa kajta rantikuy” jina. Cheqa kajta yachaspañaqa allinta qhawarikunanchej tiyan cheqa kajmanta mana kacharikunapaj. Bibliamanta yachakunapaj mana paganachu kajtinpis, mayta kallpachakunanchej tiyan Bibliamanta yachakunapaj. Proverbios 23:23 versiculopi “rantikuy” palabraqa, hebreo parlaypi niyta munan “japʼiy”. Kay iskaynin palabrastaj, reparachiwanchej imatapis japʼinapajqa, imawanpis pagana kasqanta chayri imatapis qona kasqanta. Por ejemplo, uj mercadopi ichá ninkuman platanosta gratis qoshasqankuta. Chaywanpis mana suyasunmanchu chay plátanos wasinchejpi rikhurinanta. Manaqa chay platanosta japʼinapajqa chay mercadoman rinanchej tiyan, chaymantataj wasinchejman kutipunanchej tiyan. Bibliamanta yachakunapajpis manallataj qolqeta pagananchejchu tiyan. Chaywanpis mana suyasunmanchu jinallamanta yachakunanchejta, manaqa wakin imasta ruwananchej tiyan. w18.11 pág. 4 párrs. 4, 5

Jesusqa Pedrota, Santiagota, Juantawan uj jatun orqoman pusarqa. Chaypi kashajtinkuñataj, Jesusqa paykunaj ñaupaqenkupi waj jina rijchʼayniyojman tukorqa. Uyanqa inti jina lliphipirerqa, ropantaj kʼanchay jina yurajman tukorqa. Jinallapi paykunaqa, Moisestawan Eliastawan rikorqanku. Paykunaqa Jesuswan parlasharqanku, pay wañuchisqa kananmanta, kausarichisqa kananmantawan (Luc. 9:29-32). Chantá ujllata kʼancharishaj phuyu paykunata pʼampaykorqa. Pedrowan, Santiagowan, Juanwantaj Diospa parlamusqanta uyarerqanku. Jesús uj jina rijchʼayniyojman tukusqanqa, Diospa Gobiernonpi Rey kaspaña jatunchasqa, atiyniyojtaj kananta rikucherqa. Chay kutipi imachus kasqanqa, Jesusta maytapunichá ñakʼariyta aguantananpaj kallpacharqa. Imajtinchus payqa yacharqa, mayta ñakʼarichispa wañuchinankuta. Jesús uj jina rijchʼayniyojman tukusqanqa, maytachá discipulosninpa creeyninkuta kallpacharqa. Ajinamanta paykuna jamoj pruebasta aguantanankupaj, runasman willamunankupajpis. Apóstol Pedroqa Jesuspa jatun kayninta rikusqanta mana qonqarqachu. Chayrayku 30 watasninman jina, Jesuspa jatun kayninmanta parlallarqapuni (2 Ped. 1:16-18). w19.03 pág. 10 párrs. 7, 8

Noqanchejqa mana llulla iglesiasmanta runas jinachu kanchej. Imajtinchus noqanchejqa mana llullata parlanchejchu (Zac. 8:16, 17). Trabajomanta compañerosninchejwan, amigosninchejwan, familiaresninchejwan ima mana llullakuspa parlanchej. Jóvenes, amapuni puraj uyas kaychejchu. Wakin cristiano jovenesqa, familiankuwan hermanoswan kashaspa kʼacha cristianosman rijchʼakunku. Chaywanpis escuelamanta compañerosninkuwan kashaspaqa, mundomanta runas jinallataj purinku, Internetpi redes sociales nisqapipis mana allin imasta parlanku. Chaytataj tatasninkuman, hermanosmanpis mana willankuchu. Yuyankutaj Jehová Diospis mana yachasqanta (Sal. 26:4, 5). Chaywanpis Jehová Diosqa yachan ‘simillankuwan yupaychashasqankuta, sonqonkutaj paymanta may karunchasqa kasqanta’ (Mar. 7:6). Chayrayku may allinpuni Bibliaj nisqanta kasukunanchej. Biblia nin: “Ama juchasapas imaynatachus kawsasqankuta moqʼespa qhawaychu; astawanqa Tata Diosta tukuy tiempo manchachikuy”, nispa (Pro. 23:17). w18.10 pág. 9 párrs. 14, 15

