Supaykunaqa, llullakuspa wañupuqkuna kawsachkasqankuta yachachinku

Biblia nin: ‘Satanás, llullakuspa kay pachapi kaq chhika runasta pantachichkasqanta’ (Apocalipsis 12:9). Satanás, supaykuna ima, mana Bibliap nisqanta creenanchikta munankuchu. Chayrayku, wañupuq, maypichus espíritus kachkanku chaypi kawsachkasqanta yachachinku. Imaynatachus chayta ruwasqankuta qhawarina.

Llulla religión

Achkha religionesqa, wañupuqpa alman chayri espiritun, maypichus espíritus kachkanku chayman ripusqanta yachachinku.

Chaywanpis Bibliaqa, chayta mana yachachinchu. Sutʼinchanapaq, imaynatachus Dios, Adanta ruwasqanmanta, Biblia nin: “Jehová Dios jallpʼa polvomanta runata ruwarka ari, senkanman causay samayta samaycurkataj. Chanta runa kawsaq alma kapurka”, nispa. (Génesis 2:7, Quechua de Cuzce) Diosqa, mana imatapis Adanpa cuerponman churarqachu, wañupuptin chay kawsanallanpaqpuni.

Bibliaqa, wañupuq runapta ni imanpis kawsachkaq qhipakusqanta nin. Chayrayku wañupuqqa mana pitapis ñakʼarichinchu nitaq yanapanchu.

• “Samayninku tukukun, jallpʼamantaj tukupunku; chaypacha yuyayninkupi tukuy wakichikusqanku chinkapun.” (Salmo 146:4.)

• “Kausashajkunaqa wañunankuta yachakunku; wañusqasrí mana imatapis yachankuchu, manataj imatapis tarinkuñachu, imaraykuchus paykunaqa qonqapunku”. “Imaschus ruwanaykipaj jina chaykunata, kallpaykiman jina ruway; imaraykuchus wañuspa maymanchus rinki chaypeqa manaña ima ruwanapis kanchu, ni yuyanapis, ni yachana, nitaj yachaypis.” (Eclesiastés 9:5, 10, Qheshwa Biblia.)

Bibliamanta wakin pʼitikunaqa, imaynatachus juk runa wañun, ajinallatataq uywaspis wañusqankuta rikuchin (Eclesiastés 3:19, 20). Wañupuqkunaqa mana imapipis yuyankuñachu, chayrayku wañupuptinkuqa mana imanpis kawsachkaq qhipakunchu.

Bibliata, qallariyninmantapacha, tukukuyninkama ñawiriwaq chayqa, wañupuqkuna espiritusjina kawsachkasqankuta mana tarinkichu. Chay yachachiyqa supaykunap yachachiynin. Chayrayku Jehovaqa, llulla religionpa yachachiyninta chiqnikun (Proverbios 6:16-19; 1 Timoteo 4:1, 2).

Yatiris, layqas ima

Satanasqa, runata chʼawkiyan layqasniqta, yatirisniqta ima. ¿Imataq juk layqa? Layqaqa supaykunawan parlaq runa. Achkha runas, layqas, yatiris ima, wañusqaswan parlachkasqankuta yuyanku. Chaywanpis Bibliaqa mana chaytachu yachachin (Eclesiastés 9:5, 6, 10, Qheshwa Biblia).

Chaywanpis, ¿piwantaq parlanku? ¡Supaykunawan!, supaykunaqa juk runap kawsayninmanta tukuy imata yachanku. Chayrayku pillapis wañupuptin, payjina imatapis ruwayta atinku (1 Samuel 28:3-19).

Llulla cuentos

Satanasqa, wañupuqkunamanta llulla cuentosniqta, llulla yachachiykunata yachachin. Chaytaq runata chiqa kaqmanta karunchachin (2 Timoteo 4:4).

África suyupiqa, wañupuqta kawsachkaqta rikusqankumanta cuentosqa mayta uyarikun. Chantá wañupuqtaqa wasinkumanta, karupi rikusqankuta ninku. Jina kaptin: ‘Wañupuq, familianta, amigosninta ima, saqirparispa wak llaqtaman tiyakuq ripunanqa, ¿allinchu kanman?’.

