“Ni mayqen ñanpis mana puriy atinachu, nitaj mana tukukuyniyojchu”

ARTHUR Willis chantá Bill Newlands imaqa, 1937 wata 26 de marzopi Sidney (Australia) llajtaman uj watamanta chayarqanku. Paykunaqa karuta viajasqankumanta may saykʼusqa kasharqanku. Chay iskay precursoresqa 19.300 kilometrosta jina autopi purimorqanku, chʼin nisqa lomasninta, wayqʼosninta, pampasninta ima. Paykunaqa mana chay lugaresta rejsimuyta munasqankuraykuchu rerqanku, manaqa Australiaj tukuy kʼuchusninpi Diospa Gobiernonmanta willamunankurayku.

Australia suyupeqa, 1930 wata qayllata Bibliamanta Yachaqajkuna pisilla karqanku.a Paykunataj Australia suyoj kantusninpi, juchʼuy llajtitasninpi ima willasqanku. Chay suyoj chaupinpi kaj campospirí, pisillata willasqanku. Chay camposqa chʼinlla, pisi runasllataj chaypi tiyakunku. Australiaj camposnenqa, Boliviamanta phishqa kutiswan jina aswan jatun. Hermanosqa yacharqanku Jesuspa kay kamachisqanta: “Noqamanta testigos jina willankichej [...] tukuy kay pachaj kʼuchusninkama”, nispa. Chay kamachiyta juntʼanankupajtaj, Australiaj camposninpipis willananku karqa (Hech. 1:8). Chaytaj mana atinankupaj jinallachu karqa. ¿Juntʼayta atinkumanchu karqa? Australiamanta hermanosqa tukuy atisqankuta ruwarqanku chay lugarespi willanankupaj, Jehová paykunata yanapananpitaj atienekorqanku.

PRECURSORES ÑANTA KICHARINKU

Kay 1929 watapi, Queensland chantá Australia Occidental llajtasmanta hermanosqa, Australiaj camposninpi willamunankupaj tukuy ima necesitakusqanta autosman juntʼacherqanku. Willaj rinankupajtaj wapu precursoresta ajllarqanku, auto fregakojtinpis allinchayta atejkunata. Paykunaqa maypichus ni jaykʼaj Diosmanta willakorqachu, chay lugarespi predicarqanku.

Mana autoyoj precursoresqa bicicletapi rerqanku. Chaykunamanta uj hermano, Bennett Brickell karqa. Payqa 1932 watapi 23 watasniyoj kashaspa, Rockhampton (Queensland) llajtamanta llojsispa, Australiaj patanejninman 5 killasta willaj rerqa. Bicicletanmanqa cargaykorqa, phullusta, ropata, mikhunata, librosta ima. Bicicletanpa ruedasnin thantakojtinpis, Jehová yanapananpi atienekuspa, predicaspa rillarqapuni. Predicayta tukuchananpaj 320 kilómetros jina faltashajtin, bicicletan fregarparikorqa. Jinapis bicicletan tanqarisqa predicallarqapuni. Purerqataj maypichus ñaupajta wakin runas yaku chʼakiywan wañorqanku, chay ñankunata. Hermano Brickellqa, 30 watasta Australiaj tukuy kʼuchusninman predicaj rerqa: bicicletapi, motopi, autopi ima. Payqa chay lugarmanta runasman Diosmanta yachacherqa, mosoj congregacionestataj sayaricherqa. Chay lugarpeqa may rejsisqa karqa, tukuytaj respetaj kanku.

CHʼAMPAYKUNATA ATIPANKU

Australiaqa waj suyusmanta aswan pisi runasniyoj. Camposninpitaj aswan pisi runasraj tiyan. Chayrayku Jehovaj testigosnenqa, chay lugaresmanta runasta mana saykʼuspa maskʼananku karqa.

Hermano Stuart Keltie, hermano William Torringtonwan precursores karqanku, mana saykʼuspataj willarqanku. Paykunaqa Alice Springs llajtitaman chayanankupaj, 1933 watapi Simpson nisqa chʼin lugarespi tʼiyu lomasninta rerqanku. Chay llajtitaqa Australiaj kikin chaupinpi kashan. Ajinata rishajtinku autonku fregakojtin, pachanman saqerparerqanku. Predicaj rinallankupajpuni, hermano Keltieqa camellopi montaykuspa rerqa. Paypa ujnin chakenqa postizo karqa. Chay purisqankoqa mana qhasichu karqa. Imaraykuchus William Creek nisqa tren sayanapi, Charles Bernhardtta rejserqanku. Payqa chay karu lugarpi uj alojamientoyoj karqa. Chay runaqa Diospa Palabranta japʼikuspa, alojamientonta venderparqa, precursormantaj tukorqa. Hermano Bernhardtqa, Austrialiaj karu lugaresninpi tiyakoj runasman 15 watasta sapan predicarqa.

Jaqay tiempomanta precursoresqa, chʼampaykunata atipanankupaj wapu kananku karqa. Ñaupajta parlarerqanchejña hermano Arthur Willismanta, hermano Bill Newlandsmantawan. Paykunaqa Australiaj camposninman yaykushaspa, iskay semanaspi 32 kilometrosllata predicarqanku. Imajtinchus manchayta parasqanrayku, ñanqa tʼurulla karqa. Wakin kutisqa manchay qʼoñi pʼunchaypi, may saykʼuyta autota tanqananku karqa uj tʼiyu lomata wasaykuchinankupaj. Wakin kutistaj tʼiyu juntʼa mayusta, chayri jatun rumismanta juntʼa lugaresta pasananku karqa. Autonkoqa sapa kuti fregakoj. Sapa fregakojtintaj, repuestosta maskʼaj chakipi chayri bicicletapi rej kanku aswan qaylla llajtitaman. Wakin kutisqa chay llajtitaman ashkha diaspi chayaj kanku. Chayman chayaspataj autonkupaj repuestota semanasta suyakoj kanku. Jinapis kusisqallapuni kaj kanku. Hermano Arthur Willisqa, The Golden Age (kunantaj ¡Despertad!) revistapi rikhurej palabrasta oqharispa nerqa: “Jehovaj testigosninpajqa ni mayqen ñanpis mana puriy atinachu, nitaj mana tukukuyniyojchu”, nispa.

Hermano Charles Harrisqa ashkha watasta precursor karqa. Payqa sapallan chʼin pampaspi kaspa, astawan Jehovaman qayllaykorqa. Pay nerqa: “Pisi imasllawan kausakuy aswan allin. Jesusqa wakin kutis cielopi chʼaskasta qhawaspa puñoj, noqanchejpis kusisqa kana tiyan Diosmanta willamunarayku wakin kutis kikinta puñunanchej kajtenqa”, nispa. Ashkha precursorestaj ajinata ruwarqanku. Mana saykʼuspa willasqankurayku, sumaj willaykunaqa Australiaj tukuy kʼuchusninman chayarqa. Ashkha runastaj Diospa Gobiernonpa kamachiyninta ajllarqanku.