Diospa kamachisnenqa may rejsisqa kanchej purajmanta munanakusqanchejrayku (1 Juan 4:21). Wakin kutisqa hermanosninchejta munakusqanchejrayku, paykunata yanapanapaj kausayninchejta wañuy pataman churanchej. Tukuy tiempotaj hermanosninchejta munakusqanchejrayku kʼachamanta parlapayanchej, tukuy imaymanamantataj yanapanchej. Hermanosninchejwan kʼachas kaspaqa Jehová Dios jina ruwashanchej (Efe. 5:1). Señorninchej Jesusqa Tatan jinapuni ruwarqa. Jesusqa kʼachamanta, miskʼi simiwan wajkunata parlapayaj. Pay nerqa: ‘Noqaman jamuychej tukuy saykʼusqa kajkuna, llasa qʼepiyojkunapis, noqataj samarichisqaykichej. Noqaqa llampʼu sonqo, kʼumuykukoj sonqotaj kani’, nispa (Mat. 11:28, 29). Jesús jina ruwaspaqa, mana kallpayoj wajchapi yuyasunchej, Diospis allinpaj qhawawasunchej, ajinamantataj kusisqas kasunchej (Sal. 41:1). Chayrayku familia ukhupi, congregacionpi, predicacionpipis wajkunaj allinninta maskʼanallapuni. w18.09 pág. 28 párrs. 1, 2

Inundaciones, terremotos chayri ima desastrellapis kajtenqa hermanosninchejta yanapasunman. Paykunata yanapaspaqa Dioswan llankʼashanchej. Hermanosninchejtaqa ichá qolqesitunchejwan yanapasunman (Juan 13:34, 35; Hech. 11:27-30). Yanapallasunmantaj wasisninkuta llimphuchaspa, allinchaspa chayri watejmanta sayachispa. Hermananchej Gabrielamanta parlarina. Payqa Polonia suyumanta. Uj inundación kasqanraykutaj wasinta pierdesqa. Ajinata pierdespapis, mayta kusirikusqa chay lugarmanta ashkha hermanos yanapaj risqankurayku. Pay nin: “Imastachus pierdesqaymantaqa mana llakikunichu. Astawanpis kusikuni hermanos yanapawasqankumanta. Paykuna yanapawasqankuta rikuspaqa repararqani Diospa llajtanmantapuni kasqayta, Diospa llajtallanpitaj kusisqa kanayta”, nispa. May chhika hermanospis chay hermana jinallataj ninku hermanos mayta kallpachasqankuta. Chay jina llakiypi rikukoj hermanosta yanapajkunapis sonqo juntʼasqa kanku, kusisqastaj (Hech. 20:35; 2 Cor. 9:6, 7). w18.08 pág. 26 párr. 12

Sonqonchejta waqaychananchejpajqa imaschus Satanaspa trampasnin kasqanta reparayta yachananchej tiyan. Kayta entiendenapaj unay tiempo llajtata qhawaj soldadosmanta parlarina. Chay soldadosqa perqa patapi sayaj kanku, enemigosninkuta qayllaykamojta rikuspataj chay rato tukuyman willachej kanku. Noqanchejpis chay llajtata qhawaj soldados jina, imaspichus Satanás urmachiyta munawasqanchejta reparayta yachananchej tiyan. Ñaupa tiempomanta llajtata qhawaj soldadoqa, punkuta qhawaj soldadowan yanapanakoj kanku (2 Sam. 18:24-26). Enemigosninku qayllaykamojtinkoqa iskayninku asegurakoj kanku llajta punku wisqʼasqa kananmanta (Neh. 7:1-3). Diospa Palabranta sonqonchejman churasunchej chayqa, llajtata qhawaj soldados jina kasunchej. Sonqonchejpi sajra imaspi yuyayta qallarishajtinchej chayri sajra imasta munapayayta qallarishajtinchej reparasunchejpacha Satanás chay imasman tanqashawasqanchejta. Ajinata reparakuspaqa tukuy atisqanchejta ruwananchej tiyan mana chay imaspi yuyanapaj, ajinamanta Satanás sonqonchejman mana yaykunanpaj punkutapis wisqʼaykushasunman jina kanqa. w19.01 pág. 17 párrs. 10, 11

