13 Yachaqana
¿Imaynatá chiqa religionta tariwaq?
¿Tukuy religionkuna Diosninchikpaq allinchu kanku, chayri jukllachu? (1)
¿Imaraykutaq may chhika religionkuna tiyan? (2)
¿Imaynatá chiqa cristianokunata riqsiwaq? (3-7)
1. Jesusqa juk chiqa religionllata saqirqa. Chayrayku, kunanqa juk chiqa religionlla Jehová Diosta yupaychachkan (Juan 4:23, 24; Efesios 4:4, 5). Bibliaqa, wiñay kawsayman pusaq kʼullku ñanpi pisilla kasqankuta yachachiwanchik (Mateo 7:13, 14).
2. Biblia nisqanmanjina, apostolkuna wañupusqankumanta, pisimanta pisi llulla yachachiykuna, mana allin ruwaykuna ima, qutuchakuyman yaykurqa. Wakin runaqa chiqa kaqta qʼiwispa, Cristomanta runata karuncharqanku, paykunap qhipankutataq pusarqanku (Mateo 7:15, 21-23; Hechos 20:29, 30). Chayrayku, kunan tiempopi tukuy laya religionkuna rikhurin. ¿Imaynatá chiqa cristianokunata riqsisunman?
3. Chiqa cristianokunaqa puraqmanta munanakunku (Juan 13:34, 35). Mana jatunchakunkuchu, nitaq runamasinkuta pisipaq qhawankuchu. Manallataq wak llaqtayuq runatapis chiqninkuchu (Hechos 10:34, 35). Chayrayku, chiqa cristianokunaqa mana maqanakuykunaman rinkuchu. Paykunaqa juk familiajina apanakunku (1 Juan 4:20, 21).
4. Chiqa religionmanta kaqkunaqa Bibliata jatunpaq qhawanku. Chiqa cristianokunaqa Bibliata Diospa rimaynintajina qhawanku, yachachisqanpitaq iñinku (Juan 17:17; 2 Timoteo 3:16, 17). Runap yuyasqanta, ñawpa runap ususnintapis qhatinankumanta, Biblia nisqanta qhatinku (Mateo 15:1-3, 7-9). Sapa pʼunchay Biblia nisqanmanjina kawsayta munanku. Jinamanta, wakkunaman Bibliamanta yachachisqankumanjina kawsanku (Tito 1:15, 16).
5. Chiqa religionpi kaqkunaqa Diospa sutinta jatunchanku (Mateo 6:9). Jesusqa Jehová Diospa sutin kasqanta willarqa, chiqa cristianokunaqa kikillantataq ruwananku tiyan (Juan 17:6, 26; Romanos 10:13, 14). ¿Pikunataq Diospa sutinta llaqtaykipi willachkanku?
6. Chiqa cristianokunaqa Diospa Reinonmanta willanku. Jesús chayta ruwarqa. Payqa Diospa Reinonmanta willallaqpuni (Lucas 8:1-3). Chantapis, discipulonkunaman tukuy Jallpʼapi kikinta willanankuta kamachirqa (Mateo 24:14; 28:19, 20). Chiqa cristianokunapaqqa Diospa Reinonlla Jallpʼaman kusiyta apamunqa (Salmo 146:3-5).
7. Jesusta qhatiqkunaqa mana kay saqra pachaptachu kanku (Juan 17:16). Mana kay pachap ruwayninpi, nitaq politicakunapi satʼikunkuchu. Kay pachap puriyninmanta, ruwayninmanta, yuyayninmanta ima, ayqinku (Santiago 1:27; 4:4). ¿Pikunataq llaqtaykipi chiqa cristianojina kawsanku?
[26, 27 paginaspi dibujos/fotos]
Chiqa cristianokunaqa munanakunku, Bibliata jatunpaq qhawanku, Diospa Reinonmantataq willanku