Jesuspa yachachiykunasnin

‘Kay pachap tukukuynin’

‘Kay pachap tukukuynin’, ¿imataq ninayan?

Juk kuti Jesuspa discipulosninqa, payta tapurqanku: “Ima señaltataj rikuchiwasqayku kutimunaykimanta, kay pachaj tukukuyninmantawan?”, nispa (Mateo 24:3). Jesús kutichisqanpiqa, mana Jallpʼanchik chinkanantachu nirqa. Payqa, wak kutipi ‘kay pacha’ nisqa rimayta uqharirqaña, kay saqra pachapi kaq llulla religionmanta, politicamanta, qhapaqyayta munapayaymanta ima parlananpaq (Mateo 13:22, 40, 49, Dios Parlapawanchej). Chayrayku “chaypachama tukukoyqa jamonqa” nispaqa, tukuy chaykuna chinkachisqa kananmanta parlachkarqa (Mateo 24:14).

¿Imaynataq chay kanqa?

Jesusqa, kay saqra pacha chinkachisqa kananmanta willayqa, allin willay kasqanta yacharqa, chayrayku nirqa: “Janaj pacha reinomanta evangelio tukuynejpi willasqa kanqa, tukuy runas yachanankupaj; chaypachama tukukoyqa jamonqa”, nispa. Chantá nillarqataq: “Chaypacha manchay ñakʼariy kanqa; kay pacha qallarikusqanmantapacha manaraj chay jina karqachu, nitaj jaykʼajpis kanqachu. Chay pʼunchaykunachus mana pisiyachisqa kankuman chayqa, mana pipis salvasqachu kanman”, nispa (Mateo 24:14, 21, 22).

¿Tukuy runaschu wañunqanku?

Diosta, Churin Jesusta ima mana munakuqkuna, Diospa kamachisqanta mana kasukuqkuna imalla, chinkachisqas kanqanku. Jesucristo nirqa: “Imaynachus Noepa tiempompi karqa, ajinallataj Runaj Churimpa kutimuynimpis kanqa. Noepa tiempompi, manaraj jatun para chayamushajtin, runasqa [...] mana imatapis reparakorqankuchu jatun para jamunankama, tukuyninkutaj chinkachisqa karqanku”, nispa (Mateo 24:36-39). Jesusqa, wañuyman pusaq jatun ñanta, achkha runas richkasqankuta nirqa, chaywanpis kawsayman pusaq ‘kʼullku ñan’ kasqanta nillarqataq (Mateo 7:13, 14).

¿Maykʼaqtaq kay saqra pachap tukukuynin kanqa?

Jesuspa discipulosnin, “ima señaltataj rikuchiwasqayku kutimunaykimanta, kay pachaj tukukuyninmantawan?”, nispa payta tapuptinku, Jesusqa jinata kutichirqa: “Uj nacion waj naciompa contranta oqharikonqa, uj reinopis waj reinoj contranta; jinallataj kanqa yarqhaykuna, sinchʼi jallpʼa ikhakuykuna ima kaynejpi, jaqaynejpi [...]. Anchapuni jucha kajtintaj, ashkhaspa munakuyninku chiriyaponqa”, nispa (Mateo 24:3-12). Kay tiempopi tukuyniqpi ñakʼariykuna rikukusqanqa, Diospa Reinon qayllitapiña kasqanta rikuchiwanchik. Jesús nirqa: “Chay tukuy imasta rikuspaqa, yachaychej Diospa reinon qayllapiña kasqanta”, nispa (Lucas 21:31).

Salvakunanchikpaq, ¿imatá ruwananchik tiyan?

Diosqa, “uj kʼata Churinta qorqa. Ajinamanta pillapis paypi creejqa” mana wañunanpaq, astawanqa wiñay kawsayniyuq kananpaq (Juan 3:16). Chaywanpis Diospi, Churinpi ima iñinanchikpaqqa, paykunata sumaqta riqsinanchik tiyan. Chayrayku Jesús nirqa: “Kaymin chay wiñay kawsayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3).

Kay pachapi chʼampaykuna, llakiykuna ima kaptinpis, Diosmanta yachakunallapuni, payta munakusqanchiktataq rikuchinallapuni. Jesús nirqa: “Qhawarikuychej; pajtataj sonqoykichej atipachikunman [...] kay pacha ruwanaswan [...]. Jinallapitaj juicio pʼunchay ujllata taripasunkichejman. Chay pʼunchayqa uj tojlla jina jamonqa tukuy kay pachapi kawsajkunaman”, nispa. Jesuspa nisqanta kasukusunchik chayqa, “kay tukuy ima jamojmanta lluspʼi[yta]” atisunchik (Lucas 21:34-36).

Kaymanta astawan yachakunaykipaq ¿Imatapunitaq Biblia yachachin? libromanta 9 yachaqanata, “¿Qhipa pʼunchaykunapichu kawsachkanchik?”, sutichasqata ñawiriy.a

[Sutʼinchaynin]