Ancianosqa mana culturankuman jinallachu, nitaj yuyasqankuman jinallachu ninanku tiyan uj joven uj cargota japʼinanpaj wakichisqañachus manachus kasqanta, manaqa Bibliaj nisqanman jina (2 Tim. 3:16, 17). Ancianos Bibliaj nisqasninta mana kasukojtinkoqa, anciano kananpaj chayri siervo ministerial kananpaj wakichisqa hermanota jarkʼashankuman congregacionpi ñauparinanta. Kunanqa wakin ancianosmanta parlarina. Congregacionninkupeqa uj siervo ministerial ruwanasninta sumajta juntʼaj kasqa. Chayrayku chay ancianosqa, nisqanku Bibliaj nisqanman jina chay siervo ministerial anciano kananpaj wakichisqaña kasqanta. Chaywanpis paykunamanta wakin ancianosqa, nisqanku chay siervo ministerial wawa uyallaraj kasqanta. Chayraykutaj mana saqesqankuchu anciano jina churasqa kananta. Yachakusqanman jina mundontinmanta may chhika lugarespi wakin ancianospis, yuyanku uj hermano anciano kananpaj mana wawa uyachu kanan kasqanta. Chay jinata yuyanamantaqa aswan allin Bibliaj nisqanman jina ruwananchej. Imajtinchus ajinallamanta Jesusta kasukusunchej, runastataj mana rijchʼayninkuman jinallachu juzgasunchej (Juan 7:24). w18.08 pág. 12 párrs. 16, 17

Ima noticiatapis mana allinta yachaspalla apachispaqa, hermanosninchejta tʼaqanachisunman. Wakin suyuspi autoridadesqa mana predicajta, nitaj reunionesta ruwajta saqewanchejchu. Chay suyusmanta runasqa churanakuwasqanchejrayku llullasta parlaspa manchachiwasunman, wakin hermanospi mana confianapajtaj tanqawasunman. Unay tiempopi imachus Unión Sovieticapi pasasqanmanta parlarina. Chay suyumanta policiasqa, llullasta parlaspa nisqanku cargoyoj hermanos Diospa llajtanta wasanchasqankuta. Wakin hermanostaj chayta creespa Diospa llajtanmanta karunchakusqanku. Wakin hermanosllataj kutinpusqanku, imajtinchus chay ujkunaj creeyninkoqa chiriyapusqa (1 Tim. 1:19). Chayrayku hermanosninchejmanta sajrata parlaj noticiasta ama creenachu, nitaj wajkunamanpis apachinachu. Imajtinchus wajkunaj creeyninku chinkapunman. Astawanpis yachananchejraj tiyan chay noticia ciertochus manachus kasqanta. w18.08 pág. 4 párr. 8

Unayqa griego qhelqasqaspi mana chaykama comasta chayri puntosta churakojchu. Chayrayku wakin runas ninku: ¿Jesús nisharqachu “cheqatapuni niyki: Kunanpacha noqawan paraisopi kanki” nispa? Chayrí, ¿nisharqachu “cheqatapuni kunan niyki: Noqawan paraisopi kanki” nispa? Jesusqa niraj wañuchisqa kashaspa jinata nerqa: ‘Noqaqa jallpʼaj sonqonpi kinsa pʼunchayta, kinsa tutatawan kasaj’, nispa (Mat. 12:40; 16:21; 17:22, 23; Mar. 10:34; Hech. 10:39, 40). Chayrayku nisunman Jesusqa mana paraisomanchu risqanta suwa runawan khuska wañuchisqa kasqantawan. Manaqa Biblia niwanchej Jesús kinsa diata “Sepulturapi” kasqanta Dios kausarichimunankama (Hech. 2:31, 32). Chay suwa runaqa, mana yacharqachu Señorninchej Jesús apostolesninwan cielomantapacha gobernamunankupaj uj tratota ruwasqanta (Luc. 22:29). Chantapis chay runaqa mana bautizasqachu karqa (Juan 3:3-6, 12). Chayrayku nisunman Jesús chay suwa runawan Paraisomanta parlashaspa, kay jallpʼapi uj Paraíso kananmanta parlashasqanta. Chaytaj aswan qhepaman juntʼakonqa. w18.12 pág. 6 párrs. 17, 18, 20, 21

