Yachakuqta, churanakuyta atipananpaq wakichiy
1 Pichus Bibliamanta yachakuyta qallariq, ‘chiqantataq kawsakuyta munaqqa’, Satanás, paywan astawan churanakunanta, yachanan tiyan (2 Tim. 3:12). Ichá payman, llamkʼayninpi, yachaywasipi, wasin qayllapi tiyakuqkuna ima, churanakunkuman. Ichá familiaresnin allinninta maskʼaspa churanakuptinku, mana atillanmanchu yachakullaytapuni (Mat. 10:21; Mar. 3:21).
2 Willakurqaña. Yachakuyta qallariqkunaqa, churanakuy kananta yachananku tiyan. Chantapis, churanakuy rikhuriptinqa, chiqamanta Jesuspa qhipanta richkasqanta rikuchin (Juan 15:20). Wakin kuti runasqa mana chiqata yachaspalla, Jehovamanta sutʼinchaqkunawan churanakunku. Chantapis, Jesuspa qhipanta risqanchikrayku, Diosta kasukusqanchikrayku ima, asipayawaptinchikqa mana llakikunapaqchu kasqanta yuyarichinanchik tiyan (Hech. 5:27-29, 40, 41). Jehová Tatanchik munakuywan yanapawasqanchikta yuyarichiy (Sal. 27:10; Mar. 10:29, 30). Jehová Diosman juntʼa sunqu kaspaqa, paylla allin kamachiq kasqanta rikuchichkasqanta, yachachun (Pro. 27:11).
3 Chiqa kaqta yachananqa, may sumaq. Ima chʼampaykunapis kachun, yachakuqqa, chiqa kaqta yachakullaypuni may sumaq kasqanta, mana qunqananchu tiyan. Satanasqa, churanakuywan, chiqa yachaykuna runap sunqunpi saphichakunanta, mana munanchu (Pro. 4:23; Luc. 8:13). Chayrayku, imatachus Biblia chiqamanta yachachisqanta, yachakunallanpuni tiyan, ajinamanta iñiynin sumaqta saphichakunqa (Sal. 1:2, 3; Col. 2:6, 7).
4 Muchunan tiyan. Ima chʼampaytapis atipanapaq muchunanchik tiyan, tukukuptintaq may sumaq ruwasqanchik rikukunqa (Luc. 21:16-19). Muchuspa churanakuyta atipasqanmantaqa, mana yachakuyta qallariqkunallachu tʼinkayuq kanku, manaqa wakkunapis: tukuypis imaynatachus Jehová, sinchita sayaqkunata, chiqa sunqu runata ima, tʼinkasqanta rikuyta atinku (Sant. 1:12).
5 Apóstol Pabloqa, Tesalonicamanta hermanos Diosta yupaychaypi wiñasqankumanta, mayta kusikurqa, paykunamantaqa may chhika paywan yachakurqanku, chayrayku Diosman graciasta qurqa (2 Tes. 1:3-5). Ñuqanchikpis, Bibliamanta yachakuqkunata, churanakuyta muchunankupaq wakichispaqa, payjina sunqu juntʼasqa kayta, kusiyta ima tariyta atisunchik.