¿Imaraykutaj “sonqo juntʼasqa” kanchej?
1. ¿Imaraykutaj sapa killa tukukuyta sonqo juntʼasqa kanchej?
1 Sapa killa tukukuyta informesninchejta saqejtinchej, sonqo juntʼasqa, kusisqa kanchej (Gál. 6:4, 5). Precursores especiales jina 130 horasta willaspapis chayri 15 minutosta willaspapis, tukuy sonqo chayta ruwaspaqa, sonqo juntʼasqa kananchej tiyan (Sal. 100:2).
2. ¿Imasraykutaj Jehovallaman tukuy atisqanchejta qonanchej tiyan?
2 Tukuyta Kamachej Jehovalla tukuy atisqanchejta qonapaj jina (Mal. 1:6). Munakusqanchejraykutaj munayninta ruwanapaj kausayninchejta qonchej. Chayrayku pʼunchay tukukuyta chayri killa tukukuyta, Diospa Reinonmanta willamunapaj tukuy tiemponchejta, kallpanchejta, kapuyninchejta ima “ñaupajta” churaspa sonqo juntʼasqa kanchej (Pro. 3:9, Qheshwa Biblia). Chantapis Jehovapaj astawan llankʼayta atisqanchejta reparakuspaqa, allin kanman imaynatachus chayta ruwanata qhawarikunanchej (Rom. 2:15).
3. ¿Imaraykutaj wajkunawan kikinchakuy mana allinchu?
3 Ama wajkunawan kikinchakunachu. Wajkunawan kikinchakunanchej, ñaupajpi imatachus ruwarqanchej chaykunapi yuyananchej imaqa, mana allinchu. Tukuypata kausayninchej tijrakunman, manataj tukuychu kikin imasta ruwayta atinchej. Chayrayku wajkunawan kikinchakoyqa, purajmanta phiñanakuyta, jatunchakuyta, envidiawan qhawanakuyta ima apamunman (Gál. 5:26; 6:4, 5). Jesusqa, mana ni jaykʼaj wajpa ruwayninta wajpa ruwasqanwan kikicharqachu. Astawanqa, imatachus ruwayta atisqankumanta allinta ruwasqankuta nerqa (Mar. 14:6-9).
4. Jesuspa talentosmanta rijchʼanachinamanta, ¿imatá yachakunchej?
4 Jesuspa, talentomanta rijchʼanachinanpi, patronqa, sapa uj kamachinman talento qolqeta “atisqankuman jina” qorqa (Mat. 25:15). Patron unaymanta kutimuspataj, cuentata mañarqa, usqhayllata atisqankuman jina llankʼajkunaqa, patronninkoj kusiyninman yaykorqanku (Mat. 25:21, 23). Noqanchejtapis, Diospa Reinonta willanapaj tiemponchejta churasun chayqa, Jehová allinpaj qhawawasun sonqo juntʼasqataj kasunchej.