“Diosta Rejsispaña” ¿Imatá Ruwanki?

1. ¿Imaraykutaj avionta apaykachajkuna uj listaman jina avionta sumajta qhawaykunanku tiyan?

AVIONTA apaykachajkunaqa manaraj avionta phawachishaspa, chay avión imaynachus kashasqanta yachanankupaj uj listaman jina sumajta qhawaykunku. Mana chayta ruwajtinkoqa ichapis phawashaspa pampaman chʼallparpakamunman. Astawanqa avionta unaytaña apaykachajkuna chay listaman jina qhawaykunanku tiyan. ¿Imaraykú? Imaraykuchus avionta apaykachayman yachasqaña kasqankupi atienekuspa, niña chay listaman jinachu qhawaykunkuman.

2. ¿Imatataj sapa kuti uj cristiano qhawarikunan tiyan?

² Qanpis avionta apaykachaj jinallataj, uj listaman jina qhawarikuwaj. ¿Imapaj? Chʼampaypi kashajtiykipis creeyniyki sinchʼillapuni kananpaj. Kunallanraj chayri unayña bautizasqa kajtinchejpis, imaynachus creeyninchej, Jehovata yupaychasqanchej ima kashasqanta sapa kuti qhawarikuna. Mana chayta ruwajtinchejqa Jehovawan niña allinpichu kasunman. Bibliaqa sutʼita niwanchej: “Pichus sinchʼi sayasqanta yuyakojqa allinta qhawakuchun ama urmanampaj”, nispa (1 Cor. 10:12).

3. ¿Imatataj Galaciapi tiyakoj cristianos ruwananku karqa?

³ Galaciapi tiyakoj cristianosqa creeyninku imayna sinchʼichus kashasqanta qhawarikunanku karqa. Paykunaqa Jesuspa wañuyninpi creesqankurayku Diospa rejsisqasnin karqanku, Diostaj wawasninpaj rejsikapunman karqa (Gál. 4:9). Qotuchakuymanta wakenqa Moisespa Leyninman jina kausajkunalla cheqan runas kayta atisqankuta yachachisharqanku. Chaywanpis, qotuchakuykunapi mana judío kajkunaqa ni jaykʼaj chay Leyman jinachu kausarqanku. Chayrayku, judío chayri mana judío kajkunapis qotuchakuypi ñauparinanku karqa, nitaj Moisespa Leyninta kasusqankuraykuchu Dios cheqan runaspaj qhawasqanta reparananku karqa.

¿IMASTÁ JEHOVATA REJSINAPAJ RUWANA?

4, 5. ¿Imatataj Pablo yuyaycharqa Galaciapi tiyakoj cristianosman, imaynatá chay nisqan noqanchejtapis yanapawanchej?

⁴ Galaciapi tiyakoj cristianosman apóstol Pablo yuyaychasqanqa Bibliapi qhelqasqa kashan. ¿Imapaj? Cheqa cristianos, mana cheqa yachachiykunata saqenankupaj nitaj ñaupa kausayninkuman kutipunankupaj. Pabloqa Jehová yuyaychasqanman jina, mana Galaciapi qotuchakuykunallamanchu manaqa tukuy cristianosman nerqa sinchʼita sayanallankutapuni.

⁵ Maykʼajchus Jehovaj testigosninman tukusqanchejmanta tukuy yuyarikunanchej tiyan. Kay tapuykunapi tʼukuriy: ¿Imastataj bautizakunaykipaj ruwarqanki? ¿Imaynatataj Diosta rejserqanki, imaynataj sonqoyki kasharqa Diospa rejsisqan kasqaykimanta?

6. ¿Ima listamantataj parlarisunchej?

⁶ Diospa kamachisnin kanapajqa tukuyninchej jisqʼon imasta ruwarqanchej. Chaykunataj, “Bautizakunapaj, ñauparinallapajpunitaj kaykunata ruwana” nisqa recuadropi uj listapi jina kashan. Chay listaman jina sapa kuti qhawarikuspaqa mana kay pachaj imasninman kutipusunchu. Imaynatachus unaytaña avionta apaykachaj uj listaman jina avionta qhawaykuytawan mana manchachikuspa phawachin, ajinallatataj noqanchejpis chay jisqʼon imasta qhawarikuspa Diosman cheqa sonqollapuni kayta atisun.

