BIBLIAJ KUTICHIYKUNASNIN
¿Imaraykutaj ashkha runas uj Ruwaj kasqanpi yuyanku?
Kausayqa tʼukunapaj jinapuni, ¿icharí?
Kinsa waranqa watas ñaupajta, uj runa qhelqarqa: “Jatunchayki, imaraykuchus tʼukunapaj jina ruwawarqanki” (Salmo 139:14). Chaytaj jinapuni. Imaraykuchus uj wawita juchʼuysitumanta wiñasqanqa (celulamanta), tʼukunapaj jina, ¿icharí? Ashkha runasqa yuyanku tukuy kausayniyoj kajkuna uj Ruwajniyoj kasqankuta. (Salmo 139:13-17; Hebreos 3:4 leey.)
Tukuy ima kajta, Jallpʼata ima ruwajqa kausaytapis qowarqanchej. (Salmo 36:9). Diosqa runas payta rejsinankupaj, paykunawan parlarqa. (Isaías 45:18 leey.)
¿Animalesmantachu runaman tukorqanchej?
Wakin imaspi cuerponchejqa animalespa cuerponman rijchʼakun. Chaytaj ujlla Ruwawajninchej kasqanrayku, paytaj Jallpʼapi kausananchejpaj ruwawarqanchej. Payqa runata mana animalmantachu ruwarqa manaqa, ñutʼu jallpʼamanta. (Génesis 1:24; 2:7 leey.)
¿Imaspí animalesmanta waj jina kanchej? Ñaupajtaqa Ruwawajninchejta rejsiyta, munakuyta, jatunchaytataj atisqanchejpi. Chantapis animalesmanta nisqaqa wiñaypaj kausanapaj ruwasqa kashanchej. Wañunchejtaj, ñaupaj runa Diosta wasanchasqanrayku. (Génesis 1:27; 2:15-17 leey.)