Diosta kasukoj ángeles jina ruwana

1, 2. 1) ¿Imaspitaj angeleswan mana kikinchu kanchej? 2) ¿Imaspitaj angelesman rijchʼakunchej?

JEHOVATA rejsispaqa munakuyniyoj familianman yaykunchej. Chay familianpitaj kashanku mundontinmanta hermanosninchej, may chhika ángeles ima (Dan. 7:9, 10). Angelespi piensarispaqa ichapis yuyasunman paykunawanqa ashkha imaspi mana kikinchu kasqanchejta. Paykunaqa runasmanta nisqa aswan ñaupajtaña ruwasqa karqanku (Job 38:4, 7). Angelesqa noqanchejmanta nisqa aswan atiyniyoj kanku. Chantapis paykunaqa santos kanku, cheqan kajtapunitaj ruwanku. Noqanchejtaj pantaj runas kasqanchejrayku, paykunaman mana japʼikunchejchu (Luc. 9:26).

² Tukuy chay imaspi angeleswan mana kikinchu kajtinchejpis, ashkha imaspi paykunaman rijchʼakunchej. Angelespis noqanchejpis Jehová jina kʼachas kayta atinchej, imatachus ruwananchejta ajllakuyta atinchej, sapa uj sutiyoj kanchej, caracterninchejpis mana tukuypatachu kikin, Jehovata sirviypitaj imaymana ruwaykunata japʼinchej. Chantapis ángeles jinallataj Jehovata yupaychanapaj ruwasqa kanchej (1 Ped. 1:12).

3. ¿Imatá Diosta kasukoj angelesmanta yachakusunman?

³ Angelesman ashkha imaspi rijchʼakusqanchejrayku, ruwasqankoqa kallpachawanchej, ashkha sumaj imastataj paykunamanta yachakusunman. Angelesqa kʼumuykukoj sonqos kanku, runasta munakunku, sinchʼita sayanku, congregación llimphu kananpajtaj mayta yanapakunku. Kay yachaqanapitaj yachakusun imaynatachus paykuna jina ruwananchejta.

ANGELESQA KʼUMUYKUKOJ SONQOS KANKU

4. 1) ¿Imaynasmantataj ángeles rikuchinku kʼumuykukoj sonqos kasqankuta? 2) ¿Imaraykutaj ángeles kʼumuykukoj sonqos kanku? (Salmo 89:7).

⁴ Diosta kasukoj angelesqa kʼumuykukoj sonqos kanku. Paykunaqa may chhika unaytaña kausajtinkupis, may atiyniyoj, may yachayniyoj kajtinkupis, Jehovaj kamachiykunasninta kasukunku (Sal. 103:20). Jehová ima ruwaytapis paykunaman qojtenqa, mana jatunchakuspalla chayta ruwanku, nitaj may jina atiyniyoj kasqankutachu rikuchiyta munanku. Ichapis sutinkutaqa wajkuna ni jaykʼaj yachanqankuchu, jinapis may kusiywanpuni Jehovaj munayninta ruwanku (Gén. 32:24, 29; 2 Rey. 19:35).a Paykunaqa Jehovalla jatunchasqa kananta munanku, nitaj jatunchachikuyta maskʼankuchu. ¿Imaraykutaj ángeles kʼumuykukoj sonqos kanku? Jehovata munakusqankurayku, tukuy sonqotaj payta respetasqankurayku (Salmo 89:7 leey).

5. ¿Imaynatá uj ángel Juanta cheqanchashaspa kʼumuykukoj sonqo kasqanta rikucherqa? (Dibujotawan qhawariy).

