Septiembre

Lázaro wañupojtin, hermanasnenqa sonqo nanayta waqarqanku. Martata Mariatawan waqajta rikuspa, Jesuspis “waqarikorqa” (Juan 11:32-35). Jesusqa mana waqarikorqachu, Lazarota manaña rikunanmanta. Payqa yacharqa Lazarota watejmanta kausarichimunanta. Chanta, ¿imajtintaj Jesús waqarikorqa? Martata Mariatawan sonqo nanayta waqajta rikusqanrayku. Jesusmanta nisqaqa, noqanchejqa pantaj runas kanchej. Jinapis Jesús jina wajkunamanta khuyakuyta atisunman. Arí, Jesusqa runasta khuyakorqa. Chayrayku mayta munakunchej. Kunantaj Jesusqa Diospa Gobiernonpi Reyña kashan, tumpamantawantaj tukuy llakiykunata chinkachenqa. Chayta yachaspa mayta kusikunchej. Jesusqa yachan, Satanaspa sajra gobiernonpi imaynachus kausay kasqanta. Chayraykutaj llakiyninchejta sumajta entienden. Mayta kusikunchej pay Gobiernonchej kasqanmanta. Imaraykuchus “pantaj runas kasqanchejta yachan, chayrayku khuyakuwanchej” (Heb. 2:17, 18; 4:15, 16). w19.03 pág. 17 párrs. 12, 13

Runa masinchejta Jehovata rejsinankupaj yanapajtinchejpis, Jehová Dios runasta astawan yanapashan (1 Cor. 3:6, 7). Jehová Diosninchej runasta payman pusamun. Sapa runataj imayna sonqoyojchus kasqanman jina, ajllanan tiyan sumaj willaykunata japʼikunantachus manachus (Mat. 13:4-8). Chantapis Jesusmanta yuyarikuna. Pay tukuymanta aswan sumaj yachachej kajtinpis, ashkhas paypa willasqanta mana japʼikorqankuchu. Chayrayku mana llakikunanchejchu tiyan, kay tiempopi runas mana uyariyta munawajtinchej. Predicashaspa runasmanta khuyakusun chayqa, aswan sumaj riwasun, aswan kusisqataj predicasun. Runasta yanaparispa sonqo juntʼasqa kasun. “Wiñay kausayta japʼinankupaj” jina kajkunatataj, Diosman chimpanankupaj yanapasun (Hech. 13:48). Chayrayku “atishaspaqa, tukuypaj allin kajta ruwana” (Gál. 6:10). Ajinamanta Jehová Diosninchejta jatunchaspa kusisqa kasun (Mat. 5:16). w19.03 pág. 25 párrs. 18, 19

Rey David nerqa: “Tata Diosqa jatunmin, mayta yupaychanapaj jinapuni”, nispa (Sal. 145:3). Davidqa Jehová Diosta mayta munakorqa. Chayrayku Jehová Diosta ‘tantakuypi yupaycharqa’ (1 Cró. 29:10-13; Sal. 40:5). Jehová Diosta jatunchasunman tantakuykunapi comentaspa. Mayta kusikunchej tantakuypi tukuy imaymana comentariosta uyarispa. Por ejemplo, kusikunchej wawasta pisi parlayllapi, tukuy sonqotaj comentajta uyarispa. Kusikullanchejtaj uj hermanota chayri uj hermanata imatachus yachakusqanmanta tukuy sonqo comentajta uyarispa. Mayta kusikullanchejtaj manchachikojkunata comentajta uyarispa chayri parlayninchejta yachakushajkunata uyarispa (1 Tes. 2:2). Comentajkunataqa tantakuy tukukojtin agradecekusunman. Ichapis nisunman comentariosninku mayta kallpachawasqanchejta. Purajmanta kallpachanakunapajtaj noqanchejpis comentasunman (Rom. 1:11, 12). w19.01 pág. 8 párrs. 1, 2; pág. 9 párr. 6

Chunka lepra onqoyniyoj runasmanta parlarina. Paykunaqa onqoyninkumanta mayta phutikorqanku. Chaywanpis paykunaqa uyarisqanku Jesucristo tukuy laya onqoykunata jampiyta atisqanta. Chayrayku uj kutipi Jesusta rikuytawan karullamanta qhaparerqanku: “¡Jesús, Yachachejníy! Khuyarikuwayku ari”, nispa. Jesustaj paykunata uyarerqa, chunkantinkutataj sanoyacherqa. Paykunataj Jesús sanoyachisqanmanta maytachá sonqonkupi agradecekorqanku. Chaywanpis chay chunka runasmanta, ujlla jatunmanta Diosta jatunchaspa Jesuspaman kuterqa. Jesusmantaj mayta agradecekusqanta nerqa. Chay runaqa samaritano karqa (Luc. 17:12-19). Wajkuna imatapis ruwapuwajtinchejqa, chay lepra onqoyniyoj runa jinallataj agradecekunanchej tiyan. Jehová Diosqa agradecekuyta yachan. Chaytataj tukuy imaymanamanta rikuchin. Por ejemplo, payta kusichejkunaman agradecekunanpaj tʼinkata qon (2 Sam. 22:21; Sal. 13:6; Mat. 10:40, 41). Bibliataj niwanchej: “Diospa munasqa wawasnin kaspa, pay jina ruwaychej”, nispa (Efe. 5:1). Chayrayku Jehová Dios jina kanapaj agradecekuyta yachananchej tiyan. w19.02 pág. 14 párrs. 1, 2; pág. 15 párr. 4

