Cristiano Kausayninchej tantakuypaj referencias
4-10 DE FEBRERO
BIBLIAMANTA SUMAJ YACHACHIYKUNA | ROMANOS 1-3
“Sonqonchejta yachachinallapuni”
(Romanos 2:14, 15) Mana judío kajkunaqa mana leyniyoj kaspapis, paykuna kikinkumanta leypa kamachiyninman jina ruwanku. Chay runasqa mana leyniyoj kaspapis, paykuna kikinkupaj ley kanku. 15 Paykunaqa ruwasqankuwan rikuchinku, leyqa sonqonkupi qhelqasqaña kasqanta. Paykunataqa kikin sonqonku reparachin, ruwasqanku allinchus manachus kasqanta.
lvs-S pág. 18 párr. 6
Diospa ñaupaqenpi llimphu sonqoyoj kana
6 Diosta mana yupaychaj runaspis reparayta atinku imachus allin, imatajchus mana allinchu kasqanta. Chayrayku Biblia nin: “Paykunataqa kikin sonqonku reparachin, ruwasqanku allinchus manachus kasqanta”, nispa (Romanos 2:14, 15). Ashkha runasqa runata wañuchiy chayri suwakuy jucha kasqanta yachanku. Jinapis Jehová Dios munasqanman jina allin kajta ruwashanku. Diospa yuyaychaykunasninman jinataj allin kajta ajllashanku.
(Romanos 2:15) Paykunaqa ruwasqankuwan rikuchinku, leyqa sonqonkupi qhelqasqaña kasqanta. Paykunataqa kikin sonqonku reparachin, ruwasqanku allinchus manachus kasqanta.
lvs-S págs. 19, 20 párrs. 8, 9
Diospa ñaupaqenpi llimphu sonqoyoj kana
8 Wakin runasqa munasqankuta ruwaspa allin kajta ruwasqankuta yuyanku. Paykunaqa yuyanku munasqallankuta ruwananku kasqanta. Jinapis pantaj runas kasqanchejrayku mana allin imasta ruwayta munasunman, sonqonchejtaj engañawasunman. Chayrayku Bibliaqa nin: “Tukuy imamanta nisqaqa runaj sonqonmin aswan chʼawka, nitaj chaypaj jampi kanchu. Pitaj chayta entiendeyta atinmanri?”, nispa (Jeremías 17:9). Chayrayku mana allin kajtaqa, allillanpaj qhawayta qallarisunman. Apóstol Pabloj kausayninpi tʼukurina. Payqa niraj cristiano kashaspa Diospa kamachisninta mana khuyarikuspa qhatiykacharqa. Allinta ruwashasqanta yuyasqanraykutaj, sonqon mana juchacharqachu. Jinapis aswan qhepamanraj repararqa mana allintachu ruwasqanta (Hechos 23:1; 1 Corintios 4:4; 2 Timoteo 1:3). Chayta reparakuspataj, kausayninta cambianan kasqanta yacharqa. Chayrayku niraj imatapis ruwashaspa, imatachus Jehová Dios ruwananchejta munasqanpi piensarisunman.
9 Pillatapis munakuspaqa payta kusichinapaj jina imatapis ruwayta munanchej. Ajinallatataj Jehová Diostapis munakusqanchejrayku kusichiyta munanchej. Chayrayku mayta manchachikunchej imata ruwaspapis sonqonta nanachiyta. Nehemiaspa kausayninmanta parlarina. Payqa ‘Diosta manchachikusqanrayku’ kamachej kashaspa mana qhapajyayta maskʼarqachu (Nehemías 5:15). Nehemiasqa Jehová Diosta kusichiyta munaspapuni imatapis ruwarqa. Noqanchejpis Diosta manchachikusqanchejrayku mana llakichiyta munanchejchu. Chayrayku Bibliata leespa sumajta yachakuna imaschus Diospa sonqonta nanachisqanta, imastajchus kusichisqanta (kay libroj 240 paginanpi “Diosta manchachikuy” nisqata leeriy).
Sumaj yachachiykunata maskʼana
(Romanos 3:4) ¡Ni imarayku! Astawanpis Diosqa cheqatapuni parlan, tukuy runas llulla kajtinkupis. Qhelqasqa kashan jina: “Parlasqaykeqa cheqan kasqaykita rikuchenqa. Paykuna juchachasojtinkutaj, pantasqa kasqankuta rikuchinki”.
