7 Yachaqana
¿Imaynatá Diosmanta mañakusunman?
¿Imaraykutaq mana saykʼuspa mañakunallapuni tiyan? (1)
¿Pimantá chantapis imaynatá mañakunanchik tiyan? (2, 3)
¿Imatataq mañakusunman? (4)
¿Maykʼaqtaq mañakuna tiyan? (5, 6)
¿Tukuy mañakuykunatachu Dios uyarin? (7)
1. Mañakuyqa, kʼumuykukuywan Dioswan parlariy. Diosmanta mana saykʼuspa mañakunallapuni tiyan. Jinamanta juk munasqa masinchikmanjina Diosman qayllaykusunchik. Jehovaqa may atiyniyuq, may jatun kaspapis, mañakuyninchikta uyarin. Qamri, ¿Diosmanta mañakullankipunichu? (Salmo 65:2; 1 Tesalonicenses 5:17.)
2. Diosmanta mañakuspaqa Diosta yupaychanchik. Chayrayku Jehovallamanta mañakunanchik tiyan. Jesús Jallpʼapi kachkaspa Tatallanmanta mañakurqa. Ñuqanchikpis kikillantataq ruwananchik tiyan (Mateo 4:10; 6:9). Chantapis Jesuspa sutinpi mañakunanchik tiyan. Jinamanta Jesuspa kayninta jatunpaq qhawachkanchik, chantapis ñuqanchikrayku jaywakusqanpi iñichkanchik (Juan 14:6; 1 Juan 2:1, 2).
3. Sunqunchik ukhumantapacha Diosmanta mañakunanchik tiyan. Mana kikillantapunichu, nitaq ñawirispachu mañakunanchik tiyan (Mateo 6:7, 8). Mana qunqurikuspallachu Diosmanta mañakuyta atinchik, manaqa payta jatunpaq qhawaspa imaynamantapis, maykʼaqllapis, mayllapipis mañakuyta atinchik. Diosqa sunqunchik ukhupi mañakusqanchiktapis uyarin (1 Samuel 1:12, 13). Sapitanchik kachkaspa Diosmanta mañakuyqa may allin (Marcos 1:35).
4. ¿Imatataq mañakuyta atinchik? Imallatapis, astawan Dioswan masichakunapaq (Filipenses 4:6, 7). Jesús mañakuyta yachachichkaspa, Diospa sutinta jatunchayta, Diospa munaynin ruwakunanta ima, mañakuyta yachachirqa. Chantapis juchanchik pampachakunanta, saqramanta jarkʼanawanchikta, mikhunata quwananchikta ima mañakuyta atinchik (Mateo 6:9-13). Mana ñuqallanchikpaqchu mañakuna tiyan. Imatapis Dios munasqanmanjina mañakunanchik tiyan (1 Juan 5:14).
5. Diosta yupaychanapaq, pachis ninapaq ima, Dioswan palariyta atinchik (1 Crónicas 29:10-13). Llakisqa kaptinchik, chayri iñiyniychik llawchhiyaptin, Diospa yanapayninta mañakuna (Salmo 55:22; 120:1). Mikhunapaqpis Diosman pachis ninanchik tiyan (Mateo 14:19). Jehovaqa ‘mana saykʼuspa’ mañakunanchikta munan (Efesios 6:18).
6. Juchallikuspaqa, usqhayta Jehovamanta khuyakuyninta, juchanchikta pampachananta ima, mañakunanchik tiyan. Juchanchiktachus willasunchik chayqa, mana juktawan juchallikunapaq kallpachakusunchik chayqa, Diosqa “perdonanapaj wakichisqa” kachkan (Salmo 86:5; Proverbios 28:13).
7. Jehovaqa chiqanta ruwaqkunallata uyarin. Chayrayku, Dios munasqanmanjina kawsananchik tiyan (Proverbios 15:29; 28:9). Diosmanta kʼumukuywan imatapis mañakunanchik tiyan (Lucas 18:9-14). Mañakusqanchikmanjinataq ruwananchik tiyan. Jinamanta iñiyniyuq, llampʼu sunqu kasqanchikta rikuchinchik. Jehová mañakuynichikman kutichinqa (Hebreos 11:6).