Uj joven hermanitapi piensarina. Payqa profesorninman kʼachallamanta nin desfileman chayri misaman mana rinanta. Uj joven hermanitotaj wasimanta wasi predicashaspa reparanman testigosmanta asikoj compañeron ujnin wasipi tiyakusqanta. Uj tatapiñataj piensarina. Paytaqa trabajonpi patronnin ninman llullakunanta, suwakunantataj. Chaywanpis chay tataqa trabajonta pierdenan kajtinpis patronninman ninman mana llullakunanta nitaj suwakunanta. Chantapis sutʼinchanman Diosninchej autoridadesta kasukunanchejta munasqanta (Rom. 13:1-4; Heb. 13:18). Kinsantin hermanitosqa ruwasqankuwan rikucherqanku mana manchachikoj kasqankuta, manataj llullaschu, nitaj suwaschu kasqankuta. Chaywanpis mana chayllatachu rikucherqanku. Kinsantin hermanosqa ruwasqankuwan sutʼita rikucherqanku Jehová Diosta tukuy sonqo kasukusqankuta. Paykunaqa mayta kallpachakorqanku Jehová Diosta kusichinankupaj, kamachiykunasnintataj juntʼanankupaj. Chayta rikuspa Jehová Diosqa maytachá kusikorqa. Noqanchejpis munanchej Diospa sonqonta qhallallarichiyta. w19.02 pág. 2 párrs. 1, 2

Leyqa astawan jarkʼaj wajcha wawasta, viudasta, forasterosta ima. Israelpi juezkunamantaj kamachikorqa: “Ama forasteropajqa imachus mana cheqan kajtaqa ruwankichejchu, ni wajcha wawaspajpis, amallataj viudasmantapis pʼachasninkuta prendapaj japʼikapunkichejchu”, nispa (Deu. 24:17). Jehovaqa mana piniyoj kajkunamanta llakikoj. Paykunata llakichejkunatataj castigaj (Éxo. 22:22-24). Cargoyoj kajkuna cargonpi kajkunamanta llakikunankuta Dios munasqanta. Yachakullanchejtaj payqa khuchichakuy juchata ni imarayku ruwananchejta munasqanta. Chantapis Diosqa munan tukuy kamachisnin, astawanqa mana piniyoj kajkuna jarkʼasqa kanankuta, cheqan kajtaj paykunapaj ruwakunanta (Lev. 18:6-30). Mana cheqan kajta ruwajtinchejtaj, manallataj wajkunata munakuyta atisunchu. Chayrayku wajkunata munakuna tiyan, cheqan kajtapunitaj ruwana tiyan. Jehová cheqan kajtapuni ruwapuwasqanchejta creesunchej chayqa, payta astawan munakusunchej. Diosta munakojtinchej, cheqan kamachiykunasninta kasukojtinchej imaqa, wajkunata munakusun, cheqan kajtapunitaj paykunapaj ruwapusun. w19.02 págs. 24, 25 párrs. 22-26

Kunantaj qhawarinachej imaynatachus Satanaspa sajra yuyayninmanta jarkʼakunanchejta. Jehovaqa niwanchej: ‘Ama parlallaychejpischu khuchichakuy juchamanta, imaymana millay imasmanta ima’, nispa (Efe. 5:3). Jinapis ichá trabajonchejmanta chayri escuelanchejmanta compañerosninchej chay millay imasmanta parlayta qallarinkuman. Sonqonchejtaj reparachiwasunman Diosta phiñachej imasmanta parlashasqankuta (Rom. 2:15). Jinata reparaspapis ichá compañerosninchejta uyariytapuni munasunman chayri qhawashasqanku fotostapis qhawaytapuni munasunman. Chayta ruwanamantaqa waj imamanta paykunata parlachisunman chayri ripusunman. Imaraykuchus sutʼita yachanchej “Diospa munayninpa contranpi kaj imasta, kay mundoj sajra imasninta munapayayta ima” qhesachananchej kasqanta. Compañerosninchej sajra imasta ruwanapaj tanqawajtinchej chayri sajra imaspi yuyanapaj tanqawajtinchejqa mayta kallpachakunanchej tiyan chay imasta qhesachanapaj. Jehová Diosqa qhawamushan Satanaspa contranpi sinchʼita sayaykushasqanchejta. Chayrayku payqa sajra yuyaykunata atipanapaj kallpata, yachaytawan qowasunchej (2 Cró. 16:9; Isa. 40:29; Sant. 1:5). w19.01 págs. 17, 18 párrs. 12, 13

