92 yachachiy
Jesús wañusqasta kawsarichin
KAY imillitaqa 12 watayuq. Jesús makinmanta japʼichkan, tatamamantaq chay qayllitapi kachkanku. ¿Imaraykuchus kusikusqankuta yachankichu? Qhawarina imaraykuchus.
Imillitap tatanqa may riqsisqa runa karqa, Jairo sutikuq. Juk pʼunchay wawan unquykuspa, camapi qhipakurqa. Jairo warminwan ima, wawanku wañupuchkasqanta rikuspa phutikurqanku. Payqa kʼata ususin karqa. Chayrayku Jairoqa, Jesús milagrosta ruwasqanta uyarispa, payta maskʼamurqa.
Jairo Jesusta may chhika runap chawpinpi tarirqa. Runawan tanqanakuspataq Jesusman qayllaykuytawan kʼumuykukuspa nirqa: ‘Ususiyqa may unqusqa kachkan. Jaku, payta thañichipunawaykipaq’ nispa, mañarikurqa. Jesustaq risunchik nirqa.
Richkaptinkuqa, runakuna Jesusman qayllaykunankupaq tanqanakuchkarqanku. Chayllapi Jesús tapurqa: ‘¿Pitaq llankhaykuwanri?’ nispa. Jesusqa paymanta atiynin lluqsisqanta yacharqa. ¿Pitaq llankhaykurqari? Juk warmi 12 wataña unqusqa karqa. ¡Payqa Jesuspa pʼachanta llankhaykuspa thañikurqa!
Jesús runata thañichiyta atisqanrayku Jairoqa mayta kusikurqa. Chayllapi, juk runa Jairoman willarqa: ‘Amaña Jesusta jamunanta niychu ususiykiqa wañupunña’, nispa. Jesustaq chayta uyarispa Jairota nirqa: ‘Ama llakikuychu; ususiykiqa thañisqa kanqa’, nispa.
Jairop wasinman chayaptinkuqa, runakuna sunqu nanayta waqachkarqanku. Paykunata Jesús nirqa: ‘Amaña waqaychikchu. Kay wawaqa mana wañunchu. Puñuchkallan’, nispa. Paykunaqa imillita wañupusqanta yachaspa, Jesusta asipayarqanku.
Jesusqa imillitap tatamamanwan, chantapis kimsa apostolesninwan ima, imillita kachkarqa chayman yaykurqanku. Makisitunmanta japʼiytawan nirqa: ‘¡Sayariy!’, nispa. Imillitataq watiqmanta kawsarirqa. Dibujopi rikunkijina, ¡sayriytawan purirqa! Chayrayku, tatanwan mamanwan mayta kusikurqanku.
Jesusqa mana kay imillitallatachu kawsarichimurqa. Juk kuti Naín llaqtamanta juk viudap kʼata churinta kawsarichirqaña. Chantapis, Martap, Mariap, turantapis Lazarota kawsarichimullarqataq. Qhipaman Jesús Diospa Reinonpi reyjina kamachiptin, may chhika runata kawsarichimunqa. ¿Manachu chayta yachaspa kusikusunman?
Lucas 8:40-56; 7:11-17; Juan 11:17-44.