Moisés Munakuyniyoj runa

¿IMAYNATAJ MUNAKUYNIYOJ RUNA?

Munakuyniyoj runaqa, pillatapis tukuy sonqo munakun. Chaytataj parlasqanwan, ruwasqanwan ima rikuchin, wajkunaj allinninkutapis ñaupajman churan.

¿IMAYNATÁ CHAYTA RIKUCHERQA?

Diosta tukuy imapi kasukuspa, payta munakusqanta rikucherqa. Biblia, 1 Juan 5:3 nin: “Diosta munakoyqa kamachisqasninta juntʼaymin”. Moisestaj chay yuyaychayman jina kausarqa. Imaraykuchus Jehovata jatun imaspi chayri juchʼuy imaspipis kasukorqapuni. Chayrayku uj kutipi, Egiptota kamachejwan parlaj rerqa, waj kutipitaj tojnunta Puka Qochanejman oqharerqa. Arí, tukuy imapi “Diospa kamachisqanman jina” ruwarqa (Éxodo 40:16).

Moisesqa israelitastapis munakullarqataj. Paykunaqa, Jehová Moisesnejta llajtanta pusasqanta yacharqanku. Chayrayku payman “quejasninkuwan yaykoj, llojsej kanku paqarinmanta chʼisiyanankama” (Éxodo 18:13-16). Moisesqa tukuy pʼunchayninta israelitasta uyarispa, maytachá saykʼukoj. Chaywanpis munakuyninrayku, paykunata kusiywan yanapaj.

Moisesqa mana israelitasta uyarejllachu, Diosmantapis paykunapaj mañapoj. Payman sajrata ruwajkunapajpis mañapullajtaj. Sutʼinchanapaj, uj kutipi ñañan María paypa contranta rimarqa, Jehovataj castigananpaj lepra onqoywan chimpaykucherqa. Chaywanpis Moisesqa, Mariata kusipayananmantaqa, ajinata paypaj mañaporqa: “Mañakuyki ari, Tata Dios, sanoyachiy payta ari”, nispa (Números 12:13). Arí, Moisesqa munakuyninrayku chayta mañakorqa.

¿IMATÁ YACHAKUNCHEJ?

Jehovata sonqomantapacha munakunapaj kallpachakunanchej kasqanta. Ajinata munakuspaqa, kamachiykunasninta “tukuy sonqowan” kasukusun (Romanos 6:17). Chaytaj Diosta mayta kusichin (Proverbios 27:11). Diosta munakusqanchejrayku sirveyqa, noqanchejtapis yanapallawanchejtaj. Imaraykuchus Payta kusiywan kasukusun (Salmo 100:2).

Chantapis wajkunaj allinninkuta maskʼanapaj kallpachakunanchej tiyan. Chay jina munakuyniyoj kaspaqa, familianchej chayri amigonchej chʼampaykunasninta willariwajtinchej, 1) sumajta uyarisun, 2) noqanchejpis chay chʼampaypi kashasunman jina yuyasun, 3) payta munakusqanchejtataj rikuchisun.

Noqanchejpis, Moisés jina wajkunapaj Diosmanta mañapusunman. Wakin kuti pillapis chʼampaykunasninta willawajtinchej, mana imata ruway atispa llakikunchej. Ninchejtaj Diosllamanta mañapuyta atisqanchejta. Chaywanpis yuyarina, “cheqan runaj tukuy sonqo mañakuynenqa sinchʼi atiyniyojmin” (Santiago 5:16). Arí, mañakusqanchejqa, Jehovaj sonqonta kuyurichinman, mañakusqanchejman jina ruwananpaj, chayta ruwayta mana yuyashajtinpis. Familianchejpaj chayri amigosninchejpaj Diosmanta mañapuspaqa, astawan sumajta yanapasunman.a

Moisesmantaqa, ashkhata yachakusunman. Noqanchej jina runalla kajtinpis, creeyniyoj, llampʼu sonqoyoj, munakuyniyoj ima, kasqanta rikucherqa. Moisés jina kanapaj kallpachakuna, ashkha bendicionestataj japʼisun, mana noqallanchejpajchu manaqa qayllanchejpi kajkunapajpis (Romanos 15:4).