Moisés Creeyniyoj Runa

¿IMAYNATAJ CREEYNIYOJ RUNA?

Biblia nisqanman jina, creeyniyoj runaqa, mana rikunchu chay imaspis, cheqapuni kasqanta yachan. Diospi creejqa, Paypa tukuy ima nisqan juntʼakunanpipuni atienekun.

¿IMAYNATÁ MOISÉS CHAYTA RIKUCHERQA?

Kausayninpi ajllasqanwan, Jehovaj tukuy nisqan juntʼakunanpi atienekusqanta rikucherqa (Génesis 22:15-18). Moisesqa Egiptopi qhapaj runa jina sumajta kausayta atispapis, “Diospa ayllunwan khuska ñakʼarichisqa kayta ajllakorqa, manataj munarqachu pisi pʼunchaykunapaj kusikuspa jucha kawsaypi puriyta” (Hebreos 11:25). ¿Mana tʼukurispallachu chayta ajllarqa? Chay ruwasqanmanta, ¿maykʼajllapis pesachikorqachu? Mana. Astawanpis Biblia nisqanman jina, “mana saykʼuspa sinchʼita sayarqa, mana rikukoj Diosta rikushanmampis jina” (Hebreos 11:27). Arí, Diospi creesqanrayku imatachus ajllasqanmantaqa, ni jaykʼaj pesachikorqachu.

Moisesqa, wajkunaj creeyninkutapis kallpachallarqataj. Sutʼincharinapaj, uj kutipi israelitasqa, ni mayman ayqeyta atisharqankuchu. Ñaupaqenkupeqa Puka Qocha kasharqa, qhepankupitaj egipcio soldados. Israelitasqa may mancharisqas, Diosman, Moisesman ima qhaparikorqanku. ¿Imatá Moisés ruwarqa?

Moisesqa, ichá mana yuyarqachu Jehová Puka Qochata kichaspa, israelitasta chʼaki pampanta chimpachinanta. Chaywanpis Jehová, paykunata salvananpi atienekorqa, kikinta yuyanankupajtaj israelitasta yanapayta munarqa. Éxodo 14:13 nisqanman jina, Moisés nerqa: “Ama mancharikuychejchu; sumajta sayaychej, rikunkichejtaj Tata Dios imatachus ruwananta qankunata salvasunaykichejpaj”, nispa. Chayta uyarispa, ¿israelitas kallpachakorqankuchu? Arí. Imajtinchus Bibliaqa, Moisés, israelitas ima, “creesqankurayku” “Puka Qocha nisqaj chawpinta, chʼaki pampata chimpa[sqankuta]” nin (Hebreos 11:29). Moisespa creeynenqa, payta, pay jina creejkunata ima yanaparqa.

¿IMATÁ YACHAKUNCHEJ?

Imatachus ajllasqanchejwan, Diospa nisqasninpi creesqanchejta rikuchinanchej kasqanta. Sutʼinchanapaj, Jehovaqa Reinonta ñaupajman churajtinchej, tukuy imata yapata jina qonawanchejta niwanchej (Mateo 6:33). Runaqa tukuy imayoj kaspalla kusisqa kananchejta yuyachiyta munawanchej, chayta atipaytaj mana atikullanchu. Chaywanpis Jehovaqa, payta yupaychanapaj maychus kajllawan kusisqa kausakojtinchej, ni imata pisichinawanchejta niwanchej. Pay nin: “Mana wijchʼurparisqaykichu, nitaj saqerparisqaykichu, nispa” (Hebreos 13:5).

Chantapis wajkunaj creeyninkuta kallpachananchej tiyan. Sutʼinchanapaj, tatasqa wawasninkuta Diospi creenankupaj yanapayta atisqankuta reparananku tiyan. Wawasqa, Dios kasqantapuni, imachus allin, imatajchus mana allin kajta paylla rikuchiyta atisqanta, juchʼuysitumantapacha yachananku tiyan. Chantapis Diosta kasukuspalla, kusisqa kausakuyta atisqankuta entiendenanku tiyan (Isaías 48:17, 18). Tatas wawasninkuman “Diosqa kasqantapuni”, “pikunachus tukuy sonqo maskʼanku, chaykunaman[taj] sumaj tʼinkata” qosqanta yachachejtinkoqa, may sumajta ruwashanku (Hebreos 11:6).