DIOSPA REJSISQASNENQA ÑAUPARILLANKUPUNI

7. ¿Ima yachachiyman jinataj ruwananchej tiyan, imaraykutaj?

⁷ Avionta apaykachaj runaqa avionta niraj phawachishaspa, listaman jina allinta qhawaykun. Noqanchejpis, bautizakusqanchejmantapacha imaynatachus ñauparishasqanchejta qhawarikusunman. Pabloqa Timoteoman kayta qhelqarqa: “Noqamanta cheqa yachachiyta uyarerqanki, chayta sonqoykipi allinta japʼikuy, Cristo Jesuspi kashan, chay creeywan, munakuywantaj”, nispa (2 Tim. 1:13). Chay “cheqa” yachacheyqa Diospa Palabranpi tarikun (1 Tim. 6:3, 4). Yachanchej jina, awanapajqa llijllatachus chayri phullutachus awayta munasqanchejman jina telanchej, telasqaman jinataj awanchej. Ajinallatataj cheqa yachacheyqa imatachus Dios ruwananchejta munasqanta rikuchiwanchej. Chayrayku, bautizakunapaj imastachus ruwasqanchejta, chantá chay cheqa yachachiyman jinachus manachus kausashasqanchejta qhawarina.

8, 9. 1) ¿Imaraykutaj Diosta astawan rejsina, creeypitaj wiñanallapuni? 2) ¿Imaraykutaj Diosta yupaychaypi ñauparinallanchejpuni tiyan? Sutʼinchariy.

⁸ Qhawarikunapaj listamanta ujnenqa Jehovata rejsiy. Chaytaj creeyniyoj kanapaj yanapawanchej. Chaywanpis Diosta astawan rejsina, creeypitaj wiñanallapuni (2 Tes. 1:3). Yachanchej jina, imapis wiñajtenqa mana kikillanpichu qhepakun astawanqa jatunyan. Noqanchejpis bautizakuytawan mana kikillanpichu qhepakunapaj ñauparinallanchejpuni tiyan.

⁹ Diosta yupaychaypi ñauparisqanchejtaqa sachʼa wiñasqanwan kikinchasunman. Uj sachʼaqa may jatunta wiñanman, sumaj saphichasqa kajtintaj astawanraj. Sutʼincharinapaj, Libanopi kaj cedro sachʼaqa sayayninman 37 metroskama wiñanman, sumaj saphisniyoj kanman, 12 metrosmanta astawantaj rakhuyanman (Cant. 5:15). Chay sachʼaqa aysarpakuyta tukojtinpis, mana reparayllata wiñallanpuni. Chay sachʼaqa sumaj sayasqa, imajtinchus sapa wata astawan rakhuyan, astawantaj saphichakun. Noqanchejwanpis kikillantaj kanman. Bibliamanta yachakuyta qallariytawanqa usqhayllata ñauparispa bautizakusunman. Chantá ichapis precursores kayta chayri qotuchakuypi waj ruwaykunata japʼiyta atisunman. Qotuchakuymanta hermanospis ajinata ñauparisqanchejta rikuspa kusikunku. Watas pasasqanman jinatajrí, wiñasqanchej niña sutʼichu kanman. Chaywanpis, creeypi wiñanallapuni, astawantaj Diosta rejsina, ajinamanta “wiñay tukusqa runa jina kasunchej, imaynachus Cristo kasqanman jina” (Efe. 4:13). Chantapis, mana llullu sachʼita jinallapunichu kasun, manaqa rakhu sachʼaman tukusun nisunman wiñay tukusqa cristianosman.

10. ¿Imaraykutaj wiñay tukusqa cristianospis ñauparinallankupuni tiyan?

¹⁰ Chaywanpis mana pachallanpichu qhepakuna. Diosta astawanpuni rejsina, creeyninchejtataj sinchʼiyachina, ajinamanta sumaj saphinchasqa kasun (Pro. 12:3). Qotuchakuymanta ashkha hermanosqa chayta ruwanku. Uj hermanoqa 30 watas kurajtaña anciano jina sirvishan, ñauparishallasqantapuni reparakuspataj nerqa: “Bibliata aswan sumajpaj qhawani. Bibliaj yuyaychaykunasninman jina, kamachiykunasninman jina ima waj imaspi ruwanay kasqanta reparakuni. Willayman rispapis astawan miskʼichikuni”, nispa.

