¿Imaynatá yachasunman piwanchus casarakunata?

1, 2. 1) Uj cristiano casarakuyta munan chay, ¿imapitaj ñaupajta piensarinan tiyan? 2) Noviashasqankuta nispa, ¿imamantá parlashanchej? (“Mana qonqanapaj” nisqata qhawariy).

¿CASARAKUYTA munawajchu? Kusisqa kanapajqa mana casarakunapunichu tiyan. Chaywanpis ashkha hermanos, hermanaspis ima edadniyoj kaspapis casarakuyta munanku. Pero ñaupajtaqa sinchʼi creeyniyojraj kanayki tiyan, qan kikiykita sumajta rejsikunayki tiyan, qolqetapis sumajta apaykachayta yachanayki tiyan (1 Cor. 7:36).a Ajinamanta casarakuspa kusisqa kayta atinki.

² Chaywanpis uj sumaj parejata mana tariyta atikullanchu (Pro. 31:10). Ichá pitapis astawan rejsiyta munasunman sumaj pareja kananta yuyaspa, pero ichá mana atillasunmanchu novianapaj paywan parlariyta.b Kay yachaqanapi qhawarisun imachus uj solterota yanapananta uj sumaj parejata tarinanpaj, noviaytataj qallarinanpaj. Chantá qhawarillasuntaj imaynatachus congregacionmanta hermanos yanapanankuta casarakuyta munajkunata.

¿IMAYNATÁ UJ SUMAJ PAREJATA TARIWAJ?

3. Niraj uj parejata maskʼakushaspa, ¿imapí uj soltero piensarinan tiyan?

³ Niraj piwanpis noviashaspa, sumajtaraj yachanayki tiyan imayna runawanchus casarakuyta munasqaykita.c Chayta mana yachankichu chayqa, uj sumaj parejata pierdewaj chayri pichus mana qanpaj jinachu kajwan noviayta qallariwaj. Pero payqa bautizasqa testigopuni kanan tiyan (1 Cor. 7:39). Chayqa mana niyta munanchu mayqen bautizasqa hermanollapis qanpaj jina kasqanta. Allin kanman kayta tapurikunayki: “¿Imatá ruwayta munani kausayniywan? ¿Imayna parejatataj maskʼashani? ¿Imaynachus kananta munasqay anchachu?”, nispa.

4. ¿Imatataj wakin solteros Jehovamanta mañakunku?

⁴ Casarakuyta munanki chayqa, ichapis Jehovamanta mañakunkiña (Fili. 4:6). Jehovaqa mana ni piman ninchu uj parejata maskʼapunanta. Chaywanpis payqa imaynachus sonqoyki kashasqanta yachan, imatachus necesitasqaykitapis, uj parejata tarinaykipajtaj yanapasunkiman. Chayrayku payman willaypuni imatachus munasqaykita, imaynachus sonqoyki kashasqantapis (Sal. 62:8). Pacienciata, yachaytapis paymanta mañakuy (Sant. 1:5). Johnd sutiyoj soltero hermanomanta parlarina, payqa Estados Unidosmanta. Pay niwanchej imatachus Jehovamanta mañakusqanta: “Jehovaman nini imayna hermanatachus maskʼashasqayta. Mañakunitaj uj hermanata rejsinaypaj oportunidad presentakunawanta. Chantapis mañakullanitaj uj sumaj qosa kanaypaj yanapanawanta”, nispa. Sri Lankamanta Tanya sutiyoj hermanataj nin: “Jehovamanta mañakuni uj parejata tarinaykama payta kasukunallaypajpuni yanapanawanta, mana llakikunaypaj, kusisqallapuni kanaypajpis yanapanawanta”, nispa. Ichá unaytaña uj parejata maskʼashanki, nirajpunitaj tarishankichu. Jina kajtenqa Jehová nisunki tukuy ima necesitasqaykita qosunanta ni ima faltasunanpaj, nitaj llakikunaykipaj (Sal. 55:22).

5. ¿Imataj solterosta yanapanman Jehovata munakoj hermanosta rejsinankupaj? (1 Corintios 15:58; fotostawan qhawariy).

