3. Llakiyninchej mana tukukojtin

Wakin llakiykunaqa kanqapuni, nitaj ni imata ruwayta atisunmanchu chay llakiykuna chinkananpajqa. Ichapis familiaykimanta pillapis wañupun chayri sinchʼi onqoyniyoj kashanki. Chay jina llakiyniyoj kaspaqa, ni imata ruwayta atinkiñachu llakiyniykita chinkachinaykipaj. Ajina llakiypi rikukuspa, ¿Biblia yanapasunkimanchu?

SINCHʼI ONQOYKUNA

Rosa sutiyoj warmi nin: “Onqosqeta nacekorqani, tukuy cuerpoy mayta nanallawanpuni. Chayrayku mana imatapis ruwayta atillanichu”, nispa. Rosaqa Bibliata, librosta, revistasta ima leeshaspa mana umanpi japʼiyta atillajchu. Paytaqa mayta kallpacharqa Mateo 19:26 nisqan. Chaypi nin: “Diospajrí tukuy imapis atikullan”, nispa. Rosaqa Bibliata, librosta, revistasta ima grabasqapi uyariyta atikusqanta yacharqa. Chayraykutaj chaykunata uyariyta qallarerqa.a Pay nillantaj: “Manachus chay grabaciones kanman chayqa, Jehovamanta karunchakuyman karqa”, nispa.

Rosa manaña ñaupajpi jina ruwayta atisqanmanta llakikojtin, 2 Corintios 8:12 nisqan mayta sonqochan. Chaypi nin: “Sichus pipis sonqomantapacha imatapis qon chayqa, Diosqa chayta allinpaj qhawan. Imaraykuchus payqa suyan, sapa uj atisqanman jina qonanta, nitaj mana atisqanman jinachu”, nispa. Kay versiculopi nisqan payta mayta kallpachan. Imajtinchus Rosaqa yachan, Jehová Diosqa atisqanman jinalla ruwasqanta allinpaj qhawasqanta.

FAMILIANCHEJMANTA PILLAPIS WAÑUPOJTIN

Anamanta ñaupaj yachaqanaspi parlarerqanchejña. Pay jinata nin: “Wawayqa 18 watasniyoj wañuporqa. Wañupusqanraykutaj may llakisqa, sonqo pʼakisqataj kasharqani. Wañupuyta munarqani. Kausayneyqa mana ñaupajta jinañachu karqa”, nispa. Anataqa Salmo 94:19 mayta kallpacharqa. Chay salmota qhelqajqa Diosman ajinata nerqa: “Sonqoy ukhupi ashkha llakiyniyoj kashajtiy, sonqochawasqaykeqa almayta kusicherqa”, nispa. Pay nillantaj: “Jehovamanta mañakorqani imallatapis ruwanaypaj yanaparinawanta. Ajinamanta llakiyniyta qonqanaypaj”, nispa.

Anaqa wajkunata yanapaj churakorqa, chayta ruwaspataj sonqo juntʼasqa karqa. Pay nerqa: “Wawas pintanankupaj coloresninkuman rijchʼakorqani. Pʼakisqa colorespis pintanapaj sirvinraj. Noqataj chay pʼakisqa colores jina kani. Imajtinchus llakisqa kaspapis, wajkunata yanapayta atiniraj”, nispa. Pay nillantaj: “Bibliamanta yachakojkunata Bibliawan sonqochajtiy, reparakoj kani Jehová noqatapis sonqochawasqanta”, nispa. Anaqa uj listata ruwakorqa. Chay listaman churarqa, pikunachus llakiykunasniyoj kaspapis Jehová Diosta yupaychallarqankupuni, chaykunata. Chayta ruwaspa, ¿imatá yachakorqa? Payqa yachakorqa, “chay runas Diosmanta mañakuyta yachasqankutapuni”. Ana nin: “Bibliata mana leespaqa, ni ima yanapata tariyta atisunmanchu”, nispa.

