Experiencias

◼ Australia. Juanqa allin yachayniyoj runa karqa. Wawa kashaspa iglesiaman rej, qhepamantaj “niña Diospi creerqachu”. Jinapi, uj precursor ¿Es la vida obra de un Creador? folletota jaywarqa. Qhepanpitaj, El origen de la vida folletota aparqa. Juan astawan yachakuyta munananpajtaj, sapa llojsimoj revistata apaj. Chantá Bibliaj profeciasninmanta, chayri tukuy ima ruwajniyoj kasqanmanta parlaj yachaqanasta rikuchej. Bibliaj yachachisqanta japʼikunanpaj jinaña kajtintaj, precursorqa La Biblia... ¿la Palabra de Dios, o palabra del hombre? librota jaywarqa. Juanqa, chayta leeytawan Dios kasqanpi creeyta qallarerqa. Precursortaj Yachachin libroj 20 paginanpi 8 parrafota rikucherqa. Chantá 23, 24 paginaspi 13-16 parrafostañataj rikucherqa. Chaypi rikhurej textosqa, Juanta tʼukucherqa. Chayraykutaj nisqa: “Ichapis Bibliata ujtawan leerinay tiyan”.

◼ México. Uj runa, uj hermanoman nisqa: “Mana creenichu Biblia Diospa yuyaychasqan kasqanta”, nispa. Hermanotaj, Biblia Diospa yuyaychasqanpuni kasqanta rikuchiyta atisqanta nisqa. Waj kutispi parlarisqankutawan, Bibliaj yuyaychasqan sonqonman chayayta qallarisqa. Astawanraj Diospa kamachiykunasnenqa. Chayrayku hermanoman nisqa: “Bibliata leeriyta qallarishajtinchej, mayqen libroj yuyaychaynin jinalla kasqanta yuyarqani. Kunanrí, Bibliata sapa leejtinchej sonqoy juchachawan, astawanraj llimphu kausayniyoj kanamanta parlajtin”.

◼ Estados Unidos. Uj qhariwarmi, ashkha runas purinku chaypi publicacionesniyoj carritowan willasharqanku. Jinapi Taywanmanta uj warmi paykunaman qayllaykusqa. Payqa Diospi creespapis, Biblia mana suyun ladomanta runaspajchu kasqanta yuyarqa. Tukuy imayoj kaspapis, mana sonqo juntʼasqachu kausaj. Chayrayku Biblia yanapananta yuyaspa hermanosman qayllaykusqa. Paykunataj Yachachin librowan, Cómo hallar paz y felicidad duraderas folletowan ima, yachachiyta qallarisqanku. Libroj 2 yachaqananta sutʼinchanankumantaqa, folletopi “Una guía para toda la humanidad”, nisqata sutʼinchasqanku. Sojta parrafota ukhunchajtinkutaj, warmeqa Biblia ni mayqen librowan kikinchakusqanta nerqa. Bibliaj profeciasnin imaynatachus juntʼakusqanta yachaspataj, nisqa: “Ni mayqen libropis Biblia jina mana pantaj kanchu”, nispa.

◼ Japón. Uj hermanoqa, Diospi mana creej runata waturellajpuni. Sapa rispataj, ¡Despertad! revistapi “¿Casualidad o diseño?”, nisqa yachaqanata rikuchej. Chay runaqa, pisimanta pisi yuyayninta tijracherqa. Nerqataj: “Ichá tukuy imata ruwaj kanpuni”, nispa. Kunanqa chay runa Diospi creen. Hermanotaj, ¡Diosmanta jamoj sumaj willaykuna! folletowan yachachishan.

◼ Canadá. Uj warmi autonman wicharinan kashajtin, uj hermana chay killamanta revistasta jaywasqa. Waturej kutejtintaj, chay warmeqa Diospi mana creesqanta, nitaj yachallaytapis munasqanta nisqa. Jinapis hermanaqa, ¿Sunqu juntʼasqa kawsayta tarisunmanchu? folletowan kutisqa. Nisqataj: “Diospi mana creesqaykita yachaniña. Jinapis wawitasniykita sapallayki uywashasqaykipi tʼukurisharqani, yanapaytataj munayki”, nispa. Chantá hermanaqa, chay warmiman folletoj 4 paginanpi 6 parrafota rikucherqa. Chaypeqa sumaj yuyaychaykunata mana tariyta atikusqallanta nin. Chantá chay warmiman folletoj 2 yachaqananta leerinanta nisqa, maypichus imaynatachus wawasta uywanamanta parlan. Chay warmeqa folletota kusiywan japʼikusqa.