DIOSWAN MASICHAKUSQAYKITA SINCHʼIYACHIY

11. ¿Imaynatataj tiempo pasasqanman jina Jehovata astawan rejsisunman?

¹¹ Chantapis cristiano jina astawan ñauparinapajqa Jehovaman astawan qayllaykunanchej tiyan, Amigonchejta jina, Tatanchejta jinataj qhawaspa. Uj wawitaqa tatanpa makinpi munasqa, jarkʼasqa ima kakun, uj sumaj amigowan kaspapis kikillantaj kanchej. Jehovaqa ajinallatataj kananchejta munan. Chaywanpis, Payta sumajta rejsinapaj, munakunapaj imaqa tiempo pasanan tiyan. Chayrayku, Palabranta sapa pʼunchay leenaykipaj kallpachakuy. Chantapis, Torremanta Qhawaj, ¡Despertad!, revistasta, waj publicacionesninchejtapis leey.

12. ¿Imatataj ruwananchej tiyan Jehovawan masichakusqanchej astawan sinchʼiyananpaj?

¹² Dioswan masichakojkunaqa paymanta tukuy sonqo mañakuspa, sumaj amigosniyoj kaspa ima astawan ñauparinku (Malaquías 3:16 leey). Jehovaj “ninrisnimpis paykunaj mañakusqankuta uyarishan” (1 Ped. 3:12). Payqa uj kʼacha tata jina mañakusqanchejta sumajta uyarin. Chayrayku “mana saykʼuspa Diosmanta mañaku[na]puni” (Rom. 12:12). Paywan masichakusqanchej astawan sinchʼiyananpajqa yanapayninta necesitanchej. Kay pachaj imasnintaqa mana sapallanchejmanta qhesachayta atisunmanchu, Diospa yanapayninta necesitanchej. Chaywanpis mana mañakojtinchejqa mana yanapawasunchu. Chayrayku tapurikuy: “¿Sonqo juntʼasqachu kani imaynatachus Diosmanta mañakusqaywan chayri aswan sumajmantachu mañakunay kanman?”, nispa (Jer. 16:19).

13. ¿Imaraykutaj ñauparinapaj hermanoswan tantakunapuni?

¹³ Jehovaqa “paypi atienekojkunata” waqaychan. Chayrayku, payta rejsispañapis qotuchakuymanta hermanoswan tantakunallapuni, pikunachus Dioswan masichakullankutaj (Nah. 1:7). Hermanoswan masichakuspaqa kay pachapi llakiylla kajtinpis sonqochayta tarisun. Chantapis “munanakuypi kawsananchejpaj, allin ruwaykunata ruwananchejpajtaj” yanapawasun (Heb. 10:24, 25). Pablo nisqanman jina purajmanta munanakunapajqa hermanoswan tantakunapuni, uj sonqollataj qotuchakuypi Diosta yupaychana. ¿Tukuy tantakuykunamanchu rishanki, chaykunapitaj parlarinkichu? Chaytaqa allinta qhawarikunayki tiyan.

14. ¿Imaraykutaj mana uj kutillachu juchasninchejmanta pesachikuna, kutirikuna ima?

¹⁴ Cristianosman tukunapajqa juchasninchejmanta pesachikorqanchej, kutirikorqanchejtaj. Chaywanpis mana uj kutillachu chayta ruwananchej tiyan. Juchasapa runas kasqanchejrayku, juchaqa uj katari jina khaniykunawanchejpaj wateqashawanchej (Rom. 3:9, 10; 6:12-14). Chayrayku sumajta qhawarikuna, nitaj ni imapi pantananchejta yuyanachu. Jehovaqa ima juchapipis mana urmanapaj kallpachakojtinchej, noqanchejwan pacienciakun (Fili. 2:12; 2 Ped. 3:9). Chayrayku tiemponchejta, kapuyninchejta ima ama usuchinachu, nitaj noqallanchejpi yuyaspa imatapis ruwayta munanachu. Uj hermana kayta qhelqarqa: “Cheqa kajman jina wiñakuspapis, mana uj cristiano jinachu Jehovata qhawarqani. Noqaqa paypi tʼukurispa mayta manchachikoj kani, ni jaykʼaj kusichinaytataj yuyaj kani”, nispa. Chay hermanaqa llauchʼiyapuspa ashkha imaspi pantarqa. Pay nin: “Jehovata munakuspapis mana sumajtachu rejserqani. Chaywanpis tukuy sonqo paymanta mañakuspa kausayniyta tijracherqani. Chantapis, Jehová uj wawitata jina makiymanta aysashawasqanta repararqani, imajtinchus chʼampaykunata atipanaypaj imatachus ruwanayta rikuchiwaspa munakuywan yanapawarqa”, nispa.

