¿Imaraykutaj runas mayta chejninakunku? | ¿Imatá Biblia nin?

Noticiaspeqa astawan uyarikun runas chejninakusqankumanta, chejninakusqankurayku wañuchinakusqankumanta, waj culturayoj kajkunata ñakʼarichisqankumanta, guerraspis kaypi jaqaypi kasqanmanta.

Uj periodicopi nerqa: “Israelwan Gazawan guerrapi kasqankurayku, chʼajwasta rikhurichej sajra runas chayman satʼikusqankurayku ima, redes socialespeqa ni jaykʼaj jina discursospi wajkunata chejnikuspa parlashanku”, nispa (The New York Times, 15 de noviembre de 2023).
Kay 3 de noviembre de 2023 fechapi, presidente de la Asamblea General de las Naciones Unidas Dennis Francis jinata nerqa: “Kay 7 de octubremantapacha astawan rikushanchej runasqa sinchʼita chejninakusqankurayku wañuchinakushasqankuta, millayta siminakushasqankuta ima”, nispa.

Runasqa unaymantapachaña chejninakunku, ñakʼarichinakunku, guerraspitaj tinkunku. Bibliapi nin jaqay ñaupa tiempomanta runasqa ‘sonqota nanachej parlayninkutaqa flechasta jina wakiykuchisqankuta, guerrallata, ñakʼarichiyllata jatarichiyta munasqankuta ima’ (Salmo 64:3; 120:7; 140:1). Jinapis kay tiempopi chejninakuyta rikusqanchejqa Biblia nisqanman jinapuni juntʼakushan.

Kay tiempopi chejninakuy kananpuni karqa

Bibliapi iskaynejmanta niwanchej imaraykuchus runas chejninakuspalla kasqankuta.

1. Bibliaqa nerqaña tukukuy tiempopi “casi tukuypa munakuynin chiriyaponqa” nispa (Mateo 24:12). Nillarqataj runas munanakunankumantaqa imaschus chejninakuyman tanqan chayta ruwanankuta (2 Timoteo 3:1-5).
2. Kay tiempopi runasqa may jinatapuni chejninakunku Satanás sajra kayninta paykunaman chimpaykuchisqanrayku. Imajtinchus Biblia niwanchej ‘mundontin Diabloj makinpi kasqanta’ (1 Juan 5:19; Apocalipsis 12:9, 12).

Jinapis Biblia nillantaj imaschus runasta chejninakuyman tanqan chay imasta Dios tumpamantawan chinkachinanta. Payqa chinkachillanqataj ima llakiykunatachus chejninakuy apamun chayta. Biblia nin:

“[Diosqa] ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis. Chay ñaupaj kaj imasqa chinkapunña”, nispa (Apocalipsis 21:4).