Rey Salomonqa may qhapaj karqa, jallpʼantinpitaj mana pipis pay jina karqachu. Uj kutipitaj nikusqa: “Kunanqa mayta kusikusaj, kusiy kawsaymantaj qokusaj”, nispa (Ecl. 2:1-10). Jinamantataj sumaj wasista, tʼika canchasta, kʼachitu huertasta, tukuy ima munasqantataj ruwachikorqa. Salomonqa chay tukuy imasta ruwachikuspapis mana kusisqachu, nitaj sonqo juntʼasqachu karqa. Chayrayku kay diapaj textopi nisqanta pay nerqa. Jovenesqa Salomonmanta yachakunkuman kay mundoj imasninta maskʼay qhasi manakajlla kasqanta. Wakin runasqa pantaykuspa mayta sufrinku. Chaymantaraj pesachikuspa ninku: “Amallapis chayta ruwaymanchu karqa”, nispa. Jehová Diostaj mana munanchu jóvenes chay jinata sufrinankutaraj. Astawanpis munan payta kasukunankuta, uyarinankutataj. Jóvenes Diosta kasukunankupajqa, creenanku tiyan Diospa nisqasnin allinninkupaj kasqanta. Diospa munayninta ruwaspataj ni jaykʼaj pesachikonqankuchu. Bibliaqa jovenesman nin: “Diosqa cheqan, manataj qonqaponqachu ruwasqaykichejta, sutinta munakusqaykichejtapis”, nispa (Heb. 6:10). Chayrayku jovenesqa Diosta kasukunankupaj kallpachakunanku tiyan. Jinamanta allin kajta ruwanqanku, reparanqankutaj Jehová Diosta kasukuy allinninkupajpuni kasqanta (Sal. 32:8). w18.12 pág. 22 párrs. 14, 15

Dios jina yuyaj runaqa, Diospi creen, Dios jina yuyananpaj kallpachakun, Diospa yanapayninta maskʼan, Diospa nisqasnintataj tukuy sonqo kasukun (1 Cor. 2:12, 13). Davidqa Dios jina yuyaj. Chayrayku uj pacha nerqa: “Qanmin Tata Dios, tukuy imay kanki”, nispa (Sal. 16:5). Davidqa Jehovaman mayta agradecekorqa sumaj amigon kasqanmanta. Jehová Dios waqaychananpitaj atienekorqa (Sal. 16:1). Chayrayku nerqa: “Sonqoy ukhupi may kusisqa kani”, nispa. Davidpa sonqonqa mayta qhallallarerqa Diosman kʼaskaykusqanmanta (Sal. 16:9, 11). Kay mundoj imasninwan kusirikojkuna, qhapajyayta maskʼajkuna imaqa, mana David jinachu sonqo juntʼasqa kanku (1 Tim. 6:9, 10). Jovenesqa kusisqas sonqo juntʼasqastaj kausakunkuman Diospi atienekuspa, paytataj yupaychaspa. Jehovapi tukuy sonqo atienekunankupajqa chayri creenankupajqa astawan paymanta yachakunanku tiyan. Chaytataj ruwankuman Bibliata leespa, ruwasqasninta qhawarispa, may kʼacha kasqanpi tʼukurispa, jovenesta mayta munakusqanpi tʼukurispa ima (Rom. 1:20). w18.12 pág. 25 párrs. 7, 8

Apóstol Pabloqa mana nisharqachu runas atispaqa qhariwarmi kausayta jatunpaj qhawanankuta. Manaqa nisharqa qhariwarmi kausayta jatunpajpuni qhawanankuta. Tukuypis qhariwarmi kausayta jatunpaj qhawananchej tiyan, astawanraj casados kajkunaqa. Qhariwarmi kausayta jatunpaj qhawashanchej chayqa, Jesús jina ruwashanchej. Jesusqa qhariwarmi kausayta jatunpaj qhawarqa. Chayrayku fariseos divorciakuymanta tapojtinku, fariseosta yuyaricherqa imatachus Dios ñaupa qhariwarmiman nisqanta. Jesús nerqa: “Qhareqa tatanta, mamantawan saqenqa, iskayninkutaj ujllaña kanqanku”, nispa. Chantá nillarqataj: “Chayrayku Diospa ujchasqantaqa, ama pipis tʼaqachunchu”, nispa (Mar. 10:2-12; Gén. 2:24). Jesusqa yacharqa Jehová Dios qhariwarmi kausayta qallarichisqanta, manataj separakunankuta munasqanta. Jehová Diosqa mana nerqachu Adanwan Evawan divorciakuyta atisqankuta. Astawanpis munarqa ‘iskayninku’ ujchasqallapuni wiñaypaj tiyakunankuta. w18.12 págs. 10, 11 párrs. 2-4

Bibliamanta yachakushaspaqa repararqanchej Jehová Diosta kasukunapuni kasqanta. Chaywanpis Diosman astawan qayllaykusqanchejman jina pay jina yuyayta qallarinchej. Pay jina yuyaspaqa, reparanchej imachus kusichisqanta, imatajchus llakichisqanta, reparallanchejtaj imatachus millachikusqantapis. Ajinamantataj paypa munayninman jina kausakunchej. Maytapuni kusikunchej Jehová jina yuyanapaj kallpachakuspa. Chaywanpis pantaj runas kasqanchejrayku mana Dios jina yuyayta atillanchejchu. Ichapis chayrayku mana llimphuta kausakuyta atillasunmanchu, chayri mana kapuwasqallanchejwan kausakuyta atillasunmanchu, chayri ichapis tanqasqa jinalla predicacionman risunman, manachayri ichá mana entiendeyta atillasunmanchu imaraykuchus yawarta mana churachikunachu kasqanta. ¿Imatá ruwasunman Jehová jina yuyanapaj? Bibliata estudiana tiyan, estudiasqanchejpitaj tʼukurina tiyan. Ajinamanta Jehová Dios jina yuyasunchej. w18.11 págs. 23, 24 párrs. 2-4