15. ¿Imatataj Jesuswan Tatanwan qhawamushanku?

¹⁵ Pedroman, waj apostolesmanwan uj ángel kay jinata nerqa: “Runasman willa[llaychejpuni] tukuy kay kawsay palabrasmanta”, nispa. Chaytaqa paykunata carcelmanta orqhosqantawan nerqa (Hech. 5:19-21). Noqanchejpis, sapa semanachus manachus willayman rishasqanchejta qhawarikunallapuni. Jesuswan Tatanwanqa imaynachus creeyninchej, willayninchej ima kashasqanta qhawamushanku (Apo. 2:19). Ñaupajpi parlarerqanchej chay anciano nin: “Willayqa ima ruwaymantapis kausayninchejpi ñaupajpi kashan”, nispa.

16. ¿Imaraykutaj Jehovaman qokusqanchejpi tʼukurinanchej tiyan?

¹⁶ Chantapis, Jehovaman qokusqaykipi tʼukurillaytaj. Paywan masichakusqanchejqa ni imawan kikinchakunchu. Payqa paypata kajkunata rejsin (Isaías 44:5 leey). Imaynachus paywan masichakusqayki kashasqanta qhawarikunaykipaj yanapayninta mañakuy. Astawanpis, ima fechapichus bautizakusqaykita ama qonqakuychu. Ajinamanta, Jehovaman qokusqayki imamantapis aswan sumaj kasqanta yuyarikunkipuni.

JEHOVAJ QAYLLALLANPIPUNI KANAYKIPAJ AMA SAYKʼUYCHU

17. ¿Imaraykutaj Jehovaj qayllallanpipuni kanapaj mana saykʼunanchejchu tiyan?

¹⁷ Pabloqa Gálatas cartanpi mana saykʼunachu kasqanta nerqa (Gál. 6:9). Kunanpis, cristianosqa mana saykʼunanchejchu tiyan, imaraykuchus chʼampaykunapi rikukusunpuni. Chaywanpis Jehová yanapawasun. Chayrayku, espíritu santonta mañakunallapuni. Ajinamanta, Jehovaqa llakiyninchejta, ñakʼariyninchejta ima tijrachenqa; kusisqa, sonqochasqa ima kakunanchejpaj (Mat. 7:7-11). Kaypi tʼukuriy: Jehovaqa pʼisqosta qhawan, mikhuchin ima; noqanchejqa Jehovata munakunchej, kausayninchejtapis payman qorqanchej. Chayrayku, ¿manachu aswan munasqa kanchej pʼisqetusmanta nisqaqa? (Mat. 10:29-31.) Ima chʼampaypi rikukuspapis ni jaykʼaj qhepaman kutirinachu. Diospa rejsisqasnin kasqanchejrayku, ¡may chhika bendicionesta japʼinchej!

18. ¿Imatataj “Diosta rejsispaña” ruwanayki tiyan?

¹⁸ Chayrayku, kunallanraj Diosta rejsispa bautizakorqanki chay, ¿imatataj ruwanayki tiyan? Jehovata rejsinallaykipuni tiyan, wiñay tukusqa cristiano kanaykipajtaj ñauparinallaykipuni tiyan. Unayña bautizasqa kanki chaypis, Jehovata astawan rejsinallaykipuni tiyan. Ama yuyaychu Jehovata sumajta rejsisqaykitañaqa. Astawanqa Paywan masichakusqayki sinchʼiyananpaj sapa kuti qhawarikuy, imajtinchus payqa Tatanchej, Amigonchej, Diosninchejtaj (2 Corintios 13:5, 6 leey).