Astawanpis, ¿manachu wañupuqman rikchʼakuq, wak runalla kanman? Sutʼincharinapaq, Jehovamanta sutʼinchaqkunamanta iskay hermanos juk llaqtapi runaman Diosmanta willachkaptinku, juk runa qhipankuta rillasqapuni. Hermanos, chay runata, imaraykuchus qhipankuta richkasqanta tapuriptinkutaq, chay runaqa, paykunamanta juknin, wañupuq hermanon kasqanta nisqa. Chay runaqa pantachikuchkarqa, chaywanpis pay pantasqapi kachkasqanta mana repararqachu. Kunanqa tʼukuriy, chay runa chayta rikuspa imatachus vecinosninman, amigosninman ima nisqanpi.

Wañusqasta, musquypi rikusqanku, uyarisqanku ima

Qamqa ichá, wak runas imaynatachus wañupuqta rikusqankuta, paywan musqukusqankuta, parlasqanta uyarisqankuta ima, yachanki. Chayrayku chay runasqa mayta manchachikunku. África occidentalmanta Mareinqa, wañupuq abuelan payta waqyachkasqanta, tuta uyariq. Chayrayku payqa mancharisqa, qhaparispa rikchʼariq, tukuy familiantataq rikchʼarichiq. Tiempo pasasqanmanjinataq yuyayninta chinkachirqa.

Wañupuqkuna kawsachkankuman chayqa, ¿allinchu kanman munasqa familiankuta ñakʼarichinanku? Mana ¿icharí?, supaykunalla wañupuq runajina parlanku.

Pillapis unqusqa kachkaptin, sanoyananpaq juk willay rikhuriptin, ¿imanisunmantaq? Sutʼincharinapaq, Sierra Leona suyumanta, Gbassayqa, unqusqa kachkarqa. Musquyninpitaq wañupuq tatan rikhurisqa, nisqataq juk sachʼap laqhinta yakuwan chakruspa ukyananta. Gbassayqa niraq ukyachkaspa, uyarisqanta nipiman willananchu karqa, uyarisqanmanjinataq ruwaspa sanoyapurqa.

Wak warmitaq, wañupuq qusan juk chʼisi, allin rikchʼayniyuq, kʼacha pʼachawan pʼachallisqa rikhurisqanta nillantaq.

Kay willaykunaqa, allinman rikchʼakun. Chaywanpis, ¿Diosmantachu jamun? Mana. Jehovaqa, ‘chiqa Tata Dios’ (Salmo 31:5). Manataq ni jaykʼaq chʼawkiyawasunmanchu. Supaykunalla chʼawkiyawanchik.

Chaywanpis, ¿kʼacha supaykuna kankuchu? Mana. Wakin kuti runata yanapaqjina kaptinkupis, tukuyninku saqras kanku. Kuraq Supayqa, Evata yanapayta munaqjina kʼachamanta parlapayarqa (Génesis 3:1). Chaywanpis Evaqa, Satanaspa nisqanta ruwasqanrayku wañurqa.

Qamqa, wak runata chʼawkiyayta chayri pantachiyta munaspa juk saqra runa, kʼachaman tukusqanta yachanki. Juk rimay nin: “Miskʼi simi jaya sunqu”, nispa. Diospa Palabran nillantaq: “Satanaspis yachan kʼanchaj angelman tukuriyta”, nispa (2 Corintios 11:14).

Diosqa, manaña musquykunaniqtachu, nitaq maypichus espíritus kachkanku chaymanta parlamuspachu, runaswan parlan. Manaqa Biblianiqta yuyaychan, yachachin, ‘tukuy ima allin kaqtataq ruwanankupaq wakichin’ (2 Timoteo 3:17).

Jehovaqa, munakuwasqanchikrayku, Kuraq Supaypa tuqllasninmanta jarkʼakunanchikta niwanchik. Payqa, supaykuna saqra enemigosninchik kasqankuta yachan.