Habacucqa sajra runaspa chaupinpi tiyakorqa. Maytataj llakikorqa israelitasta maqanakojta, wañuchinakojta, engañanakojta ima rikuspa. Chayrayku ichapis Habacuc sonqonpi nerqa: “Chay chhika unaytaña sajra runaswan muyurisqa kani. ¿Maykʼajtaj Jehová Dios sajra ruwaykunata tukuchenqari?”, nispa. Chayrayku payqa manchay llakisqa Jehová Diosninchejman nerqa: “Maykʼajkamataj qanta qhaparikamuspa, yanapata mañakusaj, mana uyarichikuspa?”, nispa. Habacucqa ichapis yuyarqa Jehová Dios llajtanmanta qonqakapusqanta chayri anchataña suyachikushasqanta. Ichá noqanchejpis Habacuc jina yuyarqanchej. Habacucqa Jehová Diosman tukuy llakiyninta willaspa, quejakuspa ima, rikucherqa Diospi tukuy sonqo atienekusqanta. Habacucqa llakikorqa Jehová Dios llajtanta yanapananpaj ni imata ruwasqanmanta, sufrejta qhawallasqanmanta ima. w18.11 pág. 14 párrs. 4, 5

Pedromanta Andresmantawan parlarina. Paykunaqa pescadores karqanku. Jesustaj paykunata nerqa: “Qhepayta jamuychej, runa japʼej pescadoresman tukuchisqaykichej”, nispa. “Paykunataj chay ratopacha chʼipasninkuta saqerpayaspa, qhepanta rerqanku” (Mat. 4:18-20). Uj runa Jehová Diosmanta yachakunanpajqa, mana Pedro jinapunichu, nitaj Andrés jinapunichu trabajonta saqepunan tiyan. Imajtinchus familianman necesitasqanta qonanpaj trabajananpuni tiyan (1 Tim. 5:8). Chaywanpis Bibliamanta yachakuspaqa, chay runa reparanqa Jehová Diostaraj ñaupajman churanan kasqanta nitaj trabajontachu. Mariamanta parlarina. Mariaqa golf deportepi sumaj profesional kayta munarqa ashkha qolqeta ganananpaj. Jinallapi Bibliata estudiayta qallarerqa. Bibliata entiendesqanmantataj sonqon mayta qhallallarerqa, yachakusqanman jinataj kausakuyta qallarerqa. Jinamanta pay reparakusqa golf deportepi profesional kaspaqa mana Jehová Diosninchejta sirviyta atinanta (Mat. 6:24). Chayrayku payqa chay deporteta saqeporqa. Kunantaj kusisqa precursora regular jina sirvishan. w18.11 pág. 5 párrs. 9, 10

Jesuspajqa 30 watasniyoj kashajtin Diosmanta willay aswan importante karqa. Imaraykuchus nerqa: ‘Diosqa kachamuwan Gobiernonmanta sumaj willaykunata willamunaypaj’, nispa (Mat. 20:28; Luc. 3:23; 4:43). Jesusqa tukuy tiempo Diosmanta yachacherqa, munarqataj runaspis pay kikin ruwanankuta (Mat. 9:35-38). Mana tukuychu carpinteros kanchej. Jinapis tukuyninchej sumaj willaykunata yachachinchej. Sumaj willaykunata yachachimuy may importante kasqanrayku Diosninchej yanapashawanchej. Chayrayku Diospa Palabran niwanchej ‘Dioswan khuska llankʼashasqanchejta’ (1 Cor. 3:9; 2 Cor. 6:4). Noqanchejqa yachanchej Diospa ‘Palabranpi kaj chhikaqa cheqapuni’ kasqanta (Sal. 119:159, 160). Chayrayku tukuy atisqanchejta ruwana ‘cheqa kaj palabrata maychus kajta yachachinapaj’ (2 Tim. 2:15). Chaypajqa Bibliata sumajta rejsinanchej tiyan. Ajinamanta runasman maychus kajta Jehová Diosmanta, Jesusmanta, Diospa Gobiernonmanta ima yachachinapaj. w18.10 pág. 11 párrs. 1, 2

Uj qosa Jesús jina ruwajtin, señoranqa payman kʼumuykukoj sonqo kayta atillanqa (Efe. 5:22-25, 33). Qosanta respetaj warmeqa, qosan ruwanasninwan ocupasqa kashajtin mana rabiachinchu, astawanpis kʼachamanta parlapayan. Tatasqa ejemplonkuwan wawasninkuta yachachinkuman. Imajtinchus wajkunaj allinninkuta maskʼajtinku, wawasninkupis wajkunaj allinnillantataj maskʼanqanku. Tatasqa wawasninkuman yachachinallankutaj tiyan wajkunaj allinninkutaraj maskʼayta. Por ejemplo yachachinkuman Tantakuna Wasipi mana correykachanachu kasqanta. Yachachillankumantaj hermanoswan mikhurinapaj tantasqa kashaspa kurajkunaraj sirvikunanku kasqanta. Noqanchejtajrí, uj wawa punkuta kicharipuwajtinchej chayri imallatapis ruwapuwajtinchejqa “allinta ruwanki” nisunman. Ajinamanta chay wawitaqa kusikonqa, reparanqataj wajkunata yanapay allin kasqanta. w18.09 pág. 29 párrs. 5, 6