Israelitasqa uj waka uña lantita yupaycharqanku. Jinamantataj israelitasqa Jehová Diospa leyninta pʼakerqanku. Chaywanpis israelitasqa, pantarqanku chay waka uña lantita yupaychaspa Jehová Diosllatapuni yupaychashasqankuta yuyaspa. Aaronpis chay waka uña lantita yupaychanankupaj nerqa: ‘Qʼaya ruwasunchej Jehová Diospaj uj fiestata’, nispa. Chayta rikuspataj Jehová Diosqa Moisesman nerqa: “Egiptomanta orqhomusqayki runasqa millayta juchallikunku. Paykunaqa usqhayllata tʼaqarpayakunku, ima ñantachus noqa nerqani rinankuta, chaymanta”, nispa. Jehová Diosqa mayta phiñakusqanrayku tukuy israelitasta tukurpachiyta munarqa (Éxo. 32:5-10). Chaywanpis Jehová Diosqa ‘phiñakuyninta tiyaykuchikorqa, manañataj israelitasta chinkachiyta yuyarqachu’ (Éxo. 32:14). Aaronpis waka uña lantita ruwasqanmanta pesachikuspa, levitaswan khuska Jehová Diospa partenmanta churakorqa. Chay waka uña lantita yupaychajkunamanta may chhika israelitas wañorqanku. Jehová Diospa ladonmanta churakojkunataj, mana wañorqankuchu. Diostaj paykunata bendecinanta nerqa (Éxo. 32:26-29). w18.07 pág. 20 párrs. 13-16

Kay tiempopi ashkha runasqa, may rejsisqa kayta maskʼanku profesional kaspa, qhapaj kaspa chayri waj imasta ruwaspa. Noqanchejrí Jehová Dios allinta rejsinawanchejta maskʼanchej. Chaymanta parlaspa apóstol Pablo nerqa: “Kunantajrí Diosta rejsinkichejña chayri Diospa rejsisqasninña kankichej. Chantá, ¿imaraykutaj ujtawan kay mundoj qhasi manakaj imasninpa esclavosnin kayta munankichejri?”, nispa (Gál. 4:9). Reparanchej jina ‘Diospa rejsisqasnin’ kayta atinchej. Imajtinchus payqa amigon kananchejpaj ruwawarqanchej, munakuwanchejtaj (Ecl. 12:13, 14). w18.07 págs. 7, 8 párrs. 3, 4

Diospa leyesninman jina kausakunapajqa, Bibliaj nisqasninta kasukunanchej tiyan (Amós 5:15). Chaypajqa Jehová Dios jina yuyayta yachakunanchej tiyan. Imajtinchus Diospa yuyaychaykunasnenqa allinninchejpajpuni kanku. Chayta entiendenapajqa, uj runapi piensarina. Ichá chay runaqa chʼisisnin mana puñuyta atinmanchu. Doctortaj chay runata yanapananpaj ninman ejerciciosta ruwananta, wakin mikhunasta manaña mikhunanta, waj imastawan manaña ruwananta. Chay runataj doctorpa nisqanta kasukunman. Miskʼitataj puñuyta qallarinman. Ajinamantataj chay runaqa reparanqa doctorpa nisqan allinninpajpuni kasqanta. Jehová Diosqa chay doctor jinallataj, allinninchejpaj sumaj kamachiykunata churapuwarqanchej. Chay kamachiykunaqa yanapawanchej allinta kausakunapaj, juchapi mana urmanapajtaj. Bibliaqa niwanchej ama llullakunata, ama engañanata, ama suwakunata, ama khuchichakuy juchapi urmanata, runaswan mana maqanakunata, nitaj layqeriosta ruwanata (Pro. 6:16-19; Apo. 21:8). Jehová Diospa kamachiykunasninta kasukuspaqa, reparasunchej chay kamachiykuna allinninchejpajpuni kasqanta. Ajinamantataj Diospa kamachiykunasninta astawan munakusunchej, kasukuytapunitaj munasunchej. w18.06 pág. 17 párrs. 5, 6

