Jehovata yupaychay, amataq Satanastaqa

Tukuyninchik, Jehovatachus chayri Satanastachus yupaychayta akllayta atinchik. Imaraykuchus mana iskayninkutaqa, yupaychayta atisunmanchu. Chaywanpis, ¡Jehovata yupaychayqa may sumaq!

Jehovaqa may kʼacha

Rikunchikjina, supaykunaqa runata ñakʼarichiyta, chʼawkiyayta ima munanku. Jehovataq mana paykunajinachu. Astawanpis Payqa, tukuy runasta munakun, imaynatachus juk tata wawasninta munakun ajinata. Payqa ‘tukuy ima allin kaqta, kʼacha kaqta ima’ quwanchik (Santiago 1:17). Wakin kuti sunqun nananan kaptinpis (Efesios 2:4-7).

Jesús, kay Jallpʼapi kachkaspa imatachus ruwasqanpi tʼukuriy. Payqa opasta parlarichirqa, ciegosta qhawarichirqa, suchusta puririchirqa, leprososta sanoyachirqa, runasmanta supaykunatapis qharqurqa. Chantá Diospa atiyninwan wañusqastapis kawsarichirqa (Mateo 9:32-35; 15:30, 31; Lucas 7:11-15).

Diosqa mana chʼawkiyawanchikchu, manaqa imatapis chiqata niwanchik. Payqa nipita chʼawkiyanchu (Números 23:19).

Saqra ruwaykunamanta jarkʼakuy

Imaynatachus juk chʼuspi kusi kusip llikanpi urman, ajinallatataq achkha runaspis llulla yachachiykunapi, llulla parlaykunapi ima urmanku. Wañupuqkunata, supaykunata, layqachikuyta ima, manchachikunku. Satanaspa llulla yachachiykunasninwan, costumbresninwan ima, chʼawkiyachikunku. Diospa kamachisnintaq mana chʼawkiyachikunkuchu.

Jehovaqa, Satanasmanta astawan atiyniyuq. Payta yupaychanki chayqa, supaykunamanta jarkʼasunqa (Santiago 4:7). Pipis layqasuptinqa mana imanasunqachu. Sutʼincharinapaq, Nigeria suyupi kimsa layqas, juk Jehovamanta sutʼinchaqta, chay llaqtamanta mana ripuyta munaptin, layqaspa wañuchiyta munasqanku. Jehovamanta sutʼinchaq mana imanakusqanta rikuspataq, juknin layqaqqa mayta manchachikuspa khuyakuyninta mañakuq risqa.

Supaykuna ñakʼarichisuptinkuqa, Jehovap sutinta uqhariptiyki, pay jarkʼasunqa (Proverbios 18:10). Chaywanpis Dios jarkʼasunanta munaspaqa, supaykunata yupaychaymanta, layqasmanta ima tʼaqakunayki tiyan. Ñawpa Éfeso llaqtamanta, Diospa kamachisninqa chayta ruwarqanku. Paykunaqa yatiri librosninkuta tantaykuspa ruphachirqanku (Hechos 19:19, 20). Kunanpis Diospa kamachisninqa kikinta ruwananku tiyan. Chayrayku ichá wakʼas, yatiri libros, ima saqramantapis jarkʼakunaykipaq wallqas kapusuptinqa, chinkachinayki tiyan.

Dios nisqanmanjina ruway

Diosta kusichiyta munaspaqa, mana llulla religionllamantachu tʼaqakunayki tiyan, manaqa yachakusqaykimanjina kawsanayki tiyan. Bibliaqa imatachus ruwanaykita nin:

Jehovamanta sutʼinchaqkunawan tantakuy

Satanás, supaykuna ima, paykunata yupaychaqkunaniqta kay Jallpʼapi llulla yachachiykunata yachachinku. Jehovata yupaychaqkunapis kay Jallpʼapi kallankutaq, chaykunataq Jehovamanta sutʼinchaqkuna kanku (Isaías 43:10). Jallpʼantinpitaq, suqta junumanta astawan Jehovamanta sutʼinchaqkuna kanku. Paykunataq allinta imatapis ruwanankupaq, runata yachachinankupaq ima, mayta kallpachakunku. Paykunawantaq Tantakunanku Wasipi tinkuwaq, chayman riptiykitaq may munakuywan parlapayasunqanku.

Paykunaqa, wak runasta Diosta yupaychanankupaq yanapanku. Qamtapis chiqamanta Jehovata yupaychanaykipaq, Bibliamanta yachakunaykipaq ima, wasiykipi yachachisunkuman. Yachachisusqankumantataq mana ni imata mañasunqankuchu. Jehovamanta sutʼinchaqkunaqa, Jehovata, runa masinkuta ima munakusqankurayku, runata yachachisqankumanta mayta kusikunku.