Gálatas 6:9 | “Ama sakepunachu allin cajta ruwaytaka”

“Mana saykʼuspa allin kajta ruwanallapuni. Imaraykuchus mana saykʼuspaqa, maychus tiemponpi poqoyta oqharisunchej” (Gálatas 6:9, Diospa Palabran).

“Ama sakepunachu allin cajta ruwaytaka. Chekatapuni mana llauchhuyacapusun chayka, ajllaska pʼunchaypi sumaj cajta japʼisunchej uj pokoytajina” (Gálatas 6:9, Dios Parlapawanchej).

¿Ima niytá munan Gálatas 6:9?

Apóstol Pabloqa cristianosta kallpacharqa Diospa qhawayninman jina imachus allin kashan, chayta ruwanallankutapuni. Chayta ruwajtinkutaj Dios paykunata bendecinantapuni nerqa.

“Mana saykʼuspa”. Kay palabrasqa “ama saqepunachu” nispa traducikullanmantaj. Griego parlaymanta palabraqa entiendechillantaj ama desanimakunata, kusiyllawanpuni allin kajta ruwanata ima. Apóstol Pabloqa paynintin mana saykʼunanchu kasqanta nerqa, chaywantaj entiendechisharqa paypis wakin kutis allin kajta ruwaspa saykʼusqanta (Romanos 7:21-24).

“Allin kajta”. Chayqa kashan imastachus uj cristiano Diosta sirvispa ruwanan tiyan chay tukuy imas. Chaykunamanta wakenqa kashan uj cristiano waj cristianosta chayri mana cristianoschu kajkunata yanapananpaj imastachus ruwasqan (Gálatas 6:10).

“Mana saykʼuspaqa, maychus tiemponpi poqoyta oqharisunchej”. Pabloqa cartanta leejkunaman yuyaricherqa, wakin kutisqa allin kajta ruwasqanchej sumaj kasqanta rikunapaj suyakuna kasqanta, imaynatachus uj tarpoj runa tarpusqan wiñananta suyakun ajinata. Pabloqa poqoyta oqharinamanta parlaspa, kay versiculoj nisqanta versículo 7 imatachus nisqanwan ujchaykun. Chaypi nin: “Runaqa imatachá tarpun, chayllatataj oqharenqa”, nispa. Arí, sichus uj cristiano Diospa qhawayninpi allin kajta ruwan chayqa, ashkha bendicionesta japʼenqa, chaykunamanta ujnintaj wiñay kausay (Romanos 2:6, 7; Gálatas 6:8).

Gálatas 6:9 ñaupaqenpi, qhepanpi kaj versículos

50-52 watas chayta jina, apóstol Pabloqa Galaciamanta hermanosman uj cartata apacherqa paykunata jarkʼananpaj. Imaraykuchus chaypacha cristiano nichikojkunaqa Jesusmanta qʼewisqa imasta yachachisharqanku (Gálatas 1:6, 7). Chay llulla yachachejkunaqa, yachacherqanku cristianos Diospa Leyninta kasukunanku kasqanta, mayqentachus Dios israelitasman Moisesnejta qorqa chayta (Gálatas 2:15, 16). Jinapis Pabloqa nerqa, Leyqa imapajchus ruwasqa karqa chayta juntʼasqantaña, Diosta yupaychajkunataj manaña chay Leyta juntʼanankuchu kasqanta (Romanos 10:4; Gálatas 3:23-25).

Apóstol Pabloqa cristianos ‘allin kajta ruwanallankutapuni’ nispa, mana Moisespa Leyninta juntʼanankutachu nisharqa, manachayqa “Cristoj leyninta” juntʼanankuta. Chay leymanta wakintaj kashan imastachus Jesús yachacherqa wajkunapaj allin kajta ruwanamanta chay tukuy imas (Gálatas 6:2; Mateo 7:12; Juan 13:34).

Galatasman Carta imasmantachus parlashasqanta yachanaykipaj kay videota qhawariy.