⁵ Angelesqa kʼumuykukoj sonqospuni kanku. Chayta reparanchej imachus 96 wata chaynejta pasasqanpi. Chay kutipi uj ángel apóstol Juanman mosqoypi jina tʼukuna imasta rikucherqa. Chay angelpa sutintataj mana yachanchejchu (Apo. 1:1). ¿Imatá Juan ruwarqa chay jina tʼukuna imasta rikuspa? Chay angelta yupaychananpaj qonqoriykukorqa. Chay angeltaj mana munarqachu chayta ruwananta. Chayrayku chay ratopacha nerqa: “¡Imatá ruwashanki! ¡Ama chayta ruwaychu! Noqaqa kamachi masillayki kani, hermanosniykejtawan […]. ¡Diosta yupaychay!”, nispa (Apo. 19:10). Chaywan rikucherqa kʼumuykukoj sonqo kasqanta. Chay angelqa mana munarqachu jatunchachikuyta, nitaj alabachikuytapis. Payqa chay ratopacha nerqa Jehovallata yupaychananta, nitaj yuyarqachu Juanmanta aswan sumaj kasqanta. May chhika unaytaña Jehovata sirvispa kajtinpis, Juanmanta aswan atiyniyoj kajtinpis, kʼumuykukoj sonqo karqa, nerqataj: “Noqaqa kamachi masillayki kani”, nispa. Juanqa awelitoña karqa, chay angeltaj payta cheqanchanan kajtinpis, mana kʼamirparqachu, nitaj kʼumuykachacherqachu. Astawanpis kʼachallamanta parlapayarqa. Repararqachá Juanqa chay tʼukuna imasta rikusqanrayku payta yupaychayta munasqanta.

6. ¿Imaynatá ángeles jina kʼumuykukoj sonqos kasunman?

⁶ ¿Imaynatá ángeles jina kʼumuykukoj sonqos kasunman? Ángeles jinallataj Jehovapaj tukuy atisqanchejta llankʼana mana jatunchakuspalla, nitaj noqallanchej imatapis sumajta ruwayta atisqanchejta yuyachispalla (1 Cor. 4:7). Nillataj yuyanachu Jehovata aswan unaytaña sirvishasqanchejrayku, chayri wakin ruwaykunata japʼisqanchejrayku wajkunamanta aswan sumaj kasqanchejta. Astawan ruwaykunata japʼisqanchejman jina, wajkunamanta aswan sullkʼapis kasunman jina yuyakunanchej tiyan (Luc. 9:48). Ángeles jina wajkunata tukuy sonqo sirvinanchej tiyan, manataj wajkunata yuyachinanchejchu tiyan paykunamanta aswan sumaj kasqanchejta.

7. Pitapis cheqancharishaspa chayri yuyaycharishaspa, ¿imaynatá kʼumuykukoj sonqos kasqanchejta rikuchisunman?

⁷ Chantapis kʼumuykukoj sonqosllataj kananchej tiyan pitapis cheqancharishaspa chayri yuyaycharishaspa, kachun hermanonchejta chayri wawasninchejta. Ichapis wakin kuteqa sutʼimanta imatapis yuyaycharinanchej kanqa. Jinapis imaynatachus angelqa Juanta kʼachamanta cheqancharqa, ajinallatataj noqanchejpis ruwananchej tiyan. Atikun sutʼimanta cheqanchariy mana desanimachispalla. Wajkunata aswan kurajta jina qhawasun chayqa, Bibliaman jinapuni imatapis yuyaycharisun, respetowan munakuywantaj (Col. 4:6).

ANGELESQA RUNASTA MUNAKUNKU

8. 1) Lucas 15:10 nisqanman jina, ¿imaynatá ángeles rikuchinku runasta munakusqankuta? 2) ¿Imaynatá ángeles predicacionpi yanapawanchej? (Tapapi fototawan qhawariy).

⁸ Angelesqa ima llakiykunachus runasta pasasqanta mana qhawakullankuchu. Astawanpis runasta munakunku. Paykunaqa mayta kusikunku uj juchallikoj runa pesachikojtin, nisunman Jehovaj uj chinkasqa ovejitan kutinpojtin, chayri uj runa Jehovata rejsispa payta sirvinanpaj kausayninta cambiajtin (Lucas 15:10 leey). Angelesqa predicacionpi mayta yanapakullankutaj (Apo. 14:6). Mana paykuna kikinpunichu runasman parlajtinkupis, Jehovamanta yachakuyta munaj runasman pusayta atiwanchej. Mana sutʼimanta nisunmanchu uj angelpuni uj runaman pusawasqanchejta. Jehovaqa waj imasnejtapis chayri espíritu santonnejtapis runasta, kamachisnintapis yanapayta atin (Hech. 16:6, 7). Chaywanpis Jehovaqa angelesnejta ashkha imasta ruwan. Chayrayku predicashajtinchejqa mana iskayrayananchejchu tiyan angelesqa yanapanawanchejpaj chaypipuni kashasqankumanta (“Jehová mañakusqankuta uyarerqa” nisqa recuadrota qhawariy).b

9. ¿Imaynatá ángeles jina wajkunata munakusunman?

