FPG/The Image Bank via Getty Images
¡RIJCHʼARISQALLAPUNI KAY!
Politicosqa ninku Armagedón kananta | ¿Imatá Biblia nin?
Lunes 10 octubre de 2022 paqarinta, Rusiamanta soldados ashkha misilesta kachaykorqanku Ucraniamanta wakin llajtasman. Chaytaj karqa Crimeatawan Rusiatawan ujchaj puenteta casi urmaykuchisqankumanta iskay dianman. Niraj chay imas pasashajtin wakin políticos nerqanku pisimantawan Armagedón kananta.
Kay 6 de octubre de 2022 fechapi Estados Unidosmanta presidente Joe Biden nerqa: “Kunanqa Armagedón qayllapiña kashanchej, ni Kennedy [Estados Unidospi presidente] kashajtinpis ajinachu karqa, nillataj cubapi misiles kashajtinpis. Armas nucleareswan guerra kajtenqa, seguro Armagedonpi tukusunchej”, nispa.
Kay 8 de octubre de 2022 fechapi Ucraniamanta presidente Volodímir Zelenski, BBC News nisqa periodicomanta periodistas tapojtinku nerqa: “Noqaqa yuyani pisimantawan Armagedón qallarinanta. Jallpʼa entero peligropi kashan”, nispa.
Armas nucleareswan guerra kajtin, ¿Armagedonchu qallarenqa? ¿Imatá Biblia nin chaymanta?
¿Armas nucleareschu Armagedonta qallarichenqa?
Mana. “Armagedón” palabraqa Bibliapi uj kutillata rikhurin, Apocalipsis 16:16 versiculopi. Chaypitaj mana nacionespura maqanakunankumantachu parlashan, manaqa Dioswan ‘jallpʼantinmanta reyeswan’ maqanakunankumanta (Apocalipsis 16:14). Diosqa Armagedón maqanakuypi kay jallpʼamanta tukuy gobiernosta chinkachenqa (Daniel 2:44).
¿Armagedonpi imataj kay jallpʼawan kanqa? Chayta yachanaykipaj ¿Imataj Armagedón? nisqa yachaqanata leeriy.
¿Uj guerra nuclearchu kay jallpʼanchejta, runasta ima chinkachenqa?
Mana. Aswan qhepaman gobiernosqa maqanakunankupaj ichapis armas nuclearesta apaykachanqanku. Jinapis Diosqa mana saqenqachu kay jallpʼata chinkachinankuta. Biblia nin:
“Jallpʼatajrí wiñaypaj kallanqapuni” (Eclesiastés 1:4).
“Cheqan runasqa kay jallpʼata herenciata jina japʼenqanku, kay jallpʼapitaj wiñaypaj kausakonqanku” (Salmo 37:29).
Bibliaj profeciasnin, kay tiempopi imaschus pasashasqanpis reparachiwanchej, pisimantawan kay jallpʼapi kausay cambiananta (Mateo 24:3-7; 2 Timoteo 3:1-5). Biblia nisqanman jina, ¿imaynataj aswan qhepaman kausay kanqa? Chayta yachakuy noqaykuwan Bibliata estudiaspa.