“Tukuy laya dioskunata wijchʼuychej”

Jacobqa yacharqaña Jehová Diosllata yupaychana kasqanta, niraj Jehová lantista yupaychay mana allinchu kasqanta kamachishajtin (Éx 20:3-5). Chayrayku Jehová, Jacobta Betelman kutinanta nisqantawan, Jacobqa familianta, tukuy paywan rejkunatawan nerqa lantisninkuta wijchʼunankuta. Jacobtaj tukuy chay lantista, jinallataj aretestapis pʼampaykorqa, ichapis aretestaqa suertepaj apaykachaj kanku (Gé 35:1-4). Jacobqa chayta ruwaspa maytachá Jehová Diosta kusicherqa.

Kay tiempopipis Jehová Diosllata yupaychasqanchejta rikuchinchej, mana layqeriosman chhapukuspa, nitaj llulla diosesta yupaychaspa. Chaypajqa allinta qhawarikuna ni imanchej layqerioswan chhapusqa kananta, nitaj kusirikusqanchej imaspis. Ichá librosta leesqanchej chayri peliculasta qhawasqanchej, vampiroswan, condenadoswan chayri chayman rijchʼakoj imaswan chajrusqa kanman. Wakintaj magiawan, layqa ruwaykunawan chajrusqa kanman, chaykunatataj manapis sajrachu kanman jina qhawashasunman. Jinapis, ¿allinchu kanman cristianos chay imaswan kusirikunanchej? Mana. Jehová Diosninchej chejnikusqan imastaqa chejnikunallanchejtaj tiyan (Sl 97:10).

‘KURAJ SUPAYPA CONTRANPI SAYAYKUNA’ NISQA VIDEOTA QHAWAYTAWAN, KAY TAPUYKUNAMAN KUTICHIY:

• 

  ¿Imapitaj Palesa rikukorqa?

• 

  Layqerioswan chajrusqa problemaspi rikukojta yanapanapaj, ¿imaraykutaj allin kanman ancianoswan yanapachikuna?

• 

  Jehová Dios jarkʼanawanchejta munanchej chay, ¿imastataj chinkachinanchej tiyan?

• ¿Imatataj Palesa ruwarqa?

• Tiyakunchej chaynejpi, ¿imaynatataj layqerioswan chajrusqa imasmanta jarkʼakusunman?