Bibliaj Kutichiykunasnin
¿Kay kausayllachu kanman?
¿Ancha pisitachu kausanchej?
¿Imapajtaj kausanchej? ¿Pujllanallapajchu, llankʼanallapajchu, casaranallapajchu, wawasniyoj kanallapajchu, machuyanallapajchu? (Job 14:1, 2.) Bibliapeqa yachakunchej aswan yachayniyoj runaspis ajinallatataj tapukusqankuta. (Eclesiastés 2:11 leey.)
Imapajchus kausasqanchejta yachanapajqa, imaynatachus kausay qallarisqantaraj yachananchej tiyan. Ñojtunchej, cuerponchejpis may tʼukunapaj jina ruwasqa kasqanta reparaspa, ashkha runasqa sumaj yachayniyoj Dios ruwawasqanchejta ninku. (Salmo 139:14 leey.) Jina kajtenqa mana qhasipajchu ruwawasunman karqa. Chayta sutʼita yachayqa, kausayninchejpi kusisqa kanapaj yanapawasun.
¿Imapajtaj Dios ruwawarqanchej?
Diosqa, ñaupa tatasninchejta ruwaytawan uj kamachiyta paykunaman qorqa. Diosqa munarqa Jallpʼata uj paraisoman tukuchinankuta, wawasniyoj kanankuta, wiñaypajtaj kausanankuta. (Génesis 1:28, 31 leey.)
Ñaupa tatasninchej Diospa contranpi oqharikojtinkupis, Diosqa imatachus munasqanta juntʼanqapuni. Bibliapitaj niwanchej Diosqa llankʼashallasqantapuni cheqa sonqo kamachisninta salvananpaj, Jallpʼapitaj munayninta juntʼananpaj. Chantapis Diosqa munan kusisqa kausakunanchejta. (Salmo 37:29 leey.) Bibliaqa nin imatachus ruwananchej kasqanta Diospa munayninman jina kausananchejpaj.