Romanos libromanta wakin allin yachachiykuna
3:4. Runaj kamachisqan, Diospa kamachisqanwan churanakun chayqa, Bibliaj nisqanpi atienekuspa, chayman jina ruwaspa ima, Diosninchej cheqa kasqanta rikuchinchej. Chantapis, kʼajaywan willamuspa, Diosmanta yachachispa ima, runata, Jehová cheqa Dios kasqanta reparanankupaj yanapanchej.
(Romanos 3:24, 25) Chaywanpis paykunaqa cheqan runapaj qhawasqa kanku. Imaraykuchus Cristo Jesús paykunata preciowan kacharicherqa. Chaytaj Diospa regalon, mayqentachus jatun khuyakuyninrayku qorqa, chay. 25 Diosqa Jesusta uj jaywanata jina qorqa. Ajinamanta runas paypa yawarninpi creespa, Dioswan allinyakunankupaj. Diosqa chayta ruwarqa cheqan kayninta rikuchinanpaj. Imaraykuchus payqa pacienciakorqa, ñaupa runaspa juchasninkutataj perdonarqa.
Romanos libromanta wakin allin yachachiykuna
3:24, 25. ¿Imarayku nisunman “Cristo Jesusnejta juchamanta kacharichisqa” kasqanchej, manaraj Cristo wañushajtin “ñaupa juchasta” pampachasqantaña? Kay Génesis 3:15 Jesusmanta profeciaqa, 33 kaj watapi Jesucristo kurkupi wañuspa kausayninta qojtin juntʼakorqa (Gál. 3:13, 16). Chaywanpis Jehovapajqa, chay profecía nikusqanmantapacha, juntʼakunmanñapis jina karqa, imajtinchus nisqanta juntʼananpajqa, ni ima jarkʼanchu. Chayrayku Jehovaqa churinpa wañuynin juntʼakunantapuni yachaspa, nisqanpi iñejkunaj juchasninta pampacharqa. Jesuspa wañuynenqa, niraj wañushajtin runasta kausarichimuyta aterqa (Hech. 24:15).
Bibliata leenapaj
11-17 DE FEBRERO
BIBLIAMANTA SUMAJ YACHACHIYKUNA | ROMANOS 4-6
“Diosqa munakuyninta rikuchiwanchej”
(Romanos 5:8) Cristorí juchasapasllaraj kashajtinchej noqanchejrayku wañorqa. Ajinamanta Diosqa munakuyninta rikuchiwanchej.
(Romanos 5:12) Uj runanejta jucha kay mundoman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku.
Diosqa munakuyninta rikuchiwanchej
5 Pablo sutʼinchallantaj: “Uj runanejta jucha kay pachaman yaykumorqa, jucharaykutaj wañuypis tiyan. Ajinamanta wañoyqa tukuy runasman chayarqa, tukuyninku juchallikusqankurayku”, nispa (Rom. 5:12). Diosqa kay rimaykunata entiendenapaj waj pʼitisninpi sutʼinchawanchej. Jehovaqa Adantawan Evatawan ñaupajta ruwarqa, paykunapis Jehová jina mana juchayoj karqanku. Chaymantataj juntʼayta atinankupaj jinalla uj kamachiyta qorqa, chayta mana kasukojtinkutaj wañunankuta nerqa (Gén. 2:17). Chaywanpis ñaupa tatasninchejqa, Jehovata mana kasukorqankuchu, chaywantaj mana Juezninkuta jinachu nitaj Kamachejninkuta jinachu qhawasqankuta rikucherqanku (Deu. 32:4, 5).
(Romanos 5:13, 14) Manaraj Ley kashajtin, ñapis jucha kay mundopi karqaña. Jinapis mana ley kajtenqa, mana pipis juchachasqachu. 14 Chaywanpis wañoyqa rey jina tukuyta kamachisharqa, Adanpa tiempomantapacha Moisespa tiemponkama. Arí, mana Adán jina juchallikojkunatapis kamachisharqa. Adanqa rijchʼakun pichus jamunan karqa, chayman.
