Ama qonqakunachu machu runasta qhawana wasispi tiyakojkunamanta
1. ¿Imaraykutaj machuyasqa runasmanpis willamunanchej tiyan?
1 Sapa kuti astawan runas machuyanku, imaymana nanaykunawantaj tinkunku (Ecl. 12:1-7). Paykunamanta ashkhas, machu runasta qhawana wasispi tiyakunku. Wakintajrí wawasninkuwan chayri waj familiasninkuwan tiyakoj ripunku. Imayna kajtinpis, mana paykunata wasimanta wasi willaspa tariyta atillanchejchu. Machuyasqa runasqa, yuyayninku chayri kallpanku pisiyasqaña kajtinpis, Jehovata rejsiyta, jatunpaj qhawayta, munakuyta ima atinkumanraj. ¿Imaynatá paykunaman “kusiy pʼunchay chayamunanta” willamusunman? (Tito 2:13.)
2. Machu runasta qhawana wasis maypichus kasqanta yachanapaj, ¿maypitaj maskʼasunman?
2 ¿Imaynatá qallarisunman? Machu runasta qhawana wasis maypichus kasqanta yachanapaj, directorio telefónico nisqapi “residencias de ancianos”, “clínicas geriátricas” chayri “asilos” nisqata maskʼasunman. Superintendente de servicio nisqa hermanotaj, chay wasisman rinankupaj allin wakichisqa hermanosta ajllanman. Allinta wakichikojtinku, Jehovapi atienekojtinku ima, uj qotuman Bibliamanta yachachiyta atinkuman (Pro. 21:5; 1 Juan 5:14, 15).
3, 4. 1) ¿Piwan parlarisunman uj qotitupi Bibliamanta yachachinapaj? 2) ¿Imaynatá sutʼinchasunman Bibliamanta yachachej risqanchejta?
3 ¿Imaynatá machu runasta qhawana wasispi Bibliamanta yachachisunman? Jatun kajtenqa, nisunman chaypi ashkha machitus tiyakojtinku, llankʼajkunapis ashkha kajtinkoqa, visitasta atiendejta encargadowan parlariyta munasqanchejta nisunman. Juchʼuylla kajtintaj, nisunman pisi machituslla tiyakojtinku, llankʼajkunapis iskay chayri kinsalla kajtinku, dueñowan parlasunman.
4 Paykunawan parlarishaspa, Bibliata leeyta chayri yachachiyninmanta parlariyta munajkunata kallpacharej risqanchejta willana. Chantá tapurisunman: “Kaypi tiyakojkunamanta, ¿pillapis sapa semana 30 minutosta uj qotitupi Bibliamanta parlariyta munanmanchu?”, nispa. Mayqen publicacionwanpis yachachiyta atisunman. Wakin hermanosqa, Biblia yachachisqanmanta librituy, El hombre más grande de todos los tiempos nisqa libroswan yachachinku. Allin kanman, ima publicacioneswanchus yachachisun chayta, chay wasita kamachejmanraj rikuchinanchej. Ima pʼunchaychus, ima horachus, maypitajchus tantakuyta ruwananchejta paywan parlasunman (chaytataj machitusman willayta yachanku). Mana manchachikuspa, Jehovaj testigosnin kasqanchejta willana. Chantapis encargadoman sutʼincharina, runasta Bibliamanta yachakunankupaj yanapaj risqanchejta, manataj misata chayri chayman rijchʼakoj tantakuyta ruwanapajchu.
5. ¿Imaynatá qotitupi yachakoj machitusta yanapanapaj jina yachachisunman?
5 ¿Imaynatá yachachisunman? Mana tukuy lugarespichu kikinta ruwayta atikonqa. Chayrayku allin yuyayniyoj kana, manataj yuyasqanchejman jinapuni ruwakunanta suyanachu. Yachachej hermanoqa, ima publicacionwanchus yachachenqa chayta ashkhata apakunan tiyan. Chantá yachachiyta tukuytawan mañakapunman. Munajkunapaj jatun letrasniyoj publicacionestapis apanman. Yachachishaspa leeyta munajkunawan, atejkunawan ima parrafosta chayri yachaqanasta leechinman. Chantá parlarinankupaj tapuykunata ruwanman. Yachachishaspa kʼachas kana, kusiywan parlana, kallpachanapaj jinataj. Directorpa permisonta mañakuspa, Bibliamanta videosta rikuchisunman, mayqenkunachus Bibliaj uj yachachiyninta sutʼinchanku chayri Bibliapi atienekunapaj yanapanku chayta. Yachachiyta qallarinapaj, tukuchanapaj ima Diosmanta pisi palabrasllapi mañakusunman. Wakin hermanosqa Reinomanta takiykunatapis takichinku.
6. Pillapis churanakojtin, ¿imatá ruwasunman?
6 Imata leesqanchejwan chayri nisqanchejwan pillapis churanakojtin, ¿imatá ruwasunman? Kʼacha simiwan kutichina (Col. 4:6). Ichapis tapuyninman kutichinapaj uj versiculota leeripusunman. Chay rato kutichinanchej mana walejchu kanqa chayqa, tapukojta parlarisqanmanta agradecena. Chantá nisunman: “Tukuytawan ukhuncharisunman”, nispa.
7. Astawan yachayta munaspa pillapis tapuwajtinchej, ¿imatá ruwasunman?
7 Wakin kutispi pillapis astawan yachayta munaspa, ichá imallatapis tapuriwasun. Jinata tapojtinku, uj hermana niyta yachan: “Tapuyniykeqa may sumaj. Kay leesqanchejta tukuytawan tapuyniykiman kutichisunchej, ¿ya?”, nispa. Munajkunaman waj horapi, waj lugarpi ima Bibliamanta yachachisunman.