Jesucristoj kamachiykunasninta kasukoyqa, kay tiempopi mayta yanapawasunchej, aswan qhepamanpis yanapawasun. Chayrayku Diospa llajtanpi cambios kajtenqa, piensarina tiyan imaynatachus chay cambios yanapanawanchejpi. Chayrayku familianchejwan Diosta yupaychashaspa qhawarisunman ima cambioschus ruwakusqanta tantakuykunapi, predicacionpipis. Qhawarillasunmantaj imaynatachus chay cambios yanapashawasqanchejta. Diospa Llajtanta Kamachejkuna allinninchejpajpuni imatapis niwasqanchejta mana qonqasunchu chayqa, kamachiykunasninta kasukuyta atillasun, kusisqastaj kasun. Por ejemplo Diospa llajtanpi qolqeta sumajta apaykachakushasqanta rikuspaqa, mayta kusikunchej. Imaraykuchus ñaupajtaqa publicaciones imprimikunanpaj ashkha qolqeta gastakoj. Kunantajrí celularesnillanchejpiña chayri tabletasnillanchejpiña chay publicacionesta uraqachisqanchejrayku pisillaña publicaciones imprimikun, qolqepis pisillaña gastakun. Chantapis aswan karu lugarespi Diosmanta willayta atinchej celularespi publicacionesta uraqachiyta atikusqanrayku. Chayrayku tukuypis kallpachakuna videosta, grabacionesta, publicacionesta ima celularesninchejman chayri tabletasninchejman uraqachinapaj. Chayta ruwaspaqa rikuchisunchej Jesusta kasukushasqanchejta. Imaraykuchus payqa munan Diospa llajtanpi allinta qolqeta apaykachakunanta. Señorninchej Jesucristo Diospa Llajtanta Kamachejkunanejta imallatapis ruwananchejta niwajtinchejqa, tukuy sonqo kasukunanchej tiyan. Ajinamanta hermanosninchejwan aswan ujchasqas kasunchej, creeyninchejpis astawan wiñanqa. w18.10 págs. 25, 26 párrs. 17-19

Llakisqa hermanonchejwan Jehová Dios jina kʼachas, khuyakuyniyojtaj kasun chayqa, chay hermanota sonqochayta atisun. Jinamantataj chay hermano Jehová Dios mañakusqanman kutichishasqanta reparanqa (2 Cor. 1:3-6). Jinapis ama suyanachu hermanosninchej ni imapi pantanankuta. Tukuypis pantanchejpuni pantaj runas kasqanchejrayku (Ecl. 7:21, 22). Chayrayku Jehová Diosqa maychus kajllata noqanchejmanta suyan. Noqanchejpis hermanosmanta maychus kajllata suyana, pacienciakunataj (Efe. 4:2, 32). Chayrayku hermanosninchejtaqa ama wajkunawan kikinchanachu, nitaj ninachu mana kallpachakushasqankuta. Astawanpis kallpacharina, sumajta ruwashasqankutataj nina. Kallpacharejtinchejqa kusisqa Jehová Diosta yupaychallanqankupuni (Gál. 6:4). w18.09 pág. 16 párrs. 16, 17

Jesuspajqa Tatanchej Jehová Diospa munayninta ruway mikhunan jina karqa. Noqanchejpajpis ajinallataj kanan tiyan. Uj sumaj mikhunaqa cuerponchejta mayta kallpachan, ajinallatataj Jehová Diospa munayninta ruwayqa kusiyta qowanchej, creeyninchejtataj kallpachan. Chaytataj tukuychá repararqanchej predicacionman rispa. Jehová Diospa nisqasninta kasukusunchej chayqa, yachayniyoj kasunchej (Sal. 107:43). Yachayniyoj kajtinchejtaj allinpuni imapipis riwasunchej. Bibliapis jinata niwanchej: ‘Tukuy ima munasqasniykipis manapuni yachaywanqa ninakunchu. Yachayqa pichus tarejpajqa kausay sachʼa jina; kusikuyniyojmin chayta japʼispa mana kacharejkunaqa’, nispa (Pro. 3:13-18). Jesuspis kayta nerqa: “Qankunaqa chay imasta yachankichejña, chaykunata ruwaspataj kusisqa kankichej”, nispa (Juan 13:17). Jesuspa yachachisqasnintaj Jesuspa nisqanman jinapuni kausakorqanku, chayraykutaj paykunaqa tukuy tiempo kusisqa karqanku. w18.09 pág. 4 párrs. 4, 5

