Bibliaj yachachiykunasnin
¿Imataj Juicio Pʼunchaypi kanqa?
Kay yachaqanaqa, tawa tapuykunaman Bibliawan kutichishan. Ichá qanpis chaykunata tapukorqanki. Munaspaqa Jehovaj testigosninwan kay tapuykunata ukhunchariwaj.
1. ¿Imatataj runas Juicio Pʼunchaymanta yuyanku? Chantá, ¿imatá Biblia nin?
Ashkha runas ninku: “Juicio Pʼunchaypeqa, may chhika almas Diospa ñaupaqenpi sayanqanku juzgasqa kanankupaj. Allin kajta ruwajkunaqa cieloman renqanku, sajra kajta ruwajkunarí infiernopi castigasqa kanqanku”, nispa. Paykunaqa kay dibujopi rikukusqanman jina kananta yuyanku. Jinapis Bibliaqa nin, Juicio Pʼunchayqa uj tiempo kasqanta, chaypitaj tukuy ima kay jallpʼapi allinchakunanta (Salmo 96:13). Diosqa Jesusta Juezta jina churan, paytaj tukuy runaspaj justiciata ruwanqa (Isaías 11:1-5; Hechos 17:31 leey).
2. ¿Imataj Juicio Pʼunchaypi allinchakonqa?
Ñaupaj runa Adanqa, Diosta mana kasukuspa contranpi sayaykorqa. Chayrayku tukuy wawasnin juchasapas nacekunchej, sufrinchej, wañunchejtaj (Romanos 5:12). Jesusqa chayta allinchanqa Juicio Pʼunchaypi, nisunman kay jallpʼata waranqa watasta kamachimushajtin. Chayta allinchananpaj, Jesusqa may chhika wañupoj runasta kausarichimonqa (Apocalipsis 20:4, 11, 12 leey).
Chay tiempopi kausarimojkunaqa, mana niraj wañupushaspa imatachus ruwasqankumantachu juzgasqa kanqanku, manaqa kʼuyuna librospi nisqanta kasukusqankuman jina. Chay librosmantaqa Apocalipsis capítulo 20 parlan (Romanos 6:7). Apóstol Pablo nerqa, Diosqa “cheqan runasta, mana cheqan runastapis” kausarichimunanta. Tukuy chay kausarimojkunataj Diosmanta yachakuyta atenqanku (Hechos 24:15 leey).
3. ¿Imapiwan Juicio Pʼunchaypi kanqa?
Jehová Diosta mana rejsispa wañupojkunaqa, payta rejsiyta, munayninta ima ruwayta atenqanku. Chayta ruwajtinkutaj, “wiñay kausayta” japʼenqanku. Kausarimuytawan Diosta mana kasukuyta munajkunarí, chinkachisqa kanqanku (Juan 5:28,29; Isaías 26:10; 65:20 leey).
Jesucristo waranqa watasta kamachishajtin, nisunman Juicio Pʼunchaypi, Jehová Diosqa runasta mana juchayojman tukuchenqa. Chay tiempo tukukunanpajtaj, ñapis tukuy runasña qallariypi jina juchamanta llimphu kanqanku (1 Corintios 15:24-28). Chayqa kasukoj runaspaj uj sumaj bendición kanqa. Jinapis chay waranqa watas tukukusqantawan, Satanasqa chinkay ukhupi presochasqa kasqanmanta kacharichisqa kanqa. Paytaj tukuy imata ruwanqa runasta Jehovamanta karunchananpaj. Chay pruebata atipajkunatajrí, kay jallpʼapi wiñaypaj kausakonqanku (Isaías 25:8; Apocalipsis 20:7-9 leey).
4. ¿Biblia waj juicio pʼunchaymanta parlallantajchu?
Arí. Bibliaqa waj juicio pʼunchay kasqanta nillantaj. Chaypitaj kay jallpʼamanta sajra runas chinkachisqa kanqanku. Imaynatachus Noej tiemponpi sajra runas ujllapi chinkachisqa karqanku, ajinallataj chay pʼunchay kanqa. “Sajra runas” chinkachisqa kajtinkoqa, Diosta kasukoj runasllaña qhepakonqanku. Chaypitaj “cheqan kausaylla kanqa” (2 Pedro 3:6, 7, 13 leey).