Diosqa munakuyninta rikuchiwanchej
6 Adanqa juchallikusqanmantaraj wawasniyoj karqa. Chayrayku tukuy juchasapas kanku, ñakʼarinkutaj. Chaywanpis Jehovaqa, mana paykunata juchacharqachu, imaraykuchus mana paykunachu juchallikorqanku. Chantapis chay tiempopajqa, niraj leyesta churarqachu (Gén. 2:17). Chaywanpis, tukuy runas juchata herenciata jina japʼerqanku. Chaymantapacha runasqa juchasapas karqanku, wañorqanku ima. Dios israelitasman Leyta qosqanwantaj, juchasapas kasqanku sutʼi rikukorqa (Romanos 5:13, 14 ñawiriy). Juchataqa, tatasninchejmanta uj onqoyta japʼisqanchejwan kikinchasunman. Adán juchata herenciata jina saqewasqanchejqa, tatas wawasninkuman onqoyta herenciata jina saqesqankuwan kikinchakun. Chaywanpis chay onqoywanqa mana tukuy wawasninpunichu onqonkuman. Adán juchata saqewasqanchejwantaj mana kikinchu. Arí, tukuy juchasapas kanchej chayraykutaj wañunchej. ¿Maykʼajllapis chay tukukonqachu?
(Romanos 5:18) Ajina ari, uj jucharaykulla tukuy laya runas juchachasqa kanku. Ajinallatataj uj cheqan ruwaynejllata, tukuy laya runas cheqanpaj qhawasqa kanku kausanankupaj.
(Romanos 5:21) ¿Imapaj? Diospa jatun khuyakuynin rey jina kamachinanpaj, imaynatachus juchawan wañuywan kamacherqanku, ajinata. Jinamanta runas cheqanpaj qhawasqa kanankupaj, wiñay kausaytataj japʼinankupaj, Señorninchej Jesucristonejta.
Diosqa munakuyninta rikuchiwanchej
9 “Cheqan runapaj qhawasqa kanankupaj” chantá “runasta juchachasqa kaymanta kacharichin” nisqa griego rimaykuna, ¿ima niyta munan? David J. Williams nillantaj: “Kay rimaykunaqa, uj juicioman rijchʼakun, imaraykuchus Diospa ñaupaqenpi kashanchej. Kay kikinchayqa, juchasapas kasqanchejrayku Diospa ñaupaqenpipis kashasunman jina rikuchin, mayqenpichus Diosqa juez jina juchasninchejta perdonan”, nispa.
10 ¿Imaynatá “pachantinta juzgaj” cheqan kayninman jina uj juchasapa runata juchamanta kacharichinman karqa? (Gén. 18:25.) Jehovaqa, khuyakuyninrayku kʼata Churinta Jallpʼaman kachamorqa, ajinamanta imatachus ruwayta munasqanta qallarerqa. Jesusqa, chʼampaykunapi kaspapis, asipayajtinkupis, maqajtinkupis, Tatanpa munayninta maychus kajman jinapuni juntʼarqa. Cheqa sonqollapuni karqa kurkupi wañuchinankukama (Heb. 2:10). Ajinamanta mana juchayoj kausayninta Adanpa mirayninrayku qorqa, juchamanta, wañuymanta ima kacharichinanpaj (Mat. 20:28; Rom. 5:6-8).
Sumaj yachachiykunata maskʼana
(Romanos 6:3-5) Chayri, ¿manachu yachankichej Cristo Jesuspi bautizasqa kajkunaqa, wañuyninpipis bautizasqa kasqanchejta? 4 Wañuyninpi bautizakusqanchejraykutaj, paywan khuska pʼampasqa karqanchej. Ajinamanta noqanchejpis, Cristo jina mosoj kausaypi purinanchejpaj. Payqa Tatanpa atiyninnejta wañusqas ukhumanta kausarichisqa karqa. 5 Sichus pay jina wañunchej chayqa, cheqamanta pay jinallataj kausarichisqa kasunchej. Ajinamanta paywan ujchasqa kanchej.