Ichapis Pilatoqa chayta taporqa Jesusta manchachikusqanrayku. Ichapis yuyanman karqa Jesús runasta tanqananta romanospa contranpi oqharikunankupaj. Chaywanpis Jesusqa Pilatoman nerqa: “Gobiernoyqa mana kay mundomanta gobiernos jinachu”, nispa (Juan 18:36). Chayta nispa Jesusqa, Pilatoman nerqa kay mundopi mana autoridad kaytachu maskʼashasqanta, nitaj uj partidota apoyaytachu. Imajtinchus Gobiernonqa cielopi kanan karqa. Chantapis Pilatoman nillarqataj: “Kay mundoman jamorqani, cheqa kajmanta willanaypaj”, nispa (Juan 18:37). Reparanchej jina, Jesusqa sutʼita yacharqa imachus Diospa munaynin kasqanta. Noqanchejpis imachus Diospa munaynin kasqanta yachasunchej chayqa, ni mayqen partidotapis apoyasunchu, sonqonchejpitaj mana yuyallasunpischu politicaman chhapukuyta. Chaywanpis wakin kutisqa ichapis sonqonchejpi uj partidota apoyayta munasunman, runas suyunkumanta mayta jatunchakusqankurayku. Chaymanta parlaspa congregacionesta waturej hermano nin: “Predicani chay lugaresmanta runasqa, diamanta día suyunkumanta astawan alabakunku. Yuyankutaj llajtanku aswan sumaj kasqanta. Yuyallankutaj llajta masisninku gobernajtinku, kausayninku aswan sumaj kananta. Ajinapi rikukuspapis, hermanosqa ujchasqallapuni kanankupaj mayta kallpachakunku. Diospa Gobiernonmantataj willamullankupuni. Suyankutaj Diospa Gobiernon justiciata ruwananta, tukuy problemastataj chinkachinanta”, nispa. w18.06 págs. 4, 5 párrs. 6, 7

Satanás suteqa “Churanakoj” niyta munan. Hebreo parlaypi qhelqasqa Ñaupa Testamentopitaj, kay librosllapi Satanasmanta parlan: 1 Cronicaspi, Jobpi, Zacariaspiwan. Kunantaj qhawarinachej imajtinchus Ñaupa Testamentopi Satanasmanta pisillata parlakusqanta. Jehová Diosqa, Ñaupa Testamentopi Satanasmanta pisillata parlarqa. Imajtinchus Jehová Diosqa Ñaupa Testamentota qhelqacherqa pichus Mesías kasqanta runas reparanankupaj, payta kasukunankupaj ima (Luc. 24:44; Gál. 3:24). Jehová Diosqa Satanasmanta, sajra angelesmantawan astawan sutʼincharqa Mesiasnejta, yachachisqasninnejta ima. Tumpamantawantaj Jehová Diosqa, Jesusnejta, ajllasqa cristianosnejta ima Satanasta sajra angelestawan chinkachenqa (Rom. 16:20; Apo. 17:14; 20:10). Yuyarikunanchej tiyan Satanás atiyniyoj kajtinpis, payta ni imarayku manchachikunanchejchu tiyan, imajtinchus payqa mana tukuy imatapunichu ruwayta atin. Chantapis Jehová Dioswan, Jesuswan, Diospa angelesninwanqa Satanasmanta jarkʼashawanchej. w18.05 págs. 22, 23 párrs. 2-4

Diospa kamachisnin kanapajqa, poqoyniyoj kananchej tiyan (Mat. 13:23; 21:43). Juan 15:1-5 versiculospi poqoyniyoj kanata nisqanqa, mana ninakunchu runasta Jesuspa yachachisqasninman tukuchiywan (Mat. 28:19). Sichus chaywan ninakunman chayqa, ni pita Jesuspa yachachisqanman tukuchej hermanosqa, mana poqoj ramawan ninakunkuman. Chaywanpis chayqa mana jinachu. Imaraykuchus runastaqa mana obligasunmanchu Jesuspa yachachisqasninman tukunankupaj. Chantapis Jehová Diosqa, munakuwasqanchejrayku atinapaj jinalla imatapis ruwananchejta mañawanchej (Deu. 30:11-14). Uva sachʼaj poqoynenqa, ninakun “Diospa Gobiernonmanta sumaj” willaykunata willaywan. Jehová Diostaj munan tukuy kamachisnin Gobiernonmanta willamunanchejta (Mat. 24:14). w18.05 pág. 14 párrs. 8, 9