⁵ Bibliaqa niwanchej: “Señorpa ruwayninpi ashkhata llankʼallaychejpuni”, nispa (1 Corintios 15:58 leey). Kay versiculoj yuyaychasqanman jina ruwanki chayqa, ashkha hermanoswan hermanaswan ima llankʼayta atinki, ajinamanta sumaj amigosta tariyta atinki. Chantapis waj solterosta rejsiyta atinki, pikunachus qan jinallataj Jehovapaj astawan llankʼashanku chaykunata. Jehovata kusichinaykipaj tukuy imata ruwashasqaykiraykutaj, sumaj kusisqa kanki.

6. ¿Imatá yuyarikunanku tiyan parejata maskʼaj solteros?

⁶ Chaywanpis ama parejata maskʼayllapichu yuyay (Fili. 1:10). Uj cristianoqa mana soltero kaspachu, nitaj casado kaspachu aswan kusisqa, manachayqa Jehovaj amigon kaspa (Mat. 5:3). Chantapis soltero kashaspaqa, astawan Jehovapaj llankʼayta atiwaj (1 Cor. 7:32, 33). Chayrayku soltero kasqaykita sumajta aprovechay. Jessicamanta parlarina, payqa Estados Unidosmanta, casi 40 watasniyoj kashaspataj casarakorqa. Pay nin: “Casarakuyta munarqanipunipis. Chaywanpis astawan predicay yanapawarqa kusisqallapuni kanaypaj, manataj llakikunaypaj”, nispa.

ALLINTARAJ REJSIY

7. ¿Imaraykutaj sumajtaraj rejsinayki tiyan pichus gustasunki chayta? (Proverbios 13:16).

⁷ Ichá pitapis rejsinkiña, yuyankitaj pay uj sumaj qosa kananta chayri sumaj warmi kananta. ¿Chay ratochu ninayki tiyan paywan rejsinakuyta munasqaykita? Bibliaqa nin allin yuyayniyoj runaqa allin yachaywan tantearisparaj imatapis ruwasqanta (Proverbios 13:16 leey). Chayrayku pipis gustasunki chayqa, niraj imatapis nishaspa sumajtaraj payta rejsiy. Chaypajqa mana reparayllata qhawariy imastachus ruwashasqanta. Chayta ruwanaykipajtaj tiempo pasanan tiyan. Países Bajosmanta Albert sutiyoj hermano nin: “Uj diaqa uj hermana gustawasunman, qʼayantintaj manaña. Chayrayku tiempo pasananta suyarina pichus gustawanchej chayta rejsinapaj, amataj usqhayllata piwanpis rejsinakuyta qallarinachu”, nispa. Chantapis pichus gustasunki chayta astawan rejsispaqa, ichapis reparanki payqa mana qanpaj jinachu kasqanta.

8. ¿Imatá uj soltero ruwanman piwanchus rejsinakuyta munan chayta mana reparayllata qhawananpaj? (Fotostawan qhawariy).

⁸ Ichá tapukushanki: “Chanta, ¿imaynatataj qhawayman mana reparayllatari?”, nispa. Ichá salonpi kashaspa chayri uj fiestitapi kashaspa reparawaj imaynachus kasqanta, imatachus ruwasqanta, Jehovatapis mashkhatachus munakusqanta. Sumajta reparay pikunachus amigosnin kasqankuta, imasmantachus parlasqantapis (Luc. 6:45). ¿Imastachus qan Jehovapaj ruwayta munanki chay imasllatatajchu paypis ruwayta munan? Ichapis parlariwaj congregacionninmanta ancianoswan, chayri payta sumajta rejsej wiñay tukusqa hermanoswan (Pro. 20:18). Paykunatataj tapuriwaj imaynachus pay kasqanta, imayna qhawasqachus kasqantapis (Rut 2:11). Pitapis mana reparayllata qhawashaspaqa, ama imatapis ruwaychu payta pʼenqachinaykipaj jinaqa. Ama payta wayronqeaychu.