⁹ ¿Imaynatá ángeles jina wajkunata munakusunman? Uj hermano congregacionman kutinpusqanta willakojtin, ángeles jinallataj mayta kusikunanchej tiyan. Chay hermanonchejta munakuywan japʼikuna, mayta munakusqanchejtataj rikuchina (Luc. 15:4-7; 2 Cor. 2:6-8). Ángeles jina ruwallasunmantaj predicacionpi tukuy atisqanchejta yanapakuspa (Ecl. 11:6). Imaynatachus ángeles predicacionpi yanapawanchej, ajinallatataj noqanchejpis hermanosninchejta yanaparina. Ichapis mosoj publicadorwan willaj llojsisunman. Chayri uj kuraj hermanitota, chayri uj onqosqa hermanitota nisunman noqanchejwan predicaj llojsinanta.

10. ¿Imatá Saramanta yachakunchej?

¹⁰ Ichapis mana munasqanchejman jinapunichu Jehovapaj llankʼayta atisun. Jinapis angelesqa runasman waj jinasmanta willasqanchejpi yanapawasunpuni. Indiapi tiyakoj Sarac sutiyoj hermananchejmanta parlarina. Payqa 20 watasta jinaña precursora karqa. Jinallapi onqoykorqa, chaymantapachataj niña camamanta jatarikuyta aterqachu. Chayrayku hermananchejqa may llakisqapuni kasharqa. Chaywanpis hermanos yanaparisqankurayku, munakuyninkuta rikuchisqankurayku, Bibliatapis sapa día leesqanrayku, pisimanta pisi watejmanta kusisqa kayta aterqa. Ajinapis waj jinasmanta predicayta yachakunan karqa. Payqa ni cartasta escribinanpajpis tiyaykuyta atejchu. Chayrayku telefononejllataña predicanan karqa. Payqa pikunatachus ñaupajta visitarej chay runasta wajyarej, chay runastaj payman nej kanku pikunachus ichapis Bibliamanta yachakuyta munanankuta. ¿Imataj chayrayku karqa? Uj mashkha killasllapi Saraqa 70 estudiosniyojña karqa. May ashkha kasqankuraykutaj mana tukuyninkuta estudiachiyta aterqachu. Chayrayku wakin estudiosnintaqa congregacionninmanta hermanosman pasaporqa. Chay estudiosninmanta ashkhasqa tantakuykunaman rishankuña. Angelesqa maytachá kusikunku hermananchej Sara jina predicanankupaj mayta kallpachakoj hermanoswan khuska llankʼaspa.

ANGELESQA SINCHʼITA SAYANKU

11. ¿Imatataj angelesmanta yachakusunman?

¹¹ Diosta kasukoj ángeles sinchʼita sayasqankumanta mayta yachakusunman. Paykunaqa may chhika unaytaña qhawamushanku mana justicia ruwakusqanta, sajra imasllataj kay jallpʼapi kasqanta. Paykunaqa rikorqanku imaynatachus Satanaswan, waj ashkha angeleswan Jehovata sirvishaspapis paypa contranta oqharikusqankuta (Gén. 3:1; 6:1, 2; Jud. 6). Bibliaqa nin uj ángel may atiyniyoj demoniowan maqanakusqanta (Dan. 10:13). Ñaupa tiempomantapacha angelesqa rikorqanku pisi runaslla Jehovata sirvikuyta ajllasqankuta. Tukuy chayta rikuspapis, paykunaqa Jehovata tukuy sonqo kasukushallankupuni, kusiywan sonqo kʼajaywantaj payta siga sirvishallankupuni. Paykunaqa yachanku Diosqa maychus tiemponpi tukuy sajra imasta chinkachinanta.

12. ¿Imataj yanapawasun sinchʼita sayanapaj?

