¿Jehovaj testigosninmanta warmis Diosmanta yachachinkuchu?

Arí, mundontinpi ashkha warmis Diosmanta yachachinku. Bibliapeqa Diospa Gobiernonmanta ashkha warmis willasqankuta nin. Salmo 68:11 versiculopi Jehová nin: “Sumaj willaykunata willaj warmisqa may chhika soldados jina kanku”, nispa.

Jehovaj testigosninmanta warmis Diosmanta yachachisqankoqa, mana kikinchu waj religionespi warmis yachachisqankuwan. Imaraykuchus mana kikinchu kasqanta qhawarina.

Waj iglesiasmanta warmisqa, iglesiankupi pastoras jina qharisman, warmisman yachachinku. Chaytaj rikuchin iglesiankupi kamachejkuna jina kasqankuta. Jehovaj testigosninmanta warmistajrí, mana tantakuykunasninkupi yachachinkuchu. Paykunaqa wasimanta wasi tukuy runasman Diosmanta willamunku, waj lugaresmanpis willaj rillankutaj.

Waj religionesmanta warmisqa, iglesiankupi kajkunaman yachachinku, kamachinku ima. Jehovaj testigosninmanta warmistajrí, uj bautizasqa cristiano tantakuypi kajtenqa mana yachachinkuchu. Tantakuykunasninkupeqa sumaj wakichisqa cristiano qharislla yachachinku. Paykunatataj ancianos sutiwan rejsikun (1 Timoteo 3:2; Santiago 3:1).

Bibliapi nin, cristiano qharislla congregacionesta ñaupajman pusananku kasqanta. Chaytataj sutʼita yachanchej, apóstol Pablo imatachus compañeron Titoman nisqanpi. Pay nerqa: “Qanta Cretapi saqerqayki, [...] sapa llajtapi ancianosta churanaykipaj”, nispa (Tito 1:5). Chantá nillarqataj: “Ancianoqa mana juchachana kanan tiyan, uj warmiyojllataj”, nispa (Tito 1:6). Apóstol Pabloqa, Timoteoman cartanta qhelqashaspa chayllatataj nerqa: “Sichus pipis anciano kananpaj kallpachakushan chayqa, sumaj ruwanata munashan”, nispa. Chayrayku uj hermano, anciano kayta munan chayqa, ‘mana kʼamina, uj warmiyojlla, yachachinanpajtaj sumaj wakichisqa’ kanan tiyan (1 Timoteo 3:1, 2).

¿Imaraykutaj congregación ukhupi cristiano qharislla ancianos jina yachachiyta atinku? Apóstol Pabloqa Timoteoman cartanta qhelqashaspa nerqa: “Mana saqenichu warmi yachachinanta, nillataj qharita kamachinantapis, manachayqa chʼinlla kakuchun. Ñaupajtaqa Adanraj ruwasqa karqa, chaymantaraj Evaqa”, nispa (1 Timoteo 2:12, 13). Leerinchej jina Diosqa munan cristiano qharislla congregacionpi yachachinankuta.

Jehovaj testigosnenqa kamachejninku Jesusta qhatinku. Lucas libropi nin: “Jesusqa llajtamanta llajta, ranchomanta rancho rerqa, Diospa Gobiernonmanta sumaj willaykunata willaraspa”, nispa. Discipulosnintapis kikinta ruwanankuta kamacherqa. Chayrayku paykunapis “ranchomanta rancho rerqanku, tukuynejpi sumaj willaykunata willaspa” (Lucas 8:1; 9:2-6).

Kay tiempopipis Jehovaj testigosnenqa kikillantataj ruwashanku. Qharis warmis ima, sumaj willaykunata tukuy sonqo willamunku. Mateo 24:14 versiculopi Jesús nerqa: “Diospa Gobiernonmanta sumaj willaykunapis jallpʼantinpi willakonqa tukuy naciones yachanankupaj, chaypachamá tukukoyqa jamonqa”, nispa.