Adanwan Evawanqa niraj juchallikushajtinku, allin kanman karqa wawasninkupi piensarinanku. Imajtinchus Jehová Diosninchejqa paykunaman nerqa: “Miraychej, kay pachaman juntʼaychej”, nispa (Gén. 1:28). Arí, Jehová Diosqa munarqa wawasniyoj kanankuta. Munallarqataj wawasninkuwan khuska kay mundota uj paraisoman tukuchispa, kusisqa kausakunankuta. Adanwan Evawanqa chaypi piensarinanku karqa. Ajinamanta wawasninkoj allinninkuta maskʼankuman karqa. Adanwan Evawan mana juchallikunkumanchu karqa chayqa, wawasninku mana pantaj runaschu kankuman karqa. Paykunataj Jehová Diospa munayninta ruwaspa kay mundota uj paraisoman tukuchinkuman karqa. Ajinamantataj “Diospa samarikuyninman” yaykunkuman karqa (Heb. 4:11). Kay mundota uj paraisoman tukuchishaspaqa maytachá kusikunkuman karqa. Jehová Diostaj Adanta Evatawan maytachá bendecinman karqa wawasninkoj allinninkuta maskʼasqankumanta. w18.08 pág. 18 párr. 2; págs. 19, 20 párrs. 8, 9

Runasqa qhasimanta contranchejpi imatapis parlankupuni. Jesuspa contranpi, Juan Bautistaj contranpipis llullasta parlallarqankutaj (Mat. 11:18, 19). Chaywanpis Jesusqa mana tiemponta pierderqachu runas llullasta paymanta parlasqankuta sutʼinchaspa. Astawanqa ruwasqanwan rikucherqa runaspa nisqanku llulla kasqanta. Chayrayku nerqa: “Uj runaj yachaynenqa cheqan kajta ruwasqanpi yachakun”, nispa (Mat. 11:19). A vecesqa runas contranchejpi llullasta parlankuman, mana allinpaj qhawachinawanchejrayku. Chaytaj mayta llakichiwasunman. Ajinapi rikukuspaqa, Jesús jina ruwasqasninchejwan rikuchina parlasqanku mana ciertochu kasqanta. Bibliaj nisqanman jina kausakusunchej chayqa, runas ruwasqasninchejpi reparanqanku wajkuna qhasillamanta contranchejpi parlasqankuta. w18.08 pág. 6 párrs. 11-13

Caín, Salomón, israelitas imaqa juchasninkumanta pesachikuyta aterqanku, sajra ruwayninkutapis saqepuyta aterqanku (Hech. 3:19). Imajtinchus Jehová Diosqa paykunata khuyakunman karqa, perdonanmantaj karqa imaynatachus Aaronta perdonarqa, ajinata. Chayrayku Jehová Diosninchejqa noqanchejtapis niraj juchapi urmashajtinchej kʼamiriwanchej. Payqa kʼamiriwanchej Biblianejta, publicacionesnejta, hermanosnejtapis. Chay kʼamiwasqanchejta tukuy sonqo japʼikusunchej chayqa, Jehová Dios khuyakuwasunchej. “Diospa jatun khuyakuyninta ama qhasipaj” japʼinachu (2 Cor. 6:1). Imajtinchus Jehová Diosqa khuyakuwanchej “munayninpa contranpi kaj imasta, kay mundoj sajra imasninta munapayayta ima” qhesachananchejpaj (Tito 2:11-14). Sajra runaspa chaupinpi tiyakusqanchejrayku, mana Jehová Diosninchejta kasukuyta atillanchejchu. Chayrayku tukuy atisqanchejta kallpachakuna Jehová Diospa qayllallanpipuni kanapaj. w18.07 pág. 21 párrs. 20, 21

Jehová Diosninchejpa ñaupaqenpi rejsisqa kayta maskʼanallapajpuneqa, yuyarikunanchej tiyan Jehová Diosninchej paypata kajkunata ni jaykʼaj qonqapusqanta (Heb. 6:10; 11:6). Jehová Diosqa cheqan kajtapuni ruwasqanrayku, ‘paypata kajkunata sumajta rejsin’, tukuy sonqotaj munakun. Chantapis Jehová Diosninchejqa “cheqan runaspa ñanninta waqaychan”. Yachantaj “payta yupaychajkunata pruebamanta librayta” (Sal. 1:6; 2 Ped. 2:9). Jehová Diospa ñaupaqenpi rejsisqa kayta maskʼanallapajpuneqa, yuyarikunanchej tiyan Jehová Dios tʼukunapaj jina tʼinkata qonawanchejtapuni. Jehová Diosqa, mana tʼinkata qonqachu runaswan rikuchikuyta munaspalla allin imasta ruwajkunaman (Mat. 6:1-5). Chantapis Jesús nerqa pakayllapi wajkunata yanapajman “tukuy imata qhawamoj” Tatan kutichipunanta. Arí, Jehová Diosqa pakayllapi yanapaj runasman jatun tʼinkata qopun. w18.07 pág. 9 párrs. 8, 10