¹² ¿Imaynatá ángeles jina sinchʼita sayasunman? Ichá noqanchejpis rikullanchejtaj justicia mana ruwakusqanta, chayri ichapis qhatiykachasqa kashanchej. Jinapis ángeles jina yachanchej Diosqa maychus tiemponpi tukuy sajra imasta tukuchinanta. Chayrayku Diosta kasukoj ángeles jina “mana saykʼuspa allin kajta ruwanallapuni” (Gál. 6:9). Jehová niwanchej aguantayta atinapaj yanapanawanchejta (1 Cor. 10:13). Paymanta espíritu santonta mañakusunman, chaytaj yanapawasun pacienciakunapaj, kusisqataj kanapaj (Gál. 5:22; Col. 1:11). Qhatiykachasqa kashanki chay, ¿imatá ruwawaj? Jehovapi tukuy sonqo atienekuy, amataj manchachikuychu. Jehovaqa qanwanpuni kanqa, kallpatataj qosonqa (Heb. 13:6).

ÁNGELES YANAPAKUNKU CONGREGACIÓN LLIMPHULLAPUNI KANANPAJ

13. ¿Imatataj ángeles kay qhepa pʼunchaykunapi ruwashanku? (Mateo 13:47-49).

¹³ Kay qhepa pʼunchaykunapi Jehovaqa angelesman uj sumaj ruwayta qon (Mateo 13:47-49 leey). Predicaspaqa may chhika runasman chayanchej, tukuy laya runasman. Wakenqa kausayninkuta cambianku cristianosman tukunankupaj, wakintajrí mana. Angelesqa yanapakunku “cheqan runasmanta sajra runasta” tʼaqaypi. Ajinamanta yanapakunku congregación llimphullapuni kananpaj. Chayqa mana niyta munanchu pipis congregacionmanta karunchakojtin ni jaykʼaj kutinpuyta atinanta, nillataj niyta munanchu congregacionpi ni ima problema kananta. Jinapis angelesqa tukuy atisqankuta ruwanku congregaciones llimphullapuni kananpaj.

14, 15. ¿Imaynatá ángeles jina congregación llimphullapuni kananpaj yanapakusunman? (Fotostawan qhawariy).

¹⁴ ¿Imaynatá ángeles jina yanapakusunman congregación llimphullapuni kananpaj? Kausayninchejpi, Diosta yupaychayninchejpipis llimphus kanapaj kallpachakuspa. Sapa ujninchej sonqonchejta jarkʼananchej tiyan sumaj amigosta ajllaspa, imaschus Jehovamanta karunchawasunman chay imasta mana ruwaspa ima. Ajinamanta yanapakunchej congregacionninchej llimphullapuni kananpaj (Sal. 101:3). Chantapis hermanosninchejta yanapasunman Jehovata tukuy sonqo kasukunallankupajpuni. Chayrayku, ¿imatá ruwananchej tiyan uj hermano jatun juchata ruwasqanta yachaspa? Payta munakusqanchejrayku ancianoswan parlananta nisunman, ancianosman mana willajtintaj noqanchej willananchej tiyan. Hermanonchejqa juchallikusqanrayku onqosqa jina kashan, munanchejtaj usqhayllata yanapata japʼinanta (Sant. 5:14, 15).

¹⁵ Llakikunapaj jina, jatun juchasta ruwajkunamanta wakenqa congregacionmanta orqhosqa kanku. Pipis orqhosqa kajtenqa manaña paywan masichakunchejchu (1 Cor. 5:9-13).d Chaytaqa ruwakun congregación llimphullapuni kananpaj. Chantapis orqhosqa kajkunawan mana masichakusqanchejqa paykunallatataj yanapan. Jehovata kasukusqanchejqa yuyayninkuman churakunankupaj yanapanman. Yuyayninkuman churakuspa Jehovaman kutinpojtinkutaj maytapuni kusikunchej, imaynatachus Jehovawan angeleswan kusikunku ajinata (Luc. 15:7).

16. ¿Imastataj ángeles jina ruwayta munanki?

¹⁶ May sumajpuni imatachus ángeles ruwasqankuta Jehová willawasqanchejqa, paykunawan khuskataj llankʼayta atisqanchejqa. Mayta kallpachakuna paykuna jina kʼumuykukoj sonqos kanapaj, runasta munakunapaj, sinchʼita sayanapaj, congregación llimphu kananpajtaj yanapakunapaj. Ángeles jina ruwasun chayqa, noqanchejpis Jehovaj familianmanta wiñaypaj kayta atisun.