¿Wañusqas kausarimuyta atinkumanchu?

BIBLIAQA NIWANCHEJ

‘Cheqan runasta, mana cheqan runastapis Dios kausarichimonqa’ (Hechos 24:15, Diospa Palabran).

KAYTA YACHAYQA YANAPAWANCHEJ

Pinillanchejpis wañupojtin sonqochakunapaj (2 Corintios 1:3, 4).

Wañuyta mana manchachikunapaj (Hebreos 2:15).

Wañusqa familianchejwan tinkukapuyta suyakunapaj (Juan 5:28, 29).

¿IMARAYKUTAJ BIBLIAJ NISQANPI CREESUNMAN?

Kay kinsa imasrayku:

• Dios tukuyman kausayta qowanchej. Bibliaqa nin Jehová Diosqa “kausay yaku juturi” kasqanta (Salmo 36:9; Hechos 17:24, 25). Arí, Diosqa kausayta qorqa runasman, animalesman ima. Chayrayku payqa atin wañusqasta kausarichiyta.

• Diosqa unay tiempopi runasta kausaricherqa. Bibliaqa willawanchej pusaj runasta Dios kay jallpʼapi kausarichisqanta. Chay runasqa karqanku qharis, warmis ima. Chantapis paykunaqa mana uj edadniyojllachu karqanku. Chay runasmanta wakenqa wañupusqankutawan kausarichisqa karqanku. Uj runatajrí tawa pʼunchay wañusqa kasqanmantaña kausarichisqa karqa (Juan 11:39-44).

• Diosqa wañusqasta kausarichimuyta munan. Jehová Diosninchejqa wañuyta chejnikun, uj enemigota jinataj qhawan (1 Corintios 15:26). Payqa mayta munashan wañuyta chinkachiyta. Chaytataj ruwanqa wañusqasta kausarichimuspa. Arí, Diosninchejqa yuyayninpi kashanku chay runasta kausarichimuyta munashan (Job 14:14, 15).