Romanos libromanta wakin allin yachachiykuna
6:3-5. ¿Ima ninayantaj, Cristo Jesuspi, wañuyninpi ima, bautizakuy? Jehová espíritu santonnejta cristianosta ajllajtenqa, paykunaqa Jesusman ujchasqa kanku qotuchakuypi kasqankurayku. Imajtinchus qotuchakoyqa Cristoj cuerpon, paytaj uma jina (1 Cor. 12:12, 13, 27; Col. 1:18). Chay ninayan Cristo Jesuspi bautizakoyqa. Chaywanpis ajllasqasqa, ‘Cristoj wañuyninpi’ bautizakullankutaj, imajtinchus Jesús jina ñakʼarinku, chantapis Jallpʼapi wiñay kausayta manaña suyankuchu. Chayrayku ajllasqaspa wañuyninkoqa, Jesuspa wañuynin jinallataj. Chaywanpis mana wañuyninkuwan runaspa juchanta pampachayta atinkuchu. Cristoj wañuyninpi bautizakusqankoqa, paykuna wañuspa janaj pachapi kausanankupaj kausarimojtinku juntʼakun.
(Romanos 6:7) Imaraykuchus wañojqa juchanmanta perdonasqaña.
¿Ñaupa tatasniy kausarimonqankuchu?
Sajrata ruwajkuna kausarimojtinku, ¿juchasninkumantachu juzgasqa kanqanku? Mana. Imajtinchus Romanos 6:7 nin: “Pichus juchapaj wañojqa juchamanta kacharisqaña”, nispa. Rikunchej jina, “sajrata” ruwajkunaqa wañusqankuwan juchasninkuta paganku, nisunman kausarimusqankumanta jaqayman, imatachus ruwasqankuman jina juzgasqas kanqanku. Manataj ñaupa juchasninkumantachu. ¿Imaraykutaj chay aswan sumaj kanman?
Bibliata leenapaj
18-24 DE FEBRERO
BIBLIAMANTA SUMAJ YACHACHIYKUNA | ROMANOS 7, 8
“¿Maytapunichu suyashanchej?”
(Romanos 8:19) Diospa tukuy ima ruwasqanqa maytapuni suyashan, maypachachus Diospa wawasnin tʼinkankuta japʼenqanku, chay tiempota.
Jehová cheqamanta kacharichiwanchej
17 Jehová ima kacharichiytachus Jallpʼapi kamachisninman qonanmanta sutʼinchaspa, Pablo kayta nerqa: “Tukuy kay pacha anchatapuni suyashan Diospa wawasnin rejsichisqa kananchejta”, nispa. Chantá nillarqataj: “Tukuy kay pachapis ismuypa atiyninmanta kacharichisqa kanqa, Diospa kacharichisqa wawasninwan khuska jatun kusiypi kanampaj” (Rom. 8:19-21). Kay textopeqa “tukuy kay pachapis” nispa, Jallpʼapi wiñaypaj kausayta suyakoj runasmanta parlashan. Paykunaqa, Diospa ajllasqa wawasnin “rejsichisqa” kasqankuwan mayta yanapachikonqanku. Rejsichisqa kasqankutaj qallarenqa, ajllasqa cristianos janaj pachapiña kaspa, Cristota Jallpʼamanta sajra kajta chinkachinanpaj, “may chhika runasta” mosoj pachaman pusaykunanpaj ima yanapajtinku (Apo. 7:9, 14).
(Romanos 8:20) Imaraykuchus Diospa tukuy ima ruwasqanqa, mana munasqanraykuchu qhasi manakajman churasqa karqa, manachayqa Dios ajinapi kananta saqesqanrayku. Chaywanpis Diosqa uj suyakuyta qorqa.
Suyakuyninchejpi kusikuna
11 Jehovaqa, uj “miray”, “ñawpa katari” Satanasmanta kacharichinanta nispa, runasman uj suyakuyta qorqa (Apo. 12:9; Gén. 3:15). Ñaupaj kaj “mirayqa” Jesucristo karqa (Gál. 3:16). Pay wañusqanrayku, kausarisqanrayku ima, runas juchamanta, wañuymanta ima kacharichisqa kayta suyakunku. Chay juntʼakunantaj, “Diospa wawasnin rejsichisqa kanan[kuwan]” khuskachasqa kashan. Ajllasqa cristianosqa, iskay kaj “miray” kanku. ¿Maykʼajtaj “rejsichisqa” kanqanku? Cristowan khuska Satanaspa sajra pachanta chinkachishajtinku (Apo. 2:26, 27). Chayta ruwajtinkutaj waj ovejasmanta kajkuna salvasqa kanqanku, paykunaqa jatun ñakʼariymanta kausashaj llojsenqanku (Apo. 7:9, 10, 14).