9. Pichus gustasunki chaywan niraj parlashaspa, ¿imamantataj seguro kanayki tiyan?

⁹ ¿Mashkha tiempotataj pitapis mana reparayllata qhawanayki tiyan? Chay rato usqhayllata paywan parlanki chayqa, ichapis yuyanman mana piensarispalla imatapis ruwasqaykita (Pro. 29:20). Qhawakushasqaykita reparajtinñapis, nirajpuni ninkichu paywan rejsinakuyta munasqaykita chaytaj, ichapis yuyanqa anchatañataj iskaychakusqaykita (Ecl. 11:4). Kayta yuyarikuy: Piwanpis rejsinakuyta qallarishaspaqa manarajpuni segurochu kashanchej paywanpunichus manachus casarakunamanta. Jinapis seguro kananchej tiyan casarakunapaj wakichisqa kasqanchejmanta, piwanchus rejsinakuyta munanchej chaytaj noqanchejpaj jinapunisina kasqanmanta.

10. ¿Imatá ruwawaj piwanpis mana rejsinakuyta munaspa?

¹⁰ Pillapis qanwan rejsinakuyta munasqanta reparanki chay, ¿imatá ruwawaj? Mana paywan rejsinakuyta munankichu chayqa, imatachus ruwasqaykipi sutʼi yachakuchun. Mana allinchu kanman payta qhasista kusichinayki mana paywan casarakuyta munankichu chayqa (1 Cor. 10:24; Efe. 4:25).

11. Uj solteropaj parejata ajllapojkuna, ¿imatataj qhawarinanku tiyan?

¹¹ Wakin lugarespeqa uj solterojta tatasnin chayri waj familiaresnin ajllapunku piwanchus casarakunanta. Waj lugarespitaj familiaresninku chayri amigosninku parejata maskʼapunku. Maskʼapuytawantaj paykunata rejsinachinku, noviayta munasqankutachus manachus qhawarinankupaj. Chaykunamanta mayqellantapis ruwana kajtenqa, imachus iskayninkupaj allin kasqanta, imatachus necesitasqankutapis qhawarina. Sichus amigonchejpaj chayri familiarninchejpaj allin parejata tarisqanchejtaña yuyanchej chayqa, imaynachus kasqanta rejsinapaj kallpachakuna, astawanqa Jehovata munakusqantachus manachus yachanapaj. Jehovata munakusqan aswan sumaj qolqemanta nisqa, profesionniyoj kananmanta chayri rejsisqa kananmanta nisqa. Jinapis kayta ama qonqanachu: Casarakunankutachus manachus sapa ujninku ajllakunanku tiyan (Gál. 6:5).

¿IMAYNATÁ REJSINAKUYTA QALLARIWAJ?

12. Piwanpis rejsinakuyta munanki chay, ¿imaynatá chayta payman niwaj?

¹² Piwanpis rejsinakuyta munanki chay, ¿imaynatá payman chayta niwaj?e Paywan uyapura parlariwaj, pero mana uj chʼin lugarpichu, chayri telefononejta parlariwaj. Payman sutʼita niy gustasusqanta, astawantaj rejsiyta munasqaykita (1 Cor. 14:9). Piensarinanraj kasqanta nisojtenqa suyarillay (Pro. 15:28). Mana qanwan rejsinakuyta munajtintaj, respetay chay nisusqanta.

13. ¿Imatá ruwawaj pipis qanwan rejsinakuyta munasqanta nisojtin? (Colosenses 4:6).