Kay tiempopipis pastoreswan curaswanqa, fariseos jinallataj llullasta yachachinku. Paykuna “Diosmanta cheqa kajta” yachachinankumantaqa, llulleriosta yachachinku (Rom. 1:18, 25). Por ejemplo yachachinku, wañusqas infiernopi ñakʼarisqankuta, alma mana wañusqanta, wakintaj yachachinku Diosninchej allillanpaj qhawasqanta warmipura chayri qharipura casarakuyta, kausakuyta ima. Autoridadespis llullakuspa runasta engañallankutaj. Tumpamantawantaj autoridadesqa llullakuspa nenqanku: “Tukuy imapis allillan, ni imamanta llakikuna kanchu”, nispa. “Chaypacha paykunaj tukukuyninkoqa ujllata chayamonqa”. Chayrayku “tukuy imapis allillan” kasqanta nejtinkoqa, mana creenanchejchu tiyan. Imaraykuchus noqanchejqa allinta yachanchej, Jehová Diospa pʼunchaynin, imaynatachus uj suwa tuta jamun, ajinata jamunanta (1 Tes. 5:1-4). w18.10 págs. 7, 8 párrs. 6-8

Sajra pʼunchaykunapi kausakusqanchejrayku ichá llakikusunman chayri mana allin imaspi yuyasunman. Chayrayku Jesusqa kallpachawanchej ajllasqa cristianosnejta chayri kurajkunanejta nisunman ancianosnejta. Ancianosqa creesqanchejmanta mana patroneschu kanku. Astawanpis kusisqa kananchejpaj yanapawanchej. Munankutaj creesqanchejrayku sinchʼita sayananchejta (Isa. 32:1, 2; 2 Cor. 1:24). Ancianosqa Pablomanta mayta yachakunkuman. Pabloqa hermanosta kallpachajpuni. Uj pachataj Tesalónica llajtapi kaj hermanosman jinata qhelqarqa: “Qankunata may jinatapuni munakusqaykurayku, mana Diospa sumaj willaykunasnillantachu qankunaman rejsichiyta munayku, manaqa kausayniykutapis qankunata yanapanaykupaj qoyta munayku”, nispa (1 Tes. 2:8). Ancianosqa miskʼi parlaykunawan hermanosta mayta kallpachankuman. Chaywanpis mana chayllatachu ruwananku kashan. Chayrayku apóstol Pabloqa, Éfeso llajtapi kaj ancianosman, kay diapaj ajllasqa textoj nisqanta nerqa. w18.04 pág. 21 párrs. 6-8

Pabloqa nisharqa kacharichisqa kanapaj, Diosman kutirikunanchej kasqanta, nisunman Diosman astawan qayllaykunanchej kasqanta (2 Cor. 3:16). Chaywanpis israelitasqa, chʼin pampapi kashaspa mana entiendeyta aterqankuchu Diosman astawan qayllaykunanku kasqanta. Paykunaqa velowan qhatasqa jina kasharqanku. Imajtinchus paykunaqa Egiptomanta kacharichisqa kaspaña munaynillankuta ruwarqanku (Heb. 3:8-10). Jehová Diosqa atiyninwan mana uj runaj esclavon kaymantachu kacharichiwanchej, manaqa juchaj esclavon kaymanta. Kacharichillawanchejtaj wañuymanta, llulla yachachiykunamanta, llulla religionespa costumbresninkumantawan (Rom. 6:23; 8:2). Jehová Dios jinaqa ni pi juchamanta kacharichiwasunmanchu. Kacharichisqa kasqanchejraykutaj, carcelpi kaspapis Jehová Diostaqa tukuy sonqo yupaychayta atillasunpuni (Gén. 39:20-23). w18.04 pág. 9 párrs. 3-5