(Romanos 8:21) Ajinamanta Diospa tukuy ima ruwasqan juchaj atiyninmanta, wañuymantawan kacharichisqa kananpaj. Chay jinamanta Diospa wawasnin jina kacharichisqa kanqanku, chaytaj may sumajpuni.
Suyakuyninchejpi kusikuna
12 Jesucristo Waranqa Watasta Kamachishajtin, “kay pacha[pi]” runas may samarichisqas kanqanku. Chay tiempopitaj, waj jinamanta “Diospa wawasnin rejsichisqa kan[qanku]”. Paykunaqa, sacerdotes jina Cristowan khuska, Jesuspa wañuyninrayku bendiciones kasqanta runasman qonqanku. Diospa Reinon kamachishajtin, kasukoj runas imaschus wañuyrayku, jucharayku ima kasqanta qhepapi saqeponqanku. Pisimanta pisitaj, “ismuypa atiyninmanta kacharichisqa” kanqanku. Waranqa watas tukukuyninkama cheqa sonqollapuni kajtinkutaj, jatun pruebatapis pasajtinku, “kawsay libro[pi]” sutisninku wiñaypaj qhelqasqa kanqa. Chantá “Diospa kacharichisqa wawasninwan khuska jatun kusiypi” kayta taripanqanku (Apo. 20:7, 8, 11, 12). ¡Chaymá may sumaj suyakoyqa!
Sumaj yachachiykunata maskʼana
(Romanos 8:6) Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan, sonqo tiyaykuymantaj.
¿Yuyarikunkichu?
¿Imaynataj aychaj munayninpi yuyaj runa, chantá imaynataj espiritoj munayninpi yuyaj runarí? (Rom. 8:6)
Aychaj munayninpi yuyajqa, munaynillanpi yuyan, chayllamantataj parlan. “Espíritoj munaynimpi” yuyajrí, Diosta astawan sirviypi yuyan, Pay jina yuyananpajtaj kallpachakun. Aychaj munayninpi yuyayqa wañuyman pusan. Diospa atiyninpi yuyaytajrí kausayman pusan, sonqo tiyaykuymantaj (w16.12, páginas 15-17).
(Romanos 8:26, 27) Chantapis Diospa atiynenqa pisi kallpa kayninchejpi yanapawanchej. Wakin kuteqa mana yachanchejchu imatachus Diosmanta mañakunanchej kasqanta. Ajinapi rikukuspa mana ni imata niyta atejtinchejqa, Diospa atiyninnejta yanapasqa kanchej. 27 Sonqonchejta watoj Diosqa, mana ni imata niyta atisqanchejta atiyninnejta entienden. Imaraykuchus Diosqa paypaj tʼaqasqa kajkunata munayninman jina yanapan.
Mañakuykunasniyki ¿imatá qanmanta rikuchin?
20 Ichá wakin kuteqa, sapanchejpi kashaspa imatachus mañakunanchejta mana yachanchejchu. Pablo nerqa: “Noqanchejqa imatachus maychus kasqanman jina mañakunanchejtaqa mana yachanchejchu. Chay Espiritullataj mana niy atina palabraswan ayqospa, noqanchejpaj mañapuwanchej. Sonqonchejta rejsej Diosqa yachan imachus Espiritoj yuyaynin kasqanta” (Rom. 8:26, 27). Jehovaqa, Bibliapi ashkha runaspa mañakuyninkuta qhelqacherqa. Pay yuyaychasqanraykutaj, imatachus niyta munasqankuta, sumajta yacharqa. Chantapis allinta rejsiwanchej. Chayrayku chay qhelqasqaspi kasqanman jina mañakusqanchejta uyariwasunchej. Jehovaqa, espíritu santo ‘noqanchejpaj mañapuwasqanchejta’ uyarin. Diospa Palabranta astawan rejsejtinchejtaj, imatachus mañakunanchej kasqanta, astawan yachasun.
