Diosman qayllaykuy
¿Imatataq Jehová ruwananchikta munan?
KASUKUYQA, wakin kuti mana atikullanchu. Wakinkunaqa, patronesninkuta tanqasqajinalla kasukunku, patronesninku saqra capataskunajina kamachisqankurayku. Diospa kamachisninqa mana tanqasqajinachu Payta kasukunku. Moisesqa, kay Deuteronomio 10:12, 13 pʼitikunapi, imaraykuchus Diospa kamachisnin Diosta kasukusqankuta rikuchiwanchik.a
Moisesqa, imatachus Dios kamachisninmanta mañasqanmanta parlachkaspa, kayta nirqa: “Imatataj mañakusunkichej Señorniykichej Tata Diosri?”, nispa (12 pʼiti). Jehovaqa, Tukuyta Kamachiq Dios, paytaq kawsayta quwarqanchik, munasqanraykutaq kawsachkallanchikpuni (Salmo 36:9; Isaías 33:22). Chayrayku payqa, imatachus ruwananchikpaq kamachiyta atiwanchik. Payllataq, payta kasunanchikta niyta atiwanchik. Chaywanpis mana tanqasqajinallachu kasukunanchikta munan, manaqa “tukuy sonqowan” (Romanos 6:17).
¿Imataq tukuy sunquwan Jehovata kasukunanchikpaq yanapawasunman? Kay 12 pʼiti nin: “Payta manchachikuna[n]chejta”.b Kay pʼitipi Moisesqa, mana juchallikusqanchikmanta Dios castiganawanchikmanta manchachikunanchikmantachu parlachkarqa, manaqa Diosta, kamachiykunasninta ima, may jatunpaq qhawananchikmanta parlachkarqa, chaytaq Payta kasukunallanchikpaqpuni yanapawasunchik.
Chaywanpis Moisesqa, imaraykuchus Diosta kasukunata sutʼincharqa, nirqataq: “[Diosqa munan] payta sirvinaykichejta tukuy sonqoykichejwan, tukuy almaykichejwan ima”, nispa (12 pʼiti). Arí, Diosta munakusqanchikrayku kasukunanchik tiyan. Chaywanpis Diosta munakuyqa mana “Diosta munakuni” niyllachu, manaqa, Diosta munakusqanchikta ruwasqasninchikwan rikuchinanchik tiyan. Chayrayku chiqamanta Diosta munakuspaqa, payta kusichinapaq tukuy imata ruwasunchik (Proverbios 27:11).
Chaywanpis, ¿tukuy imapipunichu Diosta kasukunanchik tiyan? Moisés nirqa: “Paypa ñannintataj purinaykichejta”, nispa (12 pʼiti). Jehovaqa, tukuy imapi payta kasukunanchikta niwanchik. Chaywanpis ichá wakinkunaqa, tukuy imapi Diosta kasukuy mana allinninchikpaqchu kasqanta ninkuman. Chaytaq mana ajinachu, imaraykuchus Diosta kasukuyqa, allinninchikpaqpuni.
Diosta tukuy sunqu kasukuspaqa, tukuy imapi allin riwasunchik. Moisestaq kay 13 pʼitipi chayta sutʼincharqa, nirqataq: “[Diosqa munan] kamachisqasninta, leyesninta ima juntʼanaykichejta, tukuy imapi allin rinasuykichejpaj”, nispa. Chayrayku, Diospa kamachiykunasninqa, allinninchikpaqpuni. Biblia nisqanmanjina, “Diosqa munakuymin” (1 Juan 4:8). Chayrayku Diospa kamachiykunasninqa, mana kunan tiempollapichu yanapawasunchik, manaqa aswan qhipamanpis (Isaías 48:17). Diosta kasukusunchik chayqa, chʼampaykunamanta jarkʼakusunchik, astawan qhipamantaq Diospa Reinon kay Jallpʼata kamachichkaptin, wiñay kawsayta japʼisunchik.c
Chayrayku imallatapis Jehová kamachiwaptinchikqa, tukuy sunqu payta kasukunachik. Ajinata ruwaspaqa, allinnillanchiktapuni munaq Diosman astawan qayllaykusunchik.
[Sutʼinchaykunasnin]
a Moisés unay tiempopi israelitasman yuyaychasqanqa, kunan tiempopi Diosta kasukuyta munaqkunatapis yanapallanmantaq (Romanos 15:4).
b Deuteronomio libroqa, achkha kutita Diospa kamachisninman yuyaychan Diosta manchachikuspa, nisunman mana sunqunta nanachiyta munaspa, kawsakunankuta (Deuteronomio 4:10; 6:13, 24; 8:6; 13:4; 31:12, 13).
c Astawan yachakuyta munaspaqa, ¿Imatapunitaq Biblia yachachin?, libromanta 3 yachaqananta, “¿Imatataq Diosninchik Jallpʼapaq munan?”, sutichasqata ñawiriy. Kaytataq Jehovamanta sutʼinchaqkuna urqhunku.