8. Uj qotuman chayri uj runaman Bibliamanta yachachispa, ¿imaynatá yupananchej tiyan?
8 Allin kanman, kikin hermanosllapuni sapa qotituman yachachej rinanku. Tukuyninkutaj mashkha horastachus yachachisqankuta informepi willankuman. Ashkha kutista yachachiytawan, yachachej hermanoqa informepi uj estudiota jina yupanman, sapa yachachisqantataj uj revisitata jina. Mayqen machitumanpis Bibliamanta sapallanpi yachachispaqa, imaynatachus informepi churanchej ajinata yupakonqa.
9, 10. Machitusta qhawana wasispi yachachejkuna, ¿imaynataj kananku tiyan?
9 Rillaypuni. Kikin diallapipuni, kikin horapitaj qotituman yachachinanchej tiyan. Machitusta qhawana wasispi yachakojkuna, chaypi llankʼajkunapis, sapa semana kikin horasllapipuni ruwakunanta munanqanku. Chantapis maychus tiemponpi qallarinanta, tukukunanta ima suyanqanku (Mat. 5:37). Chayrayku parlasqanchejta juntʼana, maychus kajtataj imatapis ruwana. Rikukusqanman jina, aswan allin iskay hermanos uj qotituta atiendenanku (Ecl. 4:9, 10). Wakin lugarespeqa, ashkha kasqankurayku ichapis aswan hermanos necesitakonqa.
10 Kʼachas kanachej, wajkunaj allinninkutataj maskʼana (Fili. 2:4). Ñaupaj kutipeqa, jamojkunata rejsinapaj tiempochakuna. Sutisninkuta qhelqakuna, amataj qonqanachu. Wakin machitusqa sutisninkuta qonqajtinchej, mana jatunpaj qhawaspa parlapayajtinchej ima phiñakunku. Pacienciayoj, khuyakuyniyojtaj kajtinchejqa, kusikonqanku, munakusqanchejtataj reparanqanku.
11. ¿Imaynatá rikuchisunman machituspa familiankuta, llankʼajkunata ima jatunpaj qhawasqanchejta?
11 Llankʼajkunata, machituspa familiasninkutapis kʼachamantapuni parlana, allinpajtaj qhawana. Ima horaspichus yachachishanchej chayta tijrayta munaspaqa, encargadowan ñaupajta parlana. Chantapis sapa atikojtin, yachachikushasqan imaynachus rijchʼasqanta tapuriy. Machituswan tantasqa kashajtinchej, mayqen familiarninkupis jamun chayqa, sutinchejta, imaraykuchus yachachishasqanchejtapis willarina. Machitusta yanapayta munasqanchejta rikuchina, atispataj qhepakunanta nisunman.
12, 13. Machitusta qhawana wasispi willakusqanmanta, ¿imatataj wakin runas ninku?
12 Willasqankumanta parlarinku. Machu runasta qhawana wasispi willajkuna, jinallataj qotuchakuykunata waturejkunapis, may allin risqanmanta parlarinku. Uj lugarpi hermanosqa, ñaupaj kutipi 20 machitusta jina yachachinapaj tantasqanku. Paykunamanta sojtataj Bibliamanta sapallankupi yachachinankuta munarqanku. Uj señorataj bautizakorqapuni. Waj lugarpitaj, uj señoraqa 85 watasniyoj kaspapis, Bibliamanta yachakuspa tantakuykunaman rej, bautizakuytataj munarqa. Waj lugarpi, machu runasta qhawana wasipi llankʼajkuna, chay lugarpi ruwaykunata pisiyachisharqanku, niña Bibliamanta yachachinankuta munarqankuchu. Chaywanpis machitusqa directorman willakorqanku. Chayraykutaj hermanosta watejmanta yachachinankuta saqerqanku, 25-30 machitustaj tantakoj kanku.
13 Machitusta munakuywan yanapasqanchejtaqa, mana paykunallachu reparanku, manaqa paykunata qhawajkunapis. Chayrayku machitus yachakushajtinku, paykunapis uyarikunku, parlarinku ima. Machitusta yanapasqanchejta, munakusqanchejta ima, waj runaspis reparallankutaj (1 Ped. 2:12). Uj encargadoman imaraykuchus machitusman Bibliamanta yachachisqanchejta sutʼinchajtinku, pay nerqa: “¡Ñaupajmantaña jamuwajchej karqa! ¿Maykʼaj qallariwajchej?”, nispa. Waj encargadapis jinata qhelqarqa: “Kay llajtapi tukuy machitusta qhawana wasisman niyman Jehovaj testigosninta uyarinankuta. Paykunaqa runasta yanapayta munasqankurayku, manataj qolqeraykuchu yachachinku”, nispa. Hawai llajtapitaj, Jehovaj testigosninman uj diplomata jina qosqanku. Chaypitaj hermanos paykunapaj “may valorniyoj” kasqankuta qhelqasqanku.
14. ¿Imaraykutaj machu runasta qhawana wasispipis willayta munanchej?
14 Jehovaqa machitustapis payta jatunchanankupaj wajyarin (Sal. 148:12, 13). Chay wajyariytaj, machu runasta qhawana wasipi tiyakojkunapajpis. Maypichus willanki chaypi, ¿kanchu chay jina wasis machitusman sumaj willaykunata willanaykipaj? Ancianospa chantá chay wasispi encargadospa yanapayninkuwan, chay lugarespi machitusmanpis willayta atisun. Paykunamanta mana qonqakuspaqa, Jehová jina ruwashasqanchejta rikuchisun (Sal. 71:9, 18).