Bibliata leenapaj
25 DE FEBRERO–3 DE MARZO
BIBLIAMANTA SUMAJ YACHACHIYKUNA | ROMANOS 9-11
“Olivo sachʼamanta kikinchay”
(Romanos 11:16) Ñaupaj kaj jaywasqa tʼantachus Diospaj tʼaqasqa chayqa, tukuynin masapis Diospaj tʼaqasqallataj. Saphichus sumaj chayqa, ramaspis sumajllataj kanku.
Diospa yachaynenqa, ¡may jina jatunpuni!
13 Pabloqa, Abrahampa mirayninmanta kajkunata olivo sachʼaj ramasninwan kikinchan (Rom. 11:21). Kay sachʼaqa Abrahamwan Dios tratota ruwasqan juntʼakusqanwan ninakun. Olivo sachʼaj saphenqa may llimphu, chaytaj Jehovawan ninakun, imaraykuchus pay ajllasqa qotu cristianosman kausayta qon (Isa. 10:20; Rom. 11:16). Sachʼaj kʼulluntaj Jesuswan ninakun, payqa Abrahampa mirayninmanta ñaupa kaj miray. Ramasnintaj Abrahampa iskay kaj mirayninmanta “tukuy” kajkunawan ninakun.
(Romanos 11:17) Diosqa olivo sachʼaj wakin ramasninta kʼutorqa. Qantataj kʼita olivoj ramasnin kashajtiykipis, payqa chay sachʼaman injertasorqa. Ajinamanta qanpis saphinpa sumaj yakunta chʼonqarqanki.
(Romanos 11:20, 21) Chayqa ajinapuni. Paykunaqa mana creeyniyoj kasqankurayku kʼuturasqa karqanku, qantajrí creeynejta sayashanki. Ama jatunchakuychu, astawanpis allinta qhawarikuy. 21 Sichus olivo sachʼaj ramasninta Dios kʼuturarqa chayqa, qantapis kʼutuyta atillasunkimantaj.
Diospa yachaynenqa, ¡may jina jatunpuni!
15 Chantá, ¿imatá Jehová munayninta juntʼananpaj ruwarqa? Pablo sutʼinchasqanman jina kʼuturasqa ramaspa cuentanmanta waj kʼita olivo sachʼaj ramasninta tʼinkirarqa (Romanos 11:17, 18 ñawiriy). Kay rimaykunaman jina, llajtasmanta ajllasqa cristianos —wakenqa Roma qotuchakuymanta— kajkunaqa, olivo sachʼaman tʼinkisqaswan ninakun. Ajinamanta Abrahampa mirayninmanta karqanku. Chay tratopi mana kanankupaj jina kaspapis, kʼita olivoj ramasnin jina karqanku, Jehová ajllasqa cristianosmanta kanankupaj ajllarqa (Rom. 2:28, 29).
(Romanos 11:25, 26) Hermanosníy, ama tukuy imata yachasqaykichejta yuyanaykichejpaj, Diospa kay pakasqa yachayninta rejsinaykichejta munani: Israelmanta wakin runasqa mana uyariyta munarqankuchu. Ajinallapunitaj kanqa, mana judío kajkunamanta Dios ajllarqa chaykuna, tukuyninku tantasqa kanankukama. 26 Ajinamanta tukuynin Israel salvasqa kanqa. Qhelqasqa kashan jina: “Salvajqa Sionmanta jamonqa, Jacobpa mirayninmanta kajkunatataj sajra ruwaykunasninkuta saqechenqa.
Diospa yachaynenqa, ¡may jina jatunpuni!
19 Arí, Diospa munaynenqa, “nacionnin Israel[pi]” juntʼakushan (Gál. 6:16). Pablo nerqa jina “tukuy Israel ayllu salvasqa kanqa” (Rom. 11:26). Jehová imatachus nisqan maykʼajchus juntʼakunan tiempo chayamojtenqa, “tukuy Israel” nisunman ajllasqa cristianos janaj pachapi imatachus ruwananku kasqanta ruwanqanku. Arí, reyes jina, sacerdotes jinataj kanqanku. Diospa munaynin juntʼakunantaqa, ¡ni ima jarkʼanmanchu!