Bibliata estudiashaspa, Anaqa yachakullarqataj llakiykunasninpi yuyananmantaqa imachus aswan qhepaman kananpi yuyananta. Anata mayta kallpachan Hechos 24:15 nisqan. Chaypi nin: “Cheqan runasta, mana cheqan runastapis Dios kausarichimunanta”, nispa. Jehová Dios, ¿Anaj wawanta kausarichimonqapunichu? Chay tapuyman Anallataj kutichin. Pay nin: “Mana iskaychakunichu waway kausarimunanmanta. Jehová Diosqa yachanña maykʼajchus paywan tinkukapunayta. Wawitay nacekusqantaqa kunankama yuyarikuni. Ajinallatataj yuyayniypi rikushaniña wawaywan tinkukapushasqayta, wasi patioypi parlarishasqaytapis”, nispa.

a Chay grabacionesqa Internetpi jw.org nisqapi tariyta atinki.

Bibliaqa sinchʼi llakiypi kashajtinchejpis sonqochawasunman

¿IMAYNATÁ DIOSNINCHEJ YANAPAWASUNMAN?

Bibliallataj nin: “Diosqa payta wajyakojkunaj qayllampi kashan, pikunachus cheqa sonqowan payta wajyakojkunaj qayllankupi. Payta manchachikojkunaj munarisqankuta juntʼan; yanapata mañakusqankuta uyarispa, paykunata salvan”, nispa (Salmo 145:18, 19). Chay nisqanqa, ¡mayta sonqochawanchej! Diosmanta yanapata mañakojtinchej, ¿imaynatá pay yanapawanchej?

KALLPATA QOWANCHEJ

Llakiykunaqa phutichiwasunman, onqochiwasunman, Diosmantataj karunchawasunman (Proverbios 24:10). Jinapis Jehová Diosqa “saykʼusqa kajta astawan kallpachan, pisi kallpayojmampis kallpata qon” (Isaías 40:29). Apóstol Pabloqa ashkha llakiykunapi rikukorqa. Pay nerqa: “Tukuy imapaj kallpayoj kani, Dios atiyta qowasqanrayku”, nispa (Filipenses 4:13). Diosqa apóstol Pablota atiyninwan kallpacharqa. Diosninchejqa paymanta mañakojtiyki, qantapis kallpachallasunkimantaj (Lucas 11:13).

YACHAYTA QOWANCHEJ

Ichá Bibliaj ujnin yuyaychayninta mana entiendenkichu chayri imaynatachus chayman jina ruwanaykita mana yachankichu. ¿imatá ruwawaj? Jesuspa yachachisqan Santiagoqa nerqa: “Sichus qankunamanta pillapis pisi yachayniyoj chayqa, Diosmanta mañakullachunpuni. Diostaj yachayta payman qonqa. Imaraykuchus Diosqa tukuyman mana michʼakuspa qon, mana rimaspallataj”, nispa (Santiago 1:5). Diosninchej mañakusqanchejta qonawanchejpajqa, Bibliata leena tiyan, yachakusqanchejman jinataj kausakuna tiyan (Santiago 1:23-25). Chayta ruwaspaqa, Bibliaj yuyaychasqan sumaj kasqanta reparanki.

SONQO TIYAYKUYTA QOWANCHEJ

May jina phutisqa kashajtinchejpis, Jehová Dios yanapawasunman. Bibliapi niwanchej: “Ama imamantapis llakikuychejchu. Astawanpis tukuy imapaj Diospa yanapayninta mañakuychej. Paymantaqa tukuy sonqo mañakuychej, rogakuspa, graciasta qospataj. Diostaj sonqo tiyaykuyta qosonqachej, mayqentachus runas mana entiendeyta atinkuchu, chayta. Ajinamanta payqa sonqoykichejta, yuyayniykichejtawan, Cristo Jesusnejta waqaychanqa”, nispa (Filipenses 4:6, 7). Qanpis Jehová Diosmanta mañakuwaj, sonqoykita tiyaykuchinanpaj.

Ichapis llakiykunasniyki mana tukukonqachu. Jinapis ama niychu: “Diosqa qonqapuwan”, nispa. Jehová Diosqa aguantananchejpaj yanapawasunman, kallpachawasunmantaj (1 Corintios 10:13). Biblia nillawanchejtaj, tumpamantawan tukuy llakiykuna wiñaypaj chinkananta.