¹³ ¿Imatá ruwawaj pipis qanwan rejsinakuyta munasqanta nisojtin? Payqa maytachá kallpachakorqa chayta nisunanpaj. Chayrayku kʼachamanta, respetowantaj parlapayay (Colosenses 4:6 leey). Piensariytaraj munanki chayqa chayta niy, jinapis ama anchata suyachiychu (Pro. 13:12). Mana paywan rejsinakuyta munankichu chaytaj, kʼachallamanta, sutʼintataj niy. Austriamanta Hans sutiyoj hermanomanta parlarina. Paytaqa uj hermana nisqa paywan rejsinakuyta munasqanta. Hans nin: “Kʼachallamanta sutʼita nerqani mana paywan rejsinakuyta munasqayta. Mana qhasita kusichinayrayku chay rato chayta nerqani. Chayrayku chay kutimantapacha aswan allinta qhawarikorqani imaynachus paywan kasqayta”, nispa. Chaywanpis paywan rejsinakuyta munanki chayqa, imachus sonqoykipi kasqanta payman willay, imaynatachus novianaykichejmantataj parlariychej. Maymantachus kasqaykichejman jina, imaynatachus novianamanta mana kikintapunichu yuyawajchej.

¿IMAYNATÁ SOLTEROSTA YANAPASUNMAN?

14. Solterosta yanapayta munanchej chay, ¿imatá ruwasunman?

¹⁴ ¿Imatá tukuypis ruwasunman casarakuyta munaj solterosta yanapanapaj? Imatachus parlasqanchejta sumajta qhawarikuna (Efe. 4:29). Tapurikuna: “¿Solterosllaraj kajkunata molestarinichu? Uj solterota, uj solterawan parlashajta rikuspa, ¿chay ratochu nini ‘ni jinallachu parlashankuman’ nispa?” (1 Tim. 5:13). Chantapis amapuni solterosta yuyachinachu mana casadochu kasqankurayku pisipaj qhawasqa kasqankuta. Ñaupaj parrafopi parlarerqanchej chay hermano nin: “Wakin hermanosqa niwayta yachanku: ‘¿Maykʼajtaj casarankiri? Manaña ancha jovenchu kanki, pasarapuwajtaj’, nispa. Hermanos chayta nisqankoqa solterosta yuyachiwayku pisipaj qhawasqa kasqaykuta, casarakunaykupunitaj kasqanta”, nispa. Chayrayku aswan allin kanman paykunata kallpachanapaj jinapuni imatapis nina (1 Tes. 5:11).

15. 1) Romanos 15:2 nisqanman jina, ¿imatá yuyarikunanchej tiyan niraj uj solterota yanaparishaspa? (Fototawan qhawariy). 2) ¿Imasta mana ruwanatataj videopi yachakunki?

¹⁵ Ichá nisunman: “Kay iskay hermanos sumaj pareja kankuman”, nispa. Ajina kajtin, ¿imatá ruwasunman? Bibliaqa niwanchej wajkunaj yuyasqankuta respetana kasqanta (Romanos 15:2 leey). Ashkha solterosmanqa mana gustanchu pitapis kʼaskachinanchej, chay yuyasqankutataj respetana (2 Tes. 3:11). Wakenqa ichapis munankuman yanaparinanchejta, jinapis yanaparinata nillawajtinchej yanaparisunman (Pro. 3:27).f Wakintaj mana reparayllata yanapanata munanku. Alemaniamanta Lydia sutiyoj soltera hermana nin: “Pikunatachus rejsinachiyta munanki chaykunataqa wajkunatawan khuska invitariwaj. Ajinamanta yanaparinchej tinkunankupaj, chaymantaqa paykunamantaña”, nispa.

16. ¿Imatá yuyarikunanku tiyan solteros?

¹⁶ Solteros kaspapis casados kaspapis, tukuyninchej kusisqas kasunman (Sal. 128:1). Chayrayku sichus casarakuyta munanki, nitaj qanpaj jina uj parejata tarinkirajchu chayqa, Jehovata sirviyta kausayniykipi ñaupajman churallaypuni. Macaomanta Sin Yi sutiyoj hermana nin: “Paraisopeqa qosanchejwan chayri warminchejwan may chhika unayta kausakuyta atisun. Chaywan kikinchasqa soltero kayqa pisi tiempitolla. Chayrayku soltero kayta sumajta aprovechana, kusikunataj”, nispa. Ichapis uj sumaj parejata tarinkiña, noviashankiñataj. Jina kajtin, ¿imatá ruwawaj noviashasqaykipi allin risunanpaj? Chayta qhepan yachaqanapi yachakusun.