Kallpayuq jarkʼaq imasta tukuchina
1 Satanasqa, kay chhika unaytaña, achkha runasta, sunqunkupi, yuyayninkupi chiqa yachaykunata mana yachanankupaq, llulla yachachiywan chʼawkiyan, chaypaqtaq Trinidadta, alma mana wañusqanta, ukhu pachapi ñakʼariy kasqanta ima, rikhurichin. Chantapis, runata iskaychachillantaq Dios mana kasqanta, Biblia mana chiqachu kasqanta yuyanankupaq, mana chayllachu Satanasqa, runas suyunkuta munakunankuta, wak suyumanta runastataq chiqninankuta ima, munan. Kay yachachiykunataq, Diospa chiqa yachachiynin runap sunqunkuman mana yaykunanpaq jarkʼan (2 Cor. 4:4, Qheshwa Biblia). ¿Imaynatataq kallpayuq jarkʼaq imasta tukuchisunman? (2 Cor 10:4, 5, DIOS PARLAPAWANCHEJ.)
2 Runa sunqunpi yuyasqan. Imatachus, runap creesqasninkuqa sunqunkupi saphichasqa, imaptinchus wakinkunaqa wawamantapacha chayta creenku. Paykunata yanapayta munanchik chayqa, chay yuyasqankuta mana pisipaqchu qhawananchik tiyan (1 Ped. 3:15).
3 Runata jatunpaq qhawaspaqa, imapichus creesqanta, imaraykuchus jinata creesqanta sutʼinchawasqanchikta ima, allinta uyarisun (Sant. 1:19, 20). Chay runa ichapis alma mana wañusqanta creen, imaraykuchus familianmanta pillapis wañupusqanta, watiqmanta rikuyta munasqanrayku. Chayri raymichakun familianwan khuska kanankupaq. Chayrayku allinta uyarispaqa imatachus yuyasqanta entiendesunchik, jinamanta chay runasta yanapayta atisunchik (Pro. 16:23).
4 Jesusjina ruwana. Jesús imaynatachus leymanta yachachiq juk runa tapuptin kutichisqanta qhawarina. Pay sutʼita kutichinman karqa chayqa, chay runaqa jukjinata creesqanrayku mana japʼikunmanchu karqa. Chayrayku Jesusqa Diosmanta Qhillqasqapi nisqanmanjina tapurqa, chantá juk kikinchaywan tʼukurichirqa (Luc. 10:25-37).
5 Diospa Palabranqa, llulla yachachiykuna runap sunqunpi may saphichasqa kaptinpis, tukuchinman (Heb. 4:12). Pacienciayuq kasunchik chayqa, runaspa sunqunkuman chayasunchik, ichapis, chay runasta chiqa kaqta riqsispa llulla yachachiymanta kacharichisqa kanankupaq yanapasunman (Juan 8:32).