Apóstol Pedroqa tʼukusharqa mosqoypi jina rikusqan ima niytachus munasqanpi. Jinallapitaj Cornelioj kachamusqan runasqa, Pedrota maskʼaspa alojakusqan wasiman chayarqanku. Jehová Diosninchejtaj atiyninnejta payta nerqa: “Kunanqa sayarispa uraykuy, paykunawantaj mana iskayrayaspa rillay”, nispa. Chayrayku Pedroqa Cornelioj wasinman rerqa. Sichus Pedro llajta masisnin jinallataj waj llajtayoj runasta qhawanman karqa chayqa, manachá Cornelioj wasinman rinmanchu karqa. Chaywanpis Pedroqa mosqoypi jina imatachus rikusqanrayku, Jehová Diosninchej atiyninnejta imatachus nisqanraykutaj, repararqa waj llajtayoj runasta allinpaj qhawanan kasqanta. Chayrayku Corneliowan parlaytawan Pedro nerqa: “Kunanqa allinta reparani, Diosqa tukuy runasta uj rejllata qhawasqanta. Payqa allinpaj qhawan mayqen nacionllamantapis payta manchachikojta, cheqa kajtataj ruwajta”, nispa (Hech. 10:34, 35). Apóstol Pedroj nisqanmantataj tukuy cristianos yachakorqanku. w18.08 pág. 9 párrs. 3, 4

Imastachus Jehová Dios chejnikun chaykunata chejnikunchej. Chaywanpis Diosqa Bibliapi mana tukuy imapajpunichu leyesta churapuwarqanchej. Chayrayku imata ruwashaspapis Diosta mana llakichinapaj sumajta qhawarikunanchej tiyan. Bibliaj nisqasnin sonqonchejpi kajtenqa, Diosta kusichinapaj jinapuni imatapis ruwasunchej. Jehová Diosqa munakuwasqanchejrayku sumajta yuyaychawanchej. Chayrayku pay niwanchej: “Noqamin Señorniyki Tata Dios kani; noqa yachachiyki imachus qampaj allin kasqanta. Noqa may ñantachus purinaykita rikuchiyki”, nispa (Isa. 48:17, 18). Bibliaj nisqasninpi tʼukureyqa, yanapawanchej kausayninchejta cheqanchanapaj, allin kajtapunitaj ruwanapaj. Ajinamantaqa sumaj yuyaywan imatapis ajllasunchej. Diospa yuyaychaykunasnenqa, yanapawanchej allin kajtapuni ruwanapaj. Diospa yuyaychaykunasninta rejsispaqa, imaynatachus Dios yuyasqanta entiendenchej. Entiendellanchejtaj imaraykuchus wakin leyesta churapuwasqanchejta. w18.06 pág. 17 párr. 5; pág. 18 párrs. 8-10

Herodesta qhatejkunataj sumajta yachachinakuspa ajinata yuyaychakorqanku: “Jesús impuestota mana paganachu kasqanta nejtenqa, Romaj contranpi oqharikushasqanta nisunchej. Impuestota pagananku kasqanta nejtintaj, runasqa paymanta karunchakonqanku”, nispa. Jesusqa yacharqa ashkha impuesterosqa suwas kasqankuta. Chaywanpis mana chayta allinchaytachu maskʼarqa. Astawanqa suyarqa chay tukuy imasta Diospa Gobiernollan allinchananta. Jesusmantaqa yachakusunman ni mayqen partidota apoyanata, uj partido allinta ruwashasqanman rijchʼakojtinpis. Chayrayku ama uj autoridadpa contranpi parlanachu justiciata mana ruwajtin. Astawanqa Diospa Gobiernon cheqan kajta ruwananpi atienekunachej (Mat. 6:33). May chhika hermanosqa niraj Bibliamanta yachakushaspa justicia ruwakunanta munasqankurayku chʼajwaspi, politicapi ima manchay satʼisqa kasharqanku. w18.06 pág. 6 párrs. 9-11

Satanasqa angelesta warmiswan puñuykunankupaj tanqashaspa, ichapis chay angelesman nerqa tukuy runas makinpi kanankuta. Satanasqa ichapis chayta ruwarqa warmej miraynin mana chayamunanta munaspa (Gén. 3:15). Chaywanpis Jehová Diosqa, mana saqerqachu Satanaspa, jinallataj sajra angelespa munaynin ruwakunanta. Chayrayku Jatun musphay Parata parachimorqa. Reparanchej jina, Satanasqa angelesta khuchichakuy juchapi urmacherqa, atiyniyoj kanankutataj creeykucherqa. Satanaspa ladonman churakoj angelesqa, unayta Diospa ladonpi karqanku. Chaywanpis chay angelesqa sajra munayninkuwan atipachikorqanku. Kaymanta yachakusunman, unaytaña Jehová Diosta sirvispapis, sonqonchejta allinta qhawarikunanchej kasqanta, ama sajra munayninchejwan atipachikunapaj (1 Cor. 10:12). Chayrayku sapa kuti sonqonchejta qhawarikunanchej tiyan ama millay yuyaykuna sonqonchejpi saphichakunanpaj, nitaj may kasqanchejta yuyakunanchejpaj (Gál. 5:26; Col. 3:5). w18.05 pág. 25 párrs. 11, 12