Sumaj yachachiykunata maskʼana
(Romanos 9:21-23) ¿Manachu tʼuru vasota ruwajqa tʼurumanta imatapis ruwananpaj atiyniyoj? ¿Manachu kikin tʼurullamantataj ruwayta atin, jatun pʼunchayllapi oqharinapaj tʼuru vasota chayri ima ratopis oqharinapaj tʼuru vasota? 22 Diosqa sajra runasman phiñakuyninta rikuchiyta munarqa, atiyninta rejsichiytapis. Jinapis payqa mayta pacienciakorqa, castiganan karqa chay runaswan. Paykunaqa phirinapaj tʼuru vasos jina karqanku. 23 Diosqa chayta ruwarqa, pikunachus khuyakuyninta japʼinankupaj jina kanku, chaykunaman jatun kayninta rikuchinanpaj. Paykunaqa jatunchasqa kanankupaj tʼuru vasos jina karqanku, pikunatachus Diosqa ñaupajmantaña chaypaj wakicherqa.
Jehovaj kʼamiyninta japʼikuna
5 Chantá, ¿imatá Jehová ruwan mana llinkʼi tʼuru jinachu makinpi kayta munajkunawan? Uj manka llutʼajqa llinkʼi tʼurumanta imatachus munasqanta mana ruwayta atejtin, ichapis waj imata ruwanan kanqa chayri tʼuruta wijchʼupunan kanqa. Chaytaj kanman manka llutʼaj runa mana allinta ruwasqanrayku. Chaywanpis Jehovaqa runas makinpi llinkʼi tʼuru jina churakojtinku ni jaykʼaj pantanchu (Deu. 32:4). Uj runa mana saqekojtenqa paypa juchan. Jehovaqa munajkunata yanapan, mana munajkunatataj mana. Llinkʼi tʼuru jina saqekojkunaqa Jehovapaj may sumaj kanku. Sutʼincharinapaj, ajllasqa cristianosqa Diospa “khuyakuynimpi kajkunaman” tukunku, pikunachus “jatun pʼunchayllapi oqharinapaj” vasos jina kanku. Chaywanpis, Jehovaj makinpi manapuni churakuyta munajkunaqa “wakisqa ka[n]ku wañuypaj” (Rom. 9:19-23).
(Romanos 10:2) Noqa paykunamanta kayta niyman: Diosta tukuy sonqo qhatiyta munanku, chaywanpis mana cheqa yachayman jinachu.
it-1-S pág. 456 párr. 4
Tukuy sonqo
Mana cheqa yachayman jinachu Diosta tukuy sonqo yupaychay. Uj runaqa imatapis tukuy sonqo ruwanman. Jinapis chay ruwasqanqa mana allinchu kanman. Jinapitaj Diosta phiñachinman. Ajinapi rikukorqanku Jesuspa tiempomanta ashkha judíos. Paykunaqa Moisespa Leyninta juntʼaspa, Diospa ñaupaqenpi cheqan runaspaj qhawasqa kayta munarqanku. Jinapitaj “mana cheqa yachayman jinachu” Diosta yupaychasharqanku. Chayrayku Diosqa, paykunata mana cheqan runaspaj qhawasharqachu. Pablotaj chayta sutʼita reparacherqa. Chay judiosqa pantasqankuta reparakuspa, Diosman Jesucristonejta kutirikunanku karqa. Chayta ruwaspalla cheqan runaspaj qhawasqa kankuman karqa. Chantapis Leymanta kacharichisqa kankuman karqa, mayqenchus paykunata juchachaj, chaymanta (Ro 10:1-10). Chay judiosmanta ujqa, Saulo sutiyoj runa karqa. Payqa Tarso llajtamanta karqa, aswan qhepamantaj Pablo sutiwan rejsichikorqa. Payqa judiospa religionninkupi sinchʼitapuni creesqanrayku, “Diospa llajtanta chinkarparichiyta” munarqa, anchatataj qhatiykacharqa. Chantapis “Leyta maychus kajta” juntʼasqanrayku, “ni pi runaj juchachanan” karqa (Gál 1:13, 14; Flp 3:6). Sauloqa Diosta tukuy sonqo sirviyta munaspa, chay imasta ruwarqa. Jinapis mayta pantasharqa. Chayrayku Jehová Diosqa payta khuyakorqa, Cristonejtataj imaynatachus yupaychananta yachacherqa (1Ti 1:12, 13).
Bibliata leenapaj