Apóstol Pabloqa nerqa, sonqon mayta nanasqanta israelitas Diospa Gobiernonmanta mana uyariyta munasqankurayku. Chaywanpis apóstol Pabloqa paykunaman predicallarqapuni. Imayna sonqowanchus paykunaman predicasqanmantataj, jinata nerqa: “Tukuy sonqo munani, jinallataj Diosmantapis mañakuni israelitas salvasqa kanankuta. Noqa paykunamanta kayta niyman: Diosta tukuy sonqo qhatiyta munanku, chaywanpis mana cheqa yachayman jinachu”, nispa (Rom. 10:1, 2). Apóstol Pabloqa, israelitasman predicallarqapuni ‘tukuy sonqo yanapayta munasqanrayku’. Payqa israelitas salvakunankutapuni munarqa (Rom. 11:13, 14). Chantapis Pabloqa Diosmanta mañakorqa israelitasrayku. Payqa Diosman nerqa, sapa israelitata yanaparinanta Gobiernonmanta sumaj willaykunata yachakunankupaj. Chantapis Pabloqa israelitasmanta kayta nerqa: “Diosta tukuy sonqo qhatiyta munanku”, nispa. Apóstol Pabloqa repararqa israelitas Diosta tukuy sonqo yupaychayta atisqankuta. Reparallarqataj, chay israelitas pay jina Jesuspa yachachisqasninman tukuyta atisqankuta. w18.05 pág. 13 párr. 4; pág. 15 párrs. 13, 14

Sapa ujninchej kallpachakunanchej tiyan imastachus hermanosninchej necesitasqankuta reparanapaj. Ajinamanta necesitasqankupi yanapanapaj. Apóstol Pabloqa hebreo cristianosman, jinata nerqa: “Liwi makista, llauchʼiyasqa chaki moqostapis kallpachaychej. Chakisniykichejpajpis ñanta cheqanchallaychejpuni. Ajinamanta cojo kajqa mana chʼutachikunanpaj, astawanpis sanoyapunanpaj”, nispa (Heb. 12:12, 13). Jovenespis parlasqankuwan, ruwasqankuwan ima hermanosta kallpachayta atinkuman. Apóstol Pabloqa nerqa: “Qankunaqa Cristopi ujchasqa kashankichej. Wajkunata kallpachankichej, sonqochankichejtaj, paykunata munakusqaykichejrayku. Chantapis wajkunamanta llakikunkichej, paykunata munakunkichej, khuyakunkichejtaj. Chaywanpis sonqoyta kusiywan juntʼachinaykichejpajqa uj sonqolla, kikin munakuyniyoj, sumaj ujchasqas, uj yuyayllataj kanaykichej tiyan. Ama churanakojkuna, nitaj qhasimanta jatunchakojkunaqa kaychejchu. Astawanqa kʼumuykukoj sonqo kaspa, wajkunata qankunamanta aswan kurajta jina qhawaychej. Ama allinnillaykichejtaqa maskʼaychejchu. Manachayqa wajkunaj allinninkutapis maskʼaychej”, nispa (Fili. 2:1-4). w18.04 pág. 22 párr. 10; pág. 23 párr. 12

Jehová Diosqa juchamanta, wañuymantawan kacharichiwasqanchej payta tukuy kausayninchejwan yupaychanapaj. Juchamanta wañuymantawan kacharichisqa kasqanchejrayku, tukuy tiemponchejta, kallpanchejtawan churana Jehová Diosta sirvinapaj. Chayta ruwaspaqa mana profesional kaytachu, nitaj sumaj trabajoyoj kaytachu maskʼasunchej, nillataj munayninchejman jinallachu imatapis ruwasunchej (Gál. 5:16). Kunanqa Noemanta familianmantawan parlarina. Paykunaqa, may millay sajra runaspa chaupinpi kausakorqanku. Chaywanpis Noewan familianwanqa, mana chay sajra runaspa ruwasqasninkutachu ruwarqanku. Astawanpis Diospa kamachisqanta ruwanankupaj tiemponkuta churarqanku. Diosqa paykunaman kamacherqa uj arcata ruwanankuta, paykunapaj, animalespajpis mikhunata tantanankuta, runasmanpis Jatun Para chayamunanta willanankuta. Bibliataj nin: “Noeqa ruwarqa, Dios imaynatachus payman nisqanman jina”, nispa (Gén. 6:22). Noewan familianwanqa, Diospa munayninta ruwasqankurayku Jatun Para chayamojtin salvakorqanku (Heb. 11:7). w18.04 pág. 10 párr. 8; pág. 11 párrs. 11, 12

Satanaswan sajra angeleswanqa, llulla religionesnejta “jallpʼapi kaj tukuy runasta pantachishan” (Apo. 12:9). Arí, Satanasqa llulla religionesnejta Jehová Diosmanta llullasta yachachin. Diospa sutintapis “qonqachiyta” munan (Jer. 23:26, 27). Chayrayku ashkha runasqa tukuy sonqo Diosta yupaychashasqankuta yuyaspapis, sajra angelesllata yupaychashanku (1 Cor. 10:20; 2 Cor. 11:13-15). Chantapis Satanasqa, runasta yuyachiyta munan qhapaj kaspa kusisqa kausakuyta atisqankuta (Pro. 18:11). Chayrayku ashkha runasqa, qolqellata maskʼanku Diosta maskʼanankumantaqa (Mat. 6:24). Wakintaj Diosmanta yachakuspañapis “qhapajyayta” munapayasqankurayku Diosmanta karunchakunku (Mat. 13:22; 1 Juan 2:15, 16). w